IAKOBO 3

1

2

3

4

5

¹Varavaragu e, umui hutuma hahediba ai basiola, badina be ai hahediba taumai ihahemaoro-henimai baine auka.

²Badina be ita iboudai ta hekwakwanai louloumu; tau ta ena hereva ai se hekwakwanaimu, ia na ḡoeva-dae tauna, tau-anina ireḡuna na mai dibana.

³Hosi ududia ai idogotaodia auridia ta atomu, bae kamonai henida helaoreana; bena taudia idoidiai ta hatatadia kerehaimu.

⁴Lagatoi danu ba ita, idia na babada, bona lai badadia ese e odamu, to tari maraḡi-maraḡina ese e tarimu, tari tauna ena ura gabuna baela.

⁵Unuhetomana, mala be ḡau maragina, to e heaḡi badamu. Lahi danu ba haeroa, ia na maraḡi to uda badana e araiamu.

⁶Benaini, mala be lahi. Ia na kara dika idoinai e haboumu, tauda reḡedia bogaragidiai, bena tau-anida idoidiai e hadikamu. Ia na mauri idoinai iaralaina; ena lahi danu Gehena amo e abiamu.

⁷Badina be mauri ḡaudia iboudiai, e rakamu ḡaudia bona e rohomu ḡaudia bona e raumu ḡaudia bona davara gaudia, taunimanima na ihamanadadia mai dibadia, bona vada e hamanadadia.

⁸A mala ihamanadana na tau ta asi dibana; e raivaraivamu mai dikana ida, mase muramurana amo e honumu.

⁹Iena amo Lohiabada, ita Tamada, ta hanamoamu; iena amo danu Dirava heida-idaua ai e karadiamu taudia ta uduguiraidiamu.

¹⁰Udu tamona amo hahenamo bona heuduguirai e lasimu. Varavaragu e, una na dia namo.

¹¹Guri tamona amo ranu gaihona bona ranu iditana e lohi lohi daemu a?

¹²Varavaragu e, suke auna ai olive huahuadia bae dobi a? Eiava vine auna ai suke huahuadia bae dobi a? Tadi danu ranu gaihona se havaraiamu.

¹³Daika na bogaragimui ai e aonegamu bona lalona e pararamu? Ia ese ena mauri namona na ena kara ai baine hahedinaraia, aonega korikori manauna ai.

¹⁴A vaḡeḡe dikadia bona heiri-heiri na lalomui ai bema mia, basioma heaḡi bona hereva momokani basioma hagagevaia.

¹⁵Una na dia atai amo e maimu aonegana, a tanobada ḡauna, tau-anina ena, lauma dikadia edia.

¹⁶Badina be vaḡeḡe bona heiri-heiri e miamu gabuna ai, heloḡo-heloḡo bona kara dika idoinai e miamu.

¹⁷A atai amo e maimu aonegana toana gini-gunana be ḡoevaḡoeva, murinai maino, gado-namo, lalomanada. Ia na hebogahisi bona huahua namodia amo e honumu. Ia na asi ena daradara bona asi ena dibaka.

¹⁸Kara maoromaoro anina be maino ai e hadoamu, herohemaino taudia ediai.