ያዪቆባ ኪታ 3

1

2

3

4

5

¹ታናዳን ፆሳ ካሊያዋንቶ፥ ኑኒ ሃራቱዋፔ ኣꬊያ ፒርዳ ኣካናዋ ሂንቴ ኤሪያ ዲራው፥ ሂንቴፔ ጮራቱ ታማሪሲያዋንታ ጊዶፒቴ።

²ኑኒ ኡባዪካ ዳሮባን ባሌቶ፤ ኢቲ ኡራይ ባሬ ሃሳያን ሙሌካ ባላና ꬋዮፔ፥ ኢ ባሬና ናጋናው ዳንዳዪያ ባሊ ባዪና ኣሳ።

³ፓራቱ ኑሲ ኣዛዜታና ማላ፥ ቢፃላ ባርሲዴ፥ ኑኒ ኮዪያሳ ኡባ ኡንቱንታ ኣፌቶ።

⁴ቤዒቴ፥ ማርካቤቱካ ቃሲ ሄዋ ኬና ዎልቃማ ጊዲዴ፥ ጎቱዋ ጫርኩዋን ላጌቶፔካ፥ ኡንቱንታ ላጊያዌ ባሬዋ ኮዪያሳ ዛሪዴ ላጊያ ቄሪ ጉꬃ ሚꬃን ላጌቲዴ ቢኖ።

⁵ሄዋዳን ኢንፃርሳይ ቦላ ጊዶን ጉꬃ ኣሳቴꬃ ጊዶፔካ፥ ዳሮ ዎልቃማባን ጬቄቴ። ጉꬃ ታማይ ዋኒዴ ዎልቃማ ዎራ ጉዲ! ኣኬኪቴ።

⁶ኢንፃርሳይካ ታማ ማላ። ኢ ኑ ኣሳቴꬃ ጊዶን ኢታባ ኡባ ኦꬃና ዳንዳዬ፤ ኣሳቴꬃ ኡባ ቱኒሴ። ቃሲ ኑ ዴዑዋ ዎꬃካ ታማን ጉዴ፤ ጋናሚያ ታማን ኢ ጉዴታናዋ።

⁷ኣዪሲ ጎፔ፥ ዶዓቱዋ፥ ካፋቱዋ ዛሪያ፥ ቲራን ጎሼቲያ ሾሻቱ ዛሪያኔ ኣባን ዴዒያ ሜꬌታቱዋ ዛሪያ ኡባ ኣሳይ ኣዲሴዳ፤ ቃሲ ኡንቱንቱካ ኣዴዲኖ።

⁸ሺን ኦኒኔ ኢንፃርሳ ኣዲሳናው ዳንዳዪቤና፤ ኢንፃርሳይ ዎꬊያ ማርዚ ኩሜዳ ጮዑ ጌና ኢታ ሜꬌታ።

⁹ኑኒ ኢንፃርሳን ኑ ጎዳኔ ኣዉዋ ጋላቴቶ፤ ቃሲ ኣኒካ ፆሳ ማላቲዴ ሜꬌቴዳ ኣሳ ሼቄቶ።

¹⁰ኢቲ ዶናፔ ጋላታይኔ ሼቃይ ኬሴ። ታናዳን ፆሳ ካሊያዋንቶ፥ ሄዌ ሄዋዳን ሃናናው ቤሴና።

¹¹ፑልቱ ኢቲ ኦላፔ ማልዒያ ሃꬃኔ ጫሚያ ሃꬃ ፑልታናው ዳንዳዪ?

¹²ታናዳን ፆሳ ካሊያዋንቶ፥ ባላሲያ ጊያ ሚꬃይ ዎጋራ ኣዪፋናው ዳንዳዪ? ዎይ ዎዪኒያ ቱራይ ባላሲያ ጊያ ሚꬃ ኣዪፋናው ዳንዳዪ? ማፂኔ ማፂኔ ጊያ ሃꬃፔካ ማልዖ ሃꬃይ ኬሳና ዳንዳዬና።

¹³ሂንቴ ጊዶን ኣꬌዳ ኤራንቻዪኔ ኣኬካንቻይ ኦኔ? ባሬ ሎዖ ዴዑዋን ኦሴቴዳ ባሬ ኦሱዋ ኣꬌዳ ኤራቴꬃፔ ዪያ ኣሺኬቴꬃን ቤሶ።

¹⁴ሺን ሂንቴ ዎዛናን ጫሚያ ቃናቲኔ ዪርጊ ዴዖፖ። ቃሲ ቱማቴꬃ ቦላካ ዎርዶቶፒቴኔ ኦቶሬቶፒቴ።

¹⁵ሄዋ ማላ ኣꬌዳ ኤራቴꬃይ ሳሉዋፔ ዎꬊያዋ ጊዴና፤ ሺን ሄዌ ሳዓባ፥ ኣሳዋ፥ ፃላሃቱዋዋ።

¹⁶ኣዪሲ ጎፔ፥ ቃናቲኔ ዪርጊ ዴዒያሳን ዋላሳዪኔ ኢታ ኦሶ ኡባይ ዴዔ።

¹⁷ሺን ቦላፔ ዪያ ኣꬌዳ ኤራቴꬃይ ኡባፔ ካሴ ጌሻ። ቃሲ ሳሮቴꬃ ዶሲያዋ፥ ኣሺኬኔ ኤኖ ጊያዋ፤ ቃሲ ማሮቴꬃይኔ ሎዖ ኣይፊ ኩሜዳዋ። ሲꬊኔ ሎዖ ማላቲያ ኢታቴꬃይ ባዪናዋ።

¹⁸ፂሎቴꬃ ኣይፊ ሳሮቴꬃ ኦꬂያዋንቱ ሳሮቴꬃን ዜሬዳ ዜሬꬃፔ ቤቴዳ።