1Âgofâc‐nane, ŋoŋe bocjahazi qaqazu gie baniŋte mi fotarienʒepieŋ. Manaŋgopieŋ, mumutara dameŋko Wofuŋzi qaqazu nâŋe wiac baʒihuc enâreocmu.
2Nâŋâc mâmâc sasawa wiac gâbâ esifuckeeŋgopeneŋ. Ŋic moc e dâŋko moc mi sâqoreocmu, e ŋic saric sarahaŋne mucnezo. Iŋucnezi me sahac‐ticne sasawa guriŋne sâcne bafâreocmu.
3Becâsic jaŋe dâŋnâŋec reŋkeniŋte micko kiki râe‐jareeŋgopeneŋ. Erâ izi becsâko bac bâtikic ejareeŋgopeneŋ.
4Wokere wâc manaeŋgopeneŋ, jaŋe kâcɋene sâko, erâ mâŋâŋ sanaŋnezi ficne suec‐jopame raeŋgopieŋ, eme sifu guriŋ bapa e guriŋ piticne i bac bâtikic ehuc hata muocmu ijaha wokezi raocmu.
5Eme ŋicnameŋ e iŋuc jaha wiac piticne, erâ wiac wemo afecne efeekac. Manaŋgopieŋ, ʒoc masisi i wiac huŋgaŋne mac, eme iŋucne maczi sopâc sâko rikepene ʒafâreekac.
6Eme nameŋ‐nâŋec ʒoc masisi iŋucnea wâc. Eki hâcne me sahac gâcne siric‐jopahuc sâqocnere neŋgocne eekaczi sahac‐nâŋec bâbie‐fâreekac â juju‐nâŋecte ŋesiŋ rikeme ʒafâreekac; e jahacne ine hârâckonec ʒoczi qâhâsâme ʒaekac.
7Qowi fuŋne fuŋne tiŋkonec â hâweckonec erâ wipe homa wiac i ŋiczi bâmâteŋkezo murâ bâmâteŋkeeŋgopeneŋ.
8Nameŋ ine mo ŋic mozi bâmâteŋkeocmu? E gapec tâmiric ririsiehuc sâqocne baekac, qotâre micopâzi fusucmakicne tinac.
9Nameŋ‐nâŋeczi Wofuŋ Mamac muteŋkeeŋgopeneŋ, erâ nameŋzia ŋic Anuture hawarifâc sâwec‐jopaeŋgopeneŋ.
10Mic ijaha mumuteŋ â sâwec wahaekac. Âgofâc‐nane, iŋuc wemocte?
11Opâ ʒâŋe ijaha nocne â hâtâne ataŋ wahaekac me?
12Âgofâc, hâmeŋko woraŋ fuaocmu? Me saŋko hâmeŋ fuaocmu? Me hâweczi nocne eocmu?
13Ŋoŋerao maŋɋârâŋhec â maŋ manahuc wiac ee iŋucne moc juŋgopieŋ me? Ine wama ruaine juhuc eebapa biaŋne bâfuahuc maŋɋârâŋ‐jeŋicte fuŋne bataniŋkenʒepieŋ.
14Â maŋjeŋicko iiŋguuŋ hâtâne â hehefaric fohame ine sahac‐jeŋic bafehuc dâŋfâri manaŋgopeneŋ mupie burec eocmu.
15Maŋɋârâŋ hata iŋucne i faicnec wahakicne mi muzo, aricne, mâŋɋârâŋ hata iŋucne i mâreŋkonec, ŋickonec, Sataŋtaonec.
16Iiŋguuŋ â hehefaric foocmu ijaha wâc fâfâuc â wiac gâgâpâcne gâcne gâcne fofâreocmu.
17Maŋɋârâŋ hata faicnec izi ine wiac ʒiŋuc bâfuaekac: Qanaŋ maŋɋaɋac, erâ wama, miriŋ, micrereŋ, uruc jauŋhec juju â mitire fârine gâcne, erâ wâc maŋguru tâmiric â siocmâc juju.
18Wamare guriŋne baeŋgopieŋ jaŋe wamao ukicne sara mamac epie fârine tiŋne juju fua‐jareekac.
