1Kasa tasiqu, leana be lopu soku gamu si kote hiva pude na titisa koari na zinama te Tamasa. Ura na gilania gita sapu gami na titisa, si ta pitu koe Tamasa hola ni sari kaiqa tie pule.
2Ura gita doduru mo si hoke tubarae ni gita pa soku siraṉa. Ba be lopu hite tavete va sea si keke tie, koari nana zinama, si na tie toṉotona tugo si asa, meke boka kopu pule nia pa doduruna sa nana tinoa.
3Pana hiva nia gita sa hose pude va tabe gita, gua, si vekoa gita pa ṉuzuna si keke aeana hite, pude boka va ene la ia gita si asa, vasina pu hiva nia gita.
4Doṉo la koasa vaka sapu nomana hola meke tepe pa givusu ṉiṉira, ba boka va kekeria mo keke kalaha hitekena si asa, meke la vasina pu hiva nia sa tie kopu kalaha pude la.
5Ke gua tugo asa sa mea, sapu hitekena mo, ba boka vahesi pule sisigiti nia si asa. Sa nika hitekena si boka sulu betoa sa sa hiqohiqo lavata.
6Sa mea si kekeṉoṉo gua tugo na nika, meke soku hola sari na tinavete kaleadi sapu evaṉi sa. Keke kukuru tinida si asa, sapu turaṉa va sea ia na va kaleania sa doduruna sa tini, meke sa tinoa tanisa tie, koasa kinaleana sapu mae guana koasa nika pa Heli.
7Ura doduru kurukuru ṉame, na kurukuru tapuru, na noki, meke na igana pa kolo, si boka tava manavasa, meke ele tava manavasa tugo pa tie.
8Ba sa mea si loke tie boka va manavasia. Kaleana hola meke lopu boka tava manavasa pa tie, meke variva mate hola si asa.
9Koasa mea si hoke vahesia gita sa Baṉara sa Tamada. Meke hoke zama va kaleana la nia tugo gita pa tie, sapu tava podaka pa kinehana sa Tamasa.
10Sari na zinama vinahesi meke kaleadi, si vura mae gua mo pa keke ṉuzu. Ke kasa tasiqu, lopu ta hivae pude ta evaṉa saripu gua hire.
11Ura lopu boka keke gua vura mae pa keke bukaha sa kolo lomoso, meke sa kolo hokara.
12Ke kasa tasiqu, sa huda piqi si lopu boka vua olive, meke sa huda qurepi si lopu boka vua piqi. Meke loke bukaha kolo hokara si va vura ia sa kolo lomoso.
13Asa sapu tumatumae na gilae koa gamu si mani vata dogoro nia si asa pa nana tinoa leana meke pa tinavete leana, sapu ta tavete pa korapa vina pepekae sapu vurana pa korapa ginilagilana lohina.
14Ba be koa nana pa korapa bulomia sa kinonokono, na binugoro meke na pinuhi, si mi lopu vahesi puleni gamu, meke lopu kokoha pude va paeria sa hinokara.
15Arini pu tavete va sea gua sara si hoke poza puleni na tie gilagilana, gua sarini, ba sari ginilagilana gugua arini si lopu gore mae guadi pa Maṉauru, ba tanisa kasia popoa mo, loke dia pinamaṉa koe Tamasa, ba tadi na tomate kaleadi mo si arini.
16Vasina pu koa sa kinonokono meke na pinuhi, si koa nana tugo sa vinari paqahi meke sari doduru kinaleadi.
17Ba sa ginilagilana lohina sapu gorena mae gua pa Maṉauru, kekenu si via; meke bule, na ṉoṉo, va pepekae, variva tukana hola, meke ta dogoro koari na tinavete leadi, meke lopu toka kale, meke loke sinekesekei si koa koa sa.
18Sari na tie va bulebule, saripu lelete pa binule, si kaqu paketi tugo rini sari na vuana sa tinoṉoto.
