Jeims 3

1

2

3

4

5

¹Wal main braja en sista olabat, yumob jinggabat detlot titja hu oldei titjimbat God wed langa ola pipul. God garra jadjim detlot titja brabli strongbalawei, en blanga tharran na oni sambala pipul garra jidan titja. Ebribodi oldei meigim misteik. If wi nomo tok eni nogudbala ting wi gin hendulum miselp brabli gudbalawei.

³Wal yumob jinggabat na. Wen yumob pudum bit langa hos mawus, yumob gin meigim im duwit en go eniwei yumob wandim.

⁴En im lagijat gin langa bigwan bout. Wen det strongwan win blowim det bout eniwei, det boutmen gin tenimran det bout garram det lilwan rada, en det bout im ran weya det boutmen wandim im blanga go.

⁵En lagijat du langa wi tang. Nomeda det tang im lilwan ting langa wi bodi, bat stil im gin tok olkain gudbala en nogudbala ting. Yumob jinggabat na. Det tang im jis laiga lilwan faiya. Nomeda det faiya im lilwan, bat stil im gin barnimap bigwan bush kantri.

⁶En lagijat du det tang im jis laiga lilwan faiya insaid langa yumob bodi, en det faiya im kamat brom det helfaiya, en im spredimat ola nogudbala ting ebriweya insaid langa yumob, en im meigim yumob laif nogud.

⁷Wal pipul gin hendulum olkain wailwan enimul. Dei gin hendulum ola fish en bard en sneik.

⁸Bat dei kaan hendulum olabat tang. Det tang im nogud jis laik im garram strongwan poisin, en nobodi kaan hendulum im.

⁹Wi yusum det tang blanga gibit theingks langa God det Bos blanga wi en det dedi blanga wi. En wi yusum det tang blanga sweya en mokimbat wi braja en sista olabat du. Garram det seimwan mawus wi gibit theingks en wi sweyasweyabat. Wal tharran im nogud, en wi nomo wandi dum lagijat, dumaji God bin meigim wi holot laik im.

¹¹Wal main braja en sista olabat, yumob jinggabat na. Freshwoda en solti woda nomo kamat mijamet brom wanbala spring, dumaji det spring weya garram solti woda kaan meigim kamat switwan woda. En im seimwei lagijat du garram ola daga weya kamat brom tri. Det olibtri daga kaan kamat brom det figtri, en det greiptri kaan abum det figtri daga.

¹³Wal yumob jinggabat na. If enibodi reken im klebabala en sabi det wei blanga God, wal im garra dumbat det raitwan ekshan blanga shoum ola pipul. Lagijat na im garra shoum olabat. Im garra jidan brabli gudbalawei.

¹⁴En if im reken im klebabala, bat insaid langa im hat im jelas o maitbi im abum nogudwan filing o maitbi im gridiwan, wal im nomo klebabala. Im kaan tok praudbalawei.

¹⁵Im kaan dalimbat laiya im klebabala, dumaji detkainwei nomo kaman brom hebin. Detkainwei kamat brom dijan kantri. Im meigimapbat im ronwan stori, en im brom det dibuldibul na.

¹⁶En if im jelas en gridi, wal im bulurrum im ronwei, en im dumbat olkain nogudbala ting.

¹⁷Wal nomo enijing rong langa det klebabalawei brom hebin, en detlot pipul hu bulurrum det klebabalawei brom hebin kaan meigimbat eni trabul, dumaji dei garra kain langa enibodi, en dei garra laigim olabat, en dei garra fil sori blanga olabat, en dei garra dumbat gudbala ting blanga olabat du. Dei kaan toktok dubalawei en kadimatbat pipul jis fo najing.

¹⁸Bat det men hu oldei kadimatbat pipul wen dei agamin en faidabat, tharran im jis laik im plentimbat sid, en afta det sid im gro, en det gudwan daga im kamat na. Lagijat na wen det men albumbat enibodi, ola gudbala ting garra kamat brom im.