Iamesi 3

1

2

3

4

5

¹Omi tabu tauheatamiu au hegamagaridi, egu tataoyao e, ta nuatui ita mo ada giru abo i porohe ariri.

²Abaponori se gamagari, arinai, gamagarida ta ponori. Ena tau esau nige begana ena riba esau eai i ponori, ia tau lolo‐dumadumana ede, tauna maudoina abina i ata i tanuagaei hinage.

³Hosi aba‐woeaidi awadi eai se heapudi wa, ta toredi bena se awaabieda, arinai taudi maudoidi ta hesinibuidi.

⁴Waga hinage, hage au itadi; headi se lalai ariri, mana wowori adiadidiri eai se boboeo, ia mo eaisi kiukiuna eai taba se hetaiiridi haedi tau‐eaisi iabom ena henuhenu eai.

⁵Hinage doha, memena, eau‐kiukiuna, ia mo ginauri lailaidi gonoana i ribapasipasiedi. Au ita, oeagi tai se lalai ginaha gagiridi aridi eai se healasidi!

⁶Memena ede oeagi alaalasina. Tanoubu esau, baabaaeana meta, eauda boeadi eai i paipaisoa, iaede memena. Tanoubu maudoina taba i hebii, eo eda mauri edana eai i taitaiiri, maudoina taba i healasi‐ohi, i lau e Gehena eai se gabu.

⁷Paana suisui hari ao udoi udoi, eo manu, eo ginauri neneneneusidi, eo gabogabo ginauridi taba se hemanasadi, hinage tatao se hemanasadio,

⁸na memena mo nige tau esau abina i ata i hemanasa — hemahemanabarana, hemahemate ailewana i monau.

⁹Arinai Guiauna, Tamada ta hedebasaei, arinai hinage tau, Eaubada ana ao eai se hetubu, ta ribahemate.

¹⁰Awa esegana eai riba‐hewoiwoina eo riba‐hemahemate se laolaoma. Egu tataoyao e, teina doha nige i lolo.

¹¹Abo ipu esegana eai goila lolona eo goila telatelana se bunubunuwasima?

¹²Kuhou oeagina eai abo olive se ua, e vine daodaona eai abo kuhou se ua? Hinage taba nige goila ariarita eai goila‐nomnom i leama.

¹³Eai boeamiu eai i sibasiba, tauitaitalobai? Ena miamia lolona eai taba ena paipaisoa i hemasarahadi, sonoga nuatudobidobiuioina eai.

¹⁴Na ena nuaboeamiu eai aiaromagigiri kalapina ie ota, eo haisaesae, tabu au ribapasipasi, tabu mamohoina au borai.

¹⁵Sonoga doha ina nige ewa eai i dobima, i awa‐tanoubu mo, earua enana nige’e, diabolo enana ede.

¹⁶Haedi eai aiaromagigiri eo haisaesae, temetai nuaponopono eo paipaisoa baaeadi.

¹⁷Na sonoga wa ewa eai i dobima, iaede ie aa, i helahelabini, i manabiga, riba abo i ataiedi, nuatoatoa i monau eo uaua lolodi, taba nige i nualabulabui, eo ana ao i masaraha.

¹⁸Eo laulau‐dudurai masurina, ede loni eai se umai, isi taulaulaubiri nimadi eai.