Text copied!
CopyCompare
Buka Helaga - DEUTERONOMI

DEUTERONOMI 2

Help us?
Click on verse(s) to share them!
1Mose ma ia gwau, “Unai murinai ita giroa lao, tano kaukau dekenai ita loaloa, Davara Kakakaka ena kahana dekenai, Lohiabada ese lau ia oda henia hegeregerena. Ita be nega daudau Seiri ena ororo gabudia dekenai ita raka loaloa.
2“Vadaeni Lohiabada ese lau ia hamaoroa, ia gwau:
3Inai ororo dekenai umui loaloa daudau vadaeni, harihari mirigini kahana dekenai do umui lao.
4Bona Israela taudia do oi hamaoroa, oi gwau, ‘Harihari umui be emui varavara, Esau ena tubuna taudia edia tano dekenai do umui raka hanaia, idia be Seiri dekenai idia noho. Idia ese umui dekenai do idia gari. Unai dainai do umui naria namonamo,
5tuari idia dekenai do umui hamatamaia lasi, badina be idia edia tano sisinasisina umui dekenai do lau henia lasi, emui aena palapala tamona umui moia ena tano ena bada danu do lau henia lasi, badina Seiri Ororo be Esau dekenai lau henia, iena tano.
6“ ‘Esau besena taudia dekena amo do umui ania aniani do umui hoia, siliva moni davana, bona idia dekena amo danu do umui inua ranu do umui hoia, siliva moni davana.’
7“Badina be Lohiabada emui Dirava ese umui ia hanamoa vadaeni. Unai dainai emui gaukara ibounai ena anina ia vara namonamo. Bona Lohiabada ese inai taunimanima noho lasi tanona umui loaloa lalonai ia ese umui ia naria namonamo vadaeni. Io, inai lagani 40 lalonai Lohiabada emui Dirava ese umui ia naria vadaeni, emui aniani bona gau ibounai ia henia.
8“Unai dainai ita raka lao, iseda varavara taudia, Esau ena bese taudia, Seiri dekenai idia noho, ita rakatania. Elata bona Esiono Gebere dekena amo ia mai dala ladana Araba danu ita rakatania, bona mirigini kahana dekenai ita giroa lao, Moaba ena tano kaukau dalana dekenai.
9“Vadaeni Lohiabada ese lau dekenai ia oda, ia gwau, ‘Moaba taudia, Lota ena bese, do umui dagedage henia lasi, bona do umui tuari henidia lasi, badina be edia tano sisina umui dekenai do lau henia lasi. Lau ese Ara hanua badana, mai ena tano ibounai, Lota ena bese taudia dekenai lau henia, edia tano.’ ”
10Gunaguna Emima bese goadana be Ara hanua dekenai idia noho, idia be taunimanima latadia, Anakima taudia bamona, bona idia be momo herea.
11Haida ese Emima taudia edia ladana idia atoa Repaima, Anakima taudia edia ladana idia atoa hegeregerena, to Moaba taudia ese edia ladana idia atoa, Emima.
12Hori taudia danu gunaguna Seiri dekenai idia noho, to Esau ena bese taudia ese Hori taudia idia lulua, bona idia hadikaia ore, bona edia tano idia abia, Israela taudia be Lohiabada ese ia henidia tano idia abia dalana hegeregerena.
13Mose ma ia haroro, ia gwau, “Ma Lohiabada ese ita ia hamaoroa Serede Sinavai do ita hanaia. Unai dainai ita ese Serede Sinavai ita hanaia.
14Kadesi Baranea ita rakatania ela bona Serede Sinavai ita hanaia, be lagani ibounai 38. Unai lagani 38 edia lalonai unai uru ena Israela tuari taudia ibounai idia mase ore, Lohiabada ese ia hereva hegeregerena.
15Badina be Lohiabada ese ia dagedage henidia noho, idia ia hadikaia noho, ela bona idia mase ore.
16“Inai Israela tuari taudia ibounai idia mase ore murinai,
17Lohiabada ese lau dekenai ia hereva, ia gwau:
18Hari dina Moaba ena tano hetoana do umui hanaia, Ara dekenai.

19Bona Amono besena edia tano hetoana do umui raka kahirakahira neganai do umui dagedage henidia lasi, bona tuari henidia lasi. Amono besena edia tano sisina umui dekenai do lau henia lasi, badina unai tano be Lota ena besena taudia dekenai lau henia, edia tano.”
20Unai tano ena ladana ta be Repaima, badina gunaguna Repaima taudia be unuseni idia noho. To Amono taudia ese edia ladana idia atoa, Samusumima.
21Inai Samusumima taudia be taunimanima badadia, bona momo herea, edia lata be Anakima taudia edia lata hegeregerena. To Lohiabada ese idia ia hadikaia ore, vadaeni Amono taudia ese edia noho gabudia idia abia, bona edia tano idia abia.
22Lohiabada ese unai bamona danu ia karaia Seiri dekenai Esau bese taudia totona. Ia ese Hori taudia ia hadikaia ore, vadaeni Esau bese taudia ese edia tano idia abia, bona unuseni idia noho ia mai bona hari.
23Avima besena danu be unai bamona. Idia be kone kahana hanua maragidia dekenai idia noho ela bona Gasa. To Kerete taudia be Kerete motumotu dekena amo idia mai, Avima taudia idia alaia ore, bona edia tano idia abia.
24“Ma Lohiabada ese ita ia hamaoroa, ia gwau: Umui toreisi, do umui raka lao, Aranona Koura do umui hanaia, Sihona, Amoro tauna, Hesebona ena king, bona iena tano be emui siahu henunai lau atoa vadaeni. Do umui tuari henia, bona iena tano do umui raka vareai, do umui abia.
25Hari dina dekenai lau ese guba henunai idia noho bese ibounai dekenai gari bada do lau havaraia. Vadaeni idia ese emui sivarai do idia kamonai, bona gari dainai umui emui vairana dekenai do idia manokamanoka.”
26Ma Mose ia gwau, “Unai neganai Kedemoto tano kaukau dekena amo hesiai taudia lau siaia, king Sihona dekenai maino hereva idia gwauraia, idia gwau,
27‘Mani emu kara, oiemu tano do ai raka hanaia. Dala sibona dekenai do ai raka, dala dekena amo do ai raka siri lasi, idiba kahanai o lauri kahanai.
28Bona aniani be umui dekena amo do ai hoia, moni davana, ranu danu umui dekena amo do ai abia, moni davana. To mani ai do umui koua lasi, aena dekenai emui tano do ai raka hanaia,
29ela bona Ioridane Sinavai do ai hanaia, bona Lohiabada ese ai ia henia tano dekenai do ai ginidae. Esau ena bese taudia, Seiri dekenai idia noho, bona Moaba taudia, Ara dekenai idia noho, ese ai idia koua lasi, bona edia tano ai raka hanaia.’
30“To king Sihona, Hesebona ena king ese iseda dala ia koua, iena tano do ita hanaia lasi ia gwau. Badina be Lohiabada emui Dirava ese Sihona ena lauma ia ha-aukaia bona iena lalona ia habadua. Unai dainai ita ese ita tuari henia, bona ita halusia diba, bona iena tano, ita do noho tanona ita abia diba totona.
31“Vadaeni Lohiabada ese lau Mose dekenai ia hereva, ia gwau, ‘Oi itaia, king Sihona bona ena tano lau hamanokaia vadaeni emui vairana dekenai. Unai tano do umui abia, bona unuseni do umui noho.’
32“Sihona, mai ena tuari taudia danu be Iahasa hanua kahirakahira ita ia tuari henia.
33To Lohiabada iseda Dirava ese iseda siahu henunai Sihona ia atoa, vadaeni Sihona bona iena natuna tau, bona iena tuari taudia ibounai ita alaia mase.
34“Unai neganai danu Sihona ena hanua ibounai ita abia, ita hadikaia ore, bona edia tatau bona hahine, memero bona kekeni, ita alaia ore, ta ia heau mauri lasi.
35To ita ese tuari dekenai ita abia kohu, bona boromakau ita abia lao.
36“Aroere, Aranona Koura ena isena dekenai, bona koura ena huanai ia noho hanua dekena amo ela bona Gileada, hanua ta ia auka lasi, ibounai ita abia, badina be Lohiabada iseda Dirava ese ita ia durua dainai.

37“To ita ese Amono taudia edia tano, Iaboka Sinavai ena isena dekenai, bona ororo hanua ta kahirakahira ita lao lasi. Badina be Lohiabada iseda Dirava ese ita dekenai ia taravatua, ia gwau do ita raka vareai kava lasi.”