ያቆቤ 4

1

2

3

4

5

¹ኢንቴ ጊዶን ዲዛ ኦላይኔ ኦሻይ ኣዋፔ ዪዴ? ኢንቴ ዎዝናን ዲዛ ኣሞቴꬃፌ ዴንዲዳ ኦላ ጊዴኔ?

²ኢንቴ ኣሞቴታ ሺን ዴሜኬታ። ኢንቴ ኣስ ዎꬌታኔ ኬሂ ኣሞቴታ ሺን ዴማና ዳንዳዬኬታ። ኢንቴ ኢንቴ ጋርሳን ኦዬቲዛ ጊሻኔ ኦሌቲዛ ጊሽ ቃሴ ዎሶንታ ጊሽ ኢንቴስ ኢሜቴና።

³ኢንቴ ኢንቴ ኣሾ ኡፋይሳናስ ኢታ ቆፋን ዎሲዛ ጊሽ ዎሲዳይሳ ኢንቴ ኤኬኬታ።

⁴ኢንቴኖ ላይማቲዛይቶ! ኣላሜራ ሲቄቴꬂ ፆሳራ ሞርኬቴꬅ ጊዲዳይሳ ኤሬኬቲ? ሄሳ ጊሽ ሃይሳ ኣላሜዛራ ሲቄቴꬂ ኮዪዛይ ዉሪካ ፆሳስ ሞርኬ።

⁵ዎይኮ ጌሻ ማፃፋ ጊዶን “ኑናን ኢዚ ኣይሲዳ ኣያናይ ኑ ኢዛይታ ጊዳና ማላ ዳሮ ኣሞቴስ” ጊዛይሲ ኢንቴስ ጮ ሜላ ጊዳ ሚሳቲዜ?

⁶ጊዶ ኣቲን ኢዚ ባ ኪያቴꬅ ኑስ ጉጂ ኢሜስ። ማፃፋይካ “ፆሲ ኦቶራንቻታራ ኤቄቴስ፥ ኣሽኬታስ ቃሴ ባ ኪያቴꬅ ኢሜስ” ጊዳይ ሄሳሳ።

⁷ሄሳ ጊሽ ኢንቴና ፆሳስ ሃሪሲቴ። ዳቡሎሳራ ኤቄቲቴ፥ ኢዚ ኢንቴፌ ባቃታና።

⁸ፆሳኮ ሺቂቴ፤ ኢዚካ ኢንቴኮ ሺቃና። ኢንቴኖ ናጋራንቻቶ! ኢንቴ ኢንቴ ኩሼ ጌሺቴ፥ ኢንቴ ናምዑ ቆፋን ቃፂዛይቶ! ኢንቴ ኢንቴ ዎዝና ጌሺቴ።

⁹ዳርሲ ቆፒቴ፤ ሙዞቲቴ፤ ዬኪቴ፤ ኢንቴ ሚቻይ ዬሆን፤ ኡፋይሳይ ቃሴ ሙዞቴꬃን ሲሞ።

¹⁰ጎዳ ሲንꬃን ኢንቴ ኢንቴና ካዉሺቴ፤ ቃሴ ኢዚ ኢንቴና ꬎቁ ꬎቁ ሂስታና።

¹¹ታ ኢሻቶ! ኢንቴ ኢንቴ ጋርሳን ኢሶይ ኢሳ ሞቶፒቴ፤ ባ ኢሻ ሞቲዛዴይኔ ባ ኢሻ ቦላ ፒርዲዛዴይ ዎጋ ቦላ ኢታ ሃሳዬሲኔ ዎጋ ቦላ ፒርዴስ። ሂስቲኮ ኔ ዎጋ ቦላ ፒርዲዛዴ ኣቲን ዎጋ ናጊዛዴ ጊዳካ።

¹²ዎጋ ዎꬂዳዴይኔ ፒርዲዛዴይ ኢሳዴ ፃላላ። ኢዚካ ꬋይሳናሲኔ ኣሻናስ ዳንዳዪዛዴ። ጊዶ ኣቲን ኔኒ ኔ ላጌ ቦላ ፒርዲዛዴይ ኦኔ?

¹³“ኢንቴ ሃቺ ዎይኮ ዎንቶ ሃኖ ሃ ካታማዮ ዎይኮ ሂኖ ሄ ካታማዮ ኑ ባና፤ ቢዲ ሄን ኢዚን ኢሲ ላይꬅ ኡታናኔ ዛልዒ ዎꬊሳና” ጊዛይቶ! ኣኔ ሃ ሲዪቴ።

¹⁴ዎንቶ ሃናናይሳ ኢንቴ ኤሬኬታ። ኢንቴ ሼምፖይ ኢዛ ኣዜ? ኢንቴ ጉꬃ ዎዴ ኣይፌን ቤቲዲ ꬋዪዛ ሃꬃ ፔንታ ማላ።

¹⁵ሃይሳ ጋናፔ “ጎዳ ሼኔ ጊዲኮኔ ኑ ፓፃ ዲኮ ሄሳካ ሃይሳካ ኦꬃና” ጋናስ ኢንቴስ ቤሴስ።

¹⁶ሃዒ ጊዲኮ ኢንቴ ኦቶሬቴꬃን ጬቄቴታ። ሄሳ ማላ ኦቶሬቴꬂ ዉሪካ ኢታ።

¹⁷ሄሳ ጊሽ ሎዖ ጊዲዛይሳ ኦꬃናስ ቤሲዛይሳ ኤሪሼ ኦꬆንታዴስ ናጋራ ጊዳና።