ያቆቤ 5

1

2

3

4

5

¹ሂስቲኮ ኢንቴኖ ዱሬ ኣሳቶ! ኣኔ ሲዪቴ። ቡሮ ኢንቴ ቦላ ጋካና ሜቶዛ ጊሽ ዬኪቴ፤ ዉ ዉይ! ጊ ዋሲቴ።

²ኢንቴ ሃሮይ ቡቂዴስ፥ ኢንቴ ማይዖካ ቢላይ ሚዴስ።

³ኢንቴ ዎርቃይኔ ኢንቴ ቢራይ ሺይዴስ። ሄ ሺይዳይሲካ ኢንቴ ቦላ ማርካቴሲኔ ኢንቴ ኣሾ ታማ ማላ ፁጌስ። ኢንቴ ዎዴ ዉርሴꬃስ ሚሼ ሺሺዴታ።

⁴ኢንቴ ኢንቴ ዎዝናን ዎꬂቴ፤ ኢንቴ ካꬅ ማፂሼ ፔይዳይታስ ኢስታ ዎልቃ ዋጋ ኢንቴ ቃንፆንታ ኣጊዳ ጊሽ ኢንቴ ቦላ ዋሲሼ ኢንቴ ኣቻን ዴቴስ። ካꬅ ማፂዛይታ ዋሶይ ኡባ ዳንዳዪዛ ጎዳ ሃይꬃን ጋኪዴስ።

⁵ኢንቴ ቢታ ቦላ ኢሻሎኔ ኣልዔቴꬃን ዴዒዴታ፥ ኢንቴ ዎዝና ሹካስ ꬊኪዳ ሜሄ ማላ ሞꬊሲዴታ።

⁶ኢንቴ ኢንቴናራ ኤቄቶንታ ፂሎ ኣሳታ ቦላ ዎርዶ ዎꬂዲ ዎꬊዴታ።

⁷ሄሳ ጊሽ ታ ኢሻቶ! ጎዳይ ሃ ያና ጋካናስ ዳንዳዪቴ። ጎሼ ጎዪዛዴይ ቢታይ ሎዖ ካꬂ ካፃና ጋካናስ ዋኒ ዳንዳዪዛኮኔ ኮይሮ ኢራኔ ዉርሴꬃ ኢራ ኢዚ ዎስቲ ናጊዛኮ ኣኔ ኣኬኪቴ።

⁸ኢንቴካ ሄሳꬆ ዳንዳዪቴ። ኢንቴ ዎዝና ሚንꬂቴ። ጋሶይካ ጎዳ ዩሳ ጋላሲ ማቲዴስ።

⁹ታ ኢሻቶ! ኢንቴ ኢንቴ ጊዶን ዚግሬቶፊቴ፤ ኢንቴ ዚግሬቲኮ ኢንቴ ቦላ ፒርዴታና። ፒርዳናዴይ ሄኮ ኢንቴ ፔንጌ ቦላ ኤቂዴስ።

¹⁰ታ ኢሻቶ! ጎዳ ሱንꬃን ኢንቴስ ዮቲዳ ናቤታ ዋዬቴꬂኔ ኢስታ ዳንዳያ ኢንቴስ ሌሚሶ ሂስቲ ፄሊቴ።

¹¹ዳንዳያን ጌንጪዳ ኣሳታ ኑ ኢስታ “ኢስቲ ኣንጄቲዳይታ” ጊ ቆዲዛይሳ ኢንቴ ኤሬታ። ኢዮቤይ ዋኒ ዳንዳዪዳኮኔ ኢንቴ ኢዛ ጊሽ ሲዪዴታ። ጎዳይ ኢዛ ዉርሴꬃን ኣይ ኦꬂዳኮኔ ኢንቴ ቤይዴታ። ጎዳይ ኣሳስ ኬሂ ሚሼቲዛዴኔ ማሪዛዴ።

¹²ሃራፔካ ታ ኢሻቶ! ሳሎን ጊዲን ዎይኮ ሳዓን ጊዲን ዎይኮ ኣይ ሚሻንካ ጫቆፍቴ፤ “ኤ” ጋናስ ቤሲዛ ሚሽ ጊዲኮ “ኤ” ጊቴ። “ኣካይ” ጋናስ ጊዲኮ “ኣካይ” ጊቴ ሄሳፌ ሃራ ጊኮ ኢንቴ ቦላ ፒርዴታና።

¹³ኢንቴ ጋርሳን ሜቶቲዛ ኣሲ ዲዜ? ዲዛ ጊዲኮ ኢዚ ዎሶ። ኡፋዬቲዛዴይ ዲዜ? ዲዛ ጊዲኮ ኡፋይሳ ዬꬅ ዬፆ።

¹⁴ኢንቴ ጊዶን ሳኬቲዛ ኣሲ ዲዜ? ዲኮ ዎሳ ኬꬃ ጪማታ ፄይጎ። ኢስቲካ ጎዳ ሱንꬃን ዛይቴ ኢዛ ቦላ ቲይዲ ኢዛስ ዎሴቶ።

¹⁵ኣማኖን ዎሲዳ ዎሳይ ሃርጊዳዴ ፓꬃና። ጎዳይካ ኢዛ ዴንꬃና። ኢዚ ናጋራ ኦꬂዳዴ ጊዲኮካ ፆሲ ኢዛ ማራና።

¹⁶ሄሳ ጊሽ ኢንቴካ ኢንቴ ጋርሳን ኢሶይ ኢሳራ ኢንቴ ናጋራ ፓፄቲቴ፤ ፓፃና ማላ ኢሶይ ኢሳስ ዎሲቴ። ፂሎ ኣሳ ዎሳይ ዎልቃራ ዴስ፤ ዎልቃማ ኦሶካ ኦꬄስ።

¹⁷ኤላሲ ኑ ማላካ ኣሳ። ኢዚ ኢራይ ቡኮንታ ማላ ሚንꬂ ዎሲን ቢታ ቦላ ሄꬑ ላይꬂኔ ባጋ ጋካናስ ኢራይ ቡኪቤና።

¹⁸ቃሴካ ዛሪ ዎሲን ኢራይ ሳሎፔ ቢታ ቦላ ቡኪዴስ። ቢታይካ ካꬅ ኢሚዴስ።

¹⁹ታ ኢሻቶ! ኢንቴፌ ኢሳዴይ ቱማፔ ባሌቲን ሃራ ኣሲ ኢዛ ዛሪኮ ሄሳ ዎዝናን ዎꬂቴ። ናጋራንቻ ኢዚ ባሌቲዳ ኦጌፔ ኢዛ ዛሪዳዴይ ሄሳዴ ሼምፖ ሃይቆፔ ኣሼሲኔ ኢዛዴ ናጋራ ዳሮዛካ ካሜስ።