1Walytja tjuṯa, wangka ngaatjanyaya kulila! Wiya kutjupa tjuṯanyurra yunytjurrinyjaku, ingkaṯa nintilpayi nyinakitja. Palya ingkaṯa tjuṯa nyinanyi Katutjaku wangka nintilpayi, ngayuluṯarra. Nganaṉa tjukarurrungku tjanala Katutjaku wangka nintintjaku. Katutjaku wangkawana tjukarurru nintintjawiyangka Katutjalu nintilpayi palunya tjuṯa kuutawutjungka ngula ngaratjunkula kuru watjalku, yaṉangu tjuṯangka wiyawanangku nintiṉutjangka.
2Nganaṉa yuwankarra tjaa parrpaṯu parrpaṯungku wiyawana watjalpayi ingkaṯa tjuṯangkuṯarrala, wiya nganaṉa kututja kulira purinytjungku watjalpayi. Tjinguru yaṉangu nintilpayi kutjungku tjukarurru kutu watjalku, paluru wiya walytjangku kulira watjalku. Yuwa, nintilpayi tjukarurru paluru nyinaku.
3Nganaṉa naanytja kulintjaku. Naanytja yaṉṯayaṉṯara kanyilpayingku yayina wiima tjaangka tjarrpatjunkupayi. Yalatji tjarrpatjunkula rayinytjatjarrangku taaṉamilalpayi. Rayinytja witira katinyingka naanytja taaṉarriyinkupayi.
4Nganaṉa puutaṯarra kulintjaku. Puuta tiṉangka ngaṉṯitjayiṯi yurungka unngu pukutju wiima ngarapayi. Puutaku mayutjungku pukutju wiima palunya pirrtjitjingara puuta tiṉa taaṉamilarinkupayi, waḻpa tiṉangku puuta yuṉṯura wantirriyantjala.
5Yayina wiima palunya, pukutju wiima palunyaṯarra tjaa nguwanpa, wiima tjuṯa. Tjaangku yaṉangu kutjupa tjuṯa watjara kuyalpayi ngunytjinytjungku, waru kampanytja nguwanpa. Tili wiima kampanytjala, waḻpangku rungkara tili tiṉaṉi. Palulanguru tjanpi tilirringkula waru tiṉarringkupayilpi.
6Yuwa tjaa wiima ngaranyi. Yaṉangungku tjaangku ngunytji watjara yaṉangu kutjupa tjuṯa panypurangkupayi. Mamuku mayutjungku yaṉangu tjingapunganyi tjaangku yaṉangu kutjupa panypurangkula warrkintjaku. Palulanguru yaṉangu tjuṯa kutu kalyparrinytjawiya nyinamalpa.
7Katutjalu nganaṉanya puṯu ngulytjulpayi tjukarurru nyinanytjaku, kanya yaṉangungku tjananya tjikipaka tjuṯa palya ngulytjulpayi palya nyinanytjaku. Yaṉangungku naanytja, kamula, tjuḻpu, iṉṯurrkulyuṯarra palya ngulytjulpayi, kanya Katutjalu nganaṉanya puṯu nintilpayi tjaangku yaṉangu kutjupa panypurangkuwiyangku wantinytjaku. Yuwa, nganaṉanya Katutjalu puṯulanya tjukarurrulpayi, tjukarurru nyinanytjaku.
9Tjaangku nganaṉa Katutjanya waḻkura yaṉangu kutjupa panypurangkupayi. Katutjalu nganaṉanya yaṉangu uwankarra palyaṉu, nganaṉa palumpa walytja tjuṯa nyinanyi. Nganaṉa wiya palumpa walytja kutjupa panypurangkunytjaku.
11Karrutjanu kutju kapi palya ngarripayi, kanya kapi kutjupa puutjanu paṉṯutjarra ngarrinyi. Karrutjanu kapi palya nguwanpa nganaṉa palya Katutjaku nyinarra palya wangkanytjaku, yaṉangu kutjupa panypurangkunytjawiya. Kapi kuya puutjanu nguwanpa wiya nganaṉa panypurangkupayi nguwanpa nyinanytjaku. Watiya palyangka mangarri palya ngarapayi. Watiya kuya piḻṯirringutjangka mangarri kuya ngarapayi. Nganaṉa mangarri palya nguwanpa palya nyinarra palya wangkanytjaku yaṉangu kutjupa panypurangkunytjawiya. Wiya nganaṉa mangarri kuya nguwanpa nyinanytjaku.
13Tjaampalanyurra yunytjurringanyi nintilpayi nyinakitja. Yalatji nyurrangarri tjukarurru nyinanytjaku. Purinytjunyurra kulira waarrkana nguwanpa nyinanytjaku, yaṉangu tjuṯaku mayutjurrinytjawiya.
14Nintilpayi yaṉangu kutjupaku yunytjuwiya nyinarra wiya paluru walytjangku puḻkapungkunytjakungku, “Ngayulu yaṉangu uwankarraku palya nyinanyi, Katutjakuṯarra.” Nintilpayi paluru yaṉangu tjuṯa yungkuwiyangku wiya yalatji ngunytji watjantjaku, “Ngayulu yaṉangu yuwankarra yungkupayi, Katutjakuṯarra tjukarurruṉa nyinanyi.”
15Yalatji nguwanpa wiyanyurra ngunytjinytjunkunytjaku, alatjiku Katutjanya wiya nyurrangarrimpa yunyparringanyi, ngunytjinytju tjuṯaku. Mamuku mayutjungku nganaṉanya nintiṉi yalatji ngunytjinytjunkunytjaku.
16Yaṉangu kutjupaku yunytjuwiya nyinarra mulyarrarringkula pikangku pungkuku. Yaṉangu kutjupa paluru walytja tjuṯa yungkunytjawiyangka palumparaya pikarringkulpi. Nganaṉa wiya yalatji nguwanpa nyinanytjaku.
17Nganaṉa Katutjaku wangkawana nyinanytjaku. Nganaṉa palumpa wangka kulira yalatji palya nyinaku. Yaṉangu yuwankarraku nganaṉa yunytju nyinanytjaku, pikawiya. Nganaṉa walytja tjuṯaku yunytjurringkula kaangkinytjingku yungkunytjaku. Aḻṯurunytju nganaṉa tjanampa nyinanytjaku, ngunytji watjantjawiya.
18Yaṉangu yalatji nguwanpa nyinarra tjikipaka tjuṯa pika wangkanytjala paluru tjananya purinypangku marrkulku, pika wantirra palyaya nyinanytjaku. Marrkulpayi palunya kutjupa tjuṯangku nyakula tjanalpiya yunypa nyinaku. Palunya nguwanpa paluru tjana palyalpi nyinaku, pikawiya.
