1Alaq nu hermanos, muꞌana ri lik e kꞌi che alaq kebꞌuꞌan e aj kꞌutunel, ma ri kojkꞌutunik, qetaꞌam waꞌ e jun nimalaj chak yaꞌom chiqaqul. Ruma kꞌu waꞌ, we kaqaꞌan ri na utz taj, más kꞌax ri qꞌatbꞌal tzij re ri Dios kape paqawiꞌ chwa ri qꞌatbꞌal tzij kape pakiwi ri na e ta aj kꞌutunel.
2Na jinta junoq lik jusukꞌ, ma qonoje ri oj tikawex lik kꞌi uwach ri kojmakun wi. Noꞌj we kꞌo junoq na kamakun ta kꞌana rukꞌ taq ri kubꞌiꞌij, riꞌ e jun tikawex lik jusukꞌ yey riꞌ kuchꞌij ne uchuqꞌabꞌ taq ri rayibꞌal re ronoje rucuerpo.
3E riꞌoj kaqakoj preno pa kichiꞌ ri kawayuꞌ chaꞌ kakiꞌan ri kaqaj riꞌoj y jekꞌulaꞌ tobꞌ lik kꞌo kichuqꞌabꞌ, keqakꞌam bꞌi pa kaqaj wi riꞌoj.
4Chꞌobꞌo pe alaq puwi taq ri barcos. Tobꞌ lik e nimaꞌq y e jekꞌetal ruma unimal tew, na rukꞌ ta kꞌu riꞌ, e kꞌamom bꞌi xa rukꞌ jun ralko timón; y rukꞌ waꞌ, ri chapayom re kukꞌam bꞌi pa ri karaj wi rire.
5Jekꞌuriꞌlaꞌ ri qaqꞌ, tobꞌ lik xa chꞌutiꞌn, na rukꞌ ta kꞌu riꞌ, na xa ta jubꞌiqꞌ ri na utz taj kuꞌano echiriꞌ kaqatakꞌabꞌaꞌ qaqꞌij. ¡Chilape kꞌu alaq runimal kꞌacheꞌlaj kaporotaj xa ruma juna upukꞌ aqꞌ!
6Jekꞌulaꞌ ri qaqꞌ e pachaꞌ ri aqꞌ. Ma che ronoje ri kꞌo che ri qacuerpo, ri qaqꞌ tobꞌ lik xa chꞌutiꞌn, na rukꞌ ta kꞌu riꞌ, kukꞌam lo ukꞌiyal mak y jelaꞌ kuyoj ri qabꞌinik y ri qakꞌaslem. Y waꞌ wa qaqꞌ e pachaꞌ tzijital chi ruma ri aqꞌ re xibꞌalbꞌaꞌ, ma chilaꞌ kape wi ri na utz taj kaqabꞌiꞌij.
7E ri oj tikawex yaꞌtal chiqe kojtaqan pakiwi rukꞌiyal uwach awaj, waꞌ e taq ri e kꞌo che ruwachulew, ri kexikꞌikꞌ che ruwa kaj, ri kecharar chuꞌlew y ri e kꞌo pa ri mar. Ronoje kꞌu rukꞌiyal uwach awaj chꞌijital kichuqꞌabꞌ kuma ri tikawex.
8Noꞌj kꞌu ri qaqꞌ na kaqachꞌij ta kꞌana uchuqꞌabꞌ, ma na kuya ta ribꞌ kaqꞌobꞌisax ruchuqꞌabꞌ; e pachaꞌ rupuchiꞌ juna kumatz nojinaq che veneno kakamisanik.
9Rukꞌ ri qaqꞌ kaqayak uqꞌij ri Qaqaw Dios yey rukꞌ waꞌ tzel kojchꞌaw chikij ri tikawex, ri ebꞌuꞌanom ri Dios re kakikꞌutubꞌej uwach Rire.
10Xa kꞌu che jun uchiꞌ qulaj kel lo chomilaj chꞌaꞌtem y itzelilaj chꞌaꞌtem. Alaq nu hermanos, waꞌ na usukꞌ taj kaꞌanik.
11Ma ¿kꞌo nebꞌa juna akꞌal kel lo yaꞌ kiꞌ y yaꞌ kꞌa chupa?
12Alaq nu hermanos, ¿kꞌo nebꞌa juna cheꞌ re higo echiriꞌ kawachinik kel lo aceitunas che? ¿O kꞌo nebꞌa juwiꞌ uva echiriꞌ kawachinik kel lo higo che? Jekꞌulaꞌ riꞌ, chupa juna akꞌal re yaꞌ tza, na kel ta lo yaꞌ kiꞌ.
13We kꞌo junoq chixoꞌl alaq lik kꞌo unaꞌoj y lik kumaj usukꞌ ronoje, e chuqꞌalajisaj kꞌu riꞌ ri saqil unaꞌoj rukꞌ jun bꞌinik silabꞌik lik jusukꞌ y muꞌan ne nim che ribꞌ.
14Pero we kꞌax kꞌuꞌx alaq chibꞌil ibꞌ alaq y kꞌo retzelal kꞌuꞌx chiwach alaq, matakꞌabꞌaꞌ kꞌu qꞌij alaq riꞌ y mabꞌiꞌij ne alaq lik kꞌo runaꞌoj ri Dios ukꞌ alaq, ma xa raqꞌubꞌal.
15Yey waꞌ na e ta ri saqil naꞌoj petinaq rukꞌ ri Dios, ma xa e re ruwachulew, xa ke tikawex y re Ritzel.
16Ma we kꞌo kꞌaxkꞌolil kꞌuꞌxaj y retzelal kꞌuꞌxaj chiwach alaq, waꞌ kukꞌam lo chꞌaꞌoj y ronoje taq ri na utz taj kaꞌanik.
17Noꞌj kꞌu ri saqil naꞌoj petinaq rukꞌ ri Dios, nabꞌe na kaqꞌalajisax rukꞌ jun chomilaj bꞌinik silabꞌik; ekꞌu junoq kꞌo wa saqil naꞌoj rukꞌ, na aj ta chꞌaꞌoj, utz ukꞌuꞌx y na kuꞌan ta utitzꞌitikil; lik kukꞌut ri kꞌaxnaꞌbꞌal ukꞌuꞌx y kuꞌan utzilaj taq chak; na kachaꞌw ta chikixoꞌl ri winaq y na xa ta kebꞌ upalaj.
18Yey ri kakitzukuj ri utzil chomal y kakitik waꞌ chikiwach, riꞌ kekꞌojiꞌ chi usukꞌlikil kukꞌ ri tikawex jelaꞌ pachaꞌ ri karaj ri Dios.
