ያቆቤ 2

1

2

3

4

5

¹ታ ኢሻቶ! ኢንቴ ቦንቼቲዳ ጎዳ ዬሱስ ኪርስቶሳ ኣማኒዛይታ ጊዲዳ ማላ ኣሴ ቤሶንታ ኦጌራ ማዶፍቴ።

²ዎርቃ ዪች ቢራꬌን ኣꬂዲ ሎዖ ማይዖ ማይዒዳ ኣሲ ኢንቴ ሺቂዛሶ ዪኮ ሄሳꬆካ ቂታ ማይዖ ማይዒዳዴይ ሄ ሺቂዛሶ ዪኮ ቃሴካ ሃራ ቂታ ማይዖ ማይዒዳ ማንቆ ኣሲ ጌሊኮ ሎዖ ማይዒዳይሳ ዱማ ቦንቾ ቦንቺዲ “ኔስ ቤሲዛ ሎዖ ኡቲዛሶ ሄሳ ቤያ” ጊዲ ሃንኮ ማንቆዛ ቃሴ “ኔ ሄን ሄሳን ኤቃ፤ ዎይኮ ሃ ያ፥ ታ ጋርሳን ዉጌን ኡታ” ኢንቴ ጊኮ፥

⁴ኢንቴ ኢንቴ ጊዶን ቤሶንታ ማዶ ኦꬄታ ጊዴኬቲ? ቃሴካ ኢንቴ ኢታ ቆፋን ኦይኬቲዳ ኢታ ፒርዳ ፒርዲዛይታ ጊዴኬቲ?

⁵ታ ሲቆ ኢሻቶ! ኣኔ ሲዪቴ፤ ኢስቲ ኣማኖን ዱሬታ ጊዳና ማላ ፆሲ ባና ዶሲዛይታስ ሂዶታ ኢስታስ ኢሚዳ ካዎቴꬃ ኢስቲ ላታና ማላ ሃይሳ ሃ ኣላሜዛን ዲዛ ማንቆታ ዶሪቤኔ?

⁶ኢንቴ ቃሴ ማንቆታ ካዉሼታ። ኢንቴና ዋይሲዛይ ዱሬታ ጊዴቴኔ? ኢንቴና ፒርዳሶ ጎቺዛይ ኢስታ ጊዴቴኔ?

⁷ኢንቴናን ፄይጌቲዳ ቦንቾ ፆሳ ሱንꬃ ዚጊርዛይቲ ኢስታ ጊዴቴኔ?

⁸ማፃፋን “ኔ ላጌ ኔ ሁዔ ማላ ሲቃ” ጌቴቲ ፃፌቲዳ ካዎ ዎጋ ኢንቴ ፖሊኮ ሎዖ ኦꬄታ።

⁹ኢንቴ ቤሶንታ ማዶ ማዲኮ ናጋራ ኦꬄታ። ዎጋ ሲንꬃንካ ኢንቴ ዎጋ ዬꬊዳዴ ጊዲ ቆዴታና።

¹⁰ጋሶይካ ዎጋ ዉርሲ ፖሊዛዴይ ቃሴካ ዎጋፔ ኢሲኔዪን ꬉጴቲዛ ኣሲ ዉርሲካ ሞሪዳዴ ማላ ቆዴቴስ።

¹¹“ላይማቶፓ” ጊዳዴይ ኢዚካ ዛሪዲ “ዎꬎፓ” ጊዴስ። ኔ ላይማቶንታ ኣጊኮካ ኔ ኣሳ ዎꬊኮ ዎጋፔ ኣꬊዳዴ ጊዳሳ።

¹²ኢንቴ ሃሳያ ሃሳዪሼ ዎይኮ ኢሲ ሚሽ ኦꬂሼ ኢንቴና ፂሊሲዛ ኣሳ ማላ ጊዲቴ።

¹³ጋሶይካ ማሮንታይ ዉሪካ ማሮይ ባይንዳ ፒርዴታና። ማሮይ ፒርዳ ፆኔስ።

¹⁴ታ ኢሻቶ! ኢሲ ኣሲ ታስ ኣማኖይ ዴስ ጊኮ ቃሴ ኦሶን ቤሶንታዴ ጊዲኮ ኢዛ ኣይ ማዳኔ? ሄሳ ማላ ኣማኖይ ኢዛ ኣሻኔ?

¹⁵ኣኔ ቆፒቴ፥ ኢሲ ኢሻይ ዎይኮ ኢሲ ሚቺያ ማይዖይ ዎይኮ ሚዛይሲ ባይንዳ ኣጊኮ ኢንቴፌ ኢሳዴይ “ኢንቴ ሳሮን ቢቴ! ኢንቴና ሜጎፎ! ካሊቴ!” ጊኮ ኢስታ ኣሾስ ኮሺዛይሳ ኢሞንታ ኣጊኮ ኣይ ማዳኔ?

¹⁷ሄሳꬆካ ኦሶይ ባይንዳ ኣማኖይካ ባስ ሃይቂዳይሳ።

¹⁸ጊዶ ኣቲን ኢሳዴይ “ታስ ኦሶይ ዴስ ኔስ ኣማኖይ ዴስ። ኔኒ ኔ ኣማኖ ኦሶፔ ሻካዳ ታና ቤሳ፤ ታ ቃሴ ታ ኣማኖ ኦሶን ኔና ቤሳና” ጊኮ፥

¹⁹ኔ “ኢሲ ፆሲ ዲዛይሳ ኣማናሳ” ሄሲካ ሎዖ፤ ዳይዳንꬃቲካ ሄሳ ማላ ኣማኔቴሲኔ ኬሂ ኮኮሬቴስ።

²⁰ኔኖ ኤያዞ! ኦሶይ ባይንዳ ኣማኖስ ጎዓይ ባይንዳይሳ ኤራናስ ማርካ ኮያይ?

²¹ኑ ኣዋ ኣብራሃሜይ ባ ና ዪሳቃ ያርሺዛሶዛ ቦላ ሺሺዳ ዎዴ ኦሶን ፂሊቤኔ?

²²ሄሳን ኣማኖዛ ኦሶራ ጋꬂ ኦꬂዛይሳ ኔ ቤያሳ፤ ኣማኖይካ ኦሶን ፖሌቲዴስ።

²³“ኣብራሃሜይ ፆሴ ኣማኒዴስ፤ ሄ ኣማኖይ ኢዛስ ፂሎቴꬃን ቆዴቲዴስ” ጊዛ ማፃፋ ቃላይ ፖሌቲዴስ፤ ኢዚካ ፆሲ ዶሲዳዴ ጌቴቲዴስ።

²⁴ሄሳ ጊሽ ኣሲ ኣማኖን ፃላላ ጊዶንታ ኦሶንካ ፂሊዛይሳ ኢንቴ ቤዬታ።

²⁵ሄሳꬆካ ላይማን ዲዛ ኤራዓባ ኪቴቲ ቢዳ ኣሳታ ሞካ ኤካዳ ሃራ ኦጌራ ሞዪዛ ዬዲዳ ጊሽ ባ ኦሶን ፂላቤይኬ?

²⁶ሼምፖፌ ሻኬቲዳ ኣሾይ ሃይቄꬅ ጊዲዳ ማላ ኦሶፔካ ሻኬቲዳ ኣማኖይ ሃይቄꬃ።