1Aha nadu tine mwan ma badih, aha mari sasahan ndramak ta bwena ta leheya iri mwan ma badih ta kandriyen Kindrei aso-ok. Tasah, udu bolo len ta Kindrei aleben kandriyen tiri mwan ma badih mari, iy ale kameh seleya amwenen labai iri gok tataha lau nane ta areu bwena ta leheya iri mwan ma badih mari.
2Na len ari, ari taha badeh, abudon ta amekes kandriyen ndra-in, ma taha atalei. Arile, kandriyen doh badeh, asahan tataha mari. Buku ari mwan o badih basehek rayah sahou ndra-in bwe, iy badeh, lau mwasin handru, ya iy winiyan tondrokei badan ma kandriyen tan mara-ei.
3Taha badeh, adeu hayen ranah i tondreh in boho hos, ta amekes iy ki-in hamon ta budon tataha ta adek. Taha badeh, atondrok boho iri, ya ta kandriyen doh le badeh, taha atondrok bada hos doh mara-ei ta iy in hamon le ta budon tataha.
4Aha kabudon ale ta ndron lahek tinan atas bolo ndras. Ndron laba tinan, ya jor laba tinan atohou badeh, tubuluhi iy amai iu ili bolo ndras. Ya kulik tan badeh bos nadu bwisik labai. Arile, buku ndramak ta ateu kulik anya kili adai o sam, iy badeh, awoha le ili loboho heh iy anya ndron katas kili aliy.
5Idoh i buku kalime taha, iy badeh lakou ari nadu bwisik badu bada taha, arile iy badeh, nyaladan labai ta amekes lakou mara-ei andra-i, ma ta atudun iy ale. Taha tanan, buku nadu katala jih sese le badeh, winiyan sulumwi lokei ma buruwen andrakak ano iu.
6Kalime taha badeh i buku jih, iy nadu bwisik ereu bolo boho taha. Arile, iy badeh, ta amekes kandriyen ndra-in solo-an asahan tataha, ya iy badeh, winiyan tubuni bada taha mara-ei amekes kandriyen ndra-in labai, i buku jih nyarahan ta asun iri lakou. Jih doh badeh, buku le jih ta Kindrei, winiyan bamak bwe, ta asun lau na len hamon.
7Ya, iri mwan ma badih badeh, andrei ma nyohonei iri lakou mari badu munyak dah, buku iri bwisir badu lokei, iri sirih, mwak, hawe iri lakou badu bolo ndras. Eme ma iri tondrokei iri lakou mari doh, ma mesekei iri anuhun sahou, ma a-en hamon ta budon tiri.
8Arile, are mwan o badih iy badeh, winiyan batondrokei bohon amwenen bwe. Len mara-ei boho taha badeh akeh sahou ndra-in solo-an labai, ma sahou doh badeh, i buku le lakou ndra-in nyakadan ta adai lau amak. Lakou doh badeh, idih udu boho taha.
9Taha atudun ma adeu wurah i ta Laban hawe tama taha Kindrei badeh, na boho taha. Ma na boho taha le amwenen badeh, taha aten iri lau. Taha amekes kandriyen ndra-in buku doh, arile Kindrei badeh, mesekei kone taha mari asahan i buku le iy amwenen.
10Sahou ta atudun nyara Kindrei ma aten badeh, udu boho taha amwenen eme len. Aha nadu tine mwan ma badih, kandriyen doh ndra-in mara-ei, taha samekes.
11Aha kabudon kamwenen. Gwa lakon hawe gwa ndras, uru winiyan ado mada munu kaloh ari le ame len, deh bwe?
12Bwe, gwa lakon hawe gwa ndras, uru mala-uh winiyan bado munu lek ari le ame len bwe. Ya, aha nadu tine mwan ma badih, jo anya kandremenya aha, kei ra-ei iri aloh pik, winiya ato-ou olip deh? Bwe.
13Buku rayah mwan o badih areu ndrokowa aha, budon ma tanan mwasin udu tiri, ya tekedek tiri badeh kasahan mwasin, ma iri winiyan bamekes lakou laleyah ma batudun nyara iri bwe. Ma iri mwan ma badih rayah ja kameh winiyan anyolom kandriyen mwasin iri amekes.
14Arile, buku aha abudon ta totowa budon ndra-in taha ili tiri mwan ma badih rayah ja, ya len mara-ei aha abo gok ta a-en hamon ta san ndra-in ta atudun nyara aha amwenen ta udu bwele-e iri rayah ja, aha ta wendreya ma kandriyen taha badeh, bokoro-ei sahou handru ta Laban. Aha samekes kandriyen doh ndri-iy.
15Iri budon hawe tanan doh badeh, bado kandrah bame andri bwe. Iri lakou doh badeh, badu kon munyak le amwenen. Iri asahan ta ndrine taha ndra-in bwena, ma balik in bwena ta aliy.
16Aha kanuhun! Are lau ale ta lomondra ndra-in ma ta ndrakok udu tiri, iri lau doh badeh, ta amekes lakou laleyah ma ta amekes kandriyen ndra-in.
17Arile, iri tanan ma lakou mara-ei mwasin taha akohok badeh, udu kandrah eme leheya taha kamekes kandriyen mwasin ki buku doh: Taha kasahan ha-un, ma taha kamekes mwasin ki ta nadu tine taha iri rayah ja, taha kanuhun sahou tiri mwan ma badih rayah ja, taha katikisiy lau rayah ja, taha kamekes mwasin ki tiri, ma taha badeh, sawasai.
18Iri mwan ma badih aso-ok labai ta ado hawe iri lau rayah ja badeh, iri doh badeh, ka-en hamon ta kandriyen mwasin labai, ma idoh ale, aseben ndrine iri lau rayah ja udu le udu. Buku taha amekes iri kandriyen i buku doh, idoh i buku ndramak atah buwa kei ili bolo bilin tan; udu hamon ja badeh, ato-ou salin solo-an ma asahan mwasin mara-ei.
