Yontu 89:10-45

¹⁰Nyɑ́ ŋmɑkələnɑ teŋku nɑ ɩ kɑlɑmpɑɑnɩ, n hɛɛsəɣɩ ɩ lʋm kɛ wɑɑtʋ wei pə kʋləɣənɑ pɑ́ɑ́nɑ́ tɔ.

¹¹Nyɑ́ nɑŋtənɑ Icipiti ɩsɩɩ sətʋ, nɑ ń yɑsɩ nyɑ́ kolontunɑɑ nɑ nyɑ́ niŋ toŋ.

¹²Nyɑ́ tənnɑ ɩsɔtɔnʋɣʋ nɑ tɛtʋ. Nyɑ́ sɩɩnɑ ɑntulinyɑ nɑ ɩ tɑɑ nyəm tənɑ.

¹³Nyɑ́ lɑpənɑ ilim ntɔɣɔŋ nɑ pə mpətəŋ nɑ Tɑpɔɔ nɑ Hɛɛmɔŋ pʋʋŋ sɑŋ nyɑ́ hətɛ.

¹⁴Nyɑɣɑlɛ toŋ sɔsɔɔŋ tʋ, nyɑɣɑlɛ pəsʋɣʋ sɔsɔɔŋkʋ tʋ.

¹⁵Nyɑ́ kɑwulɑɣɑ kite ntɛ́ tɑmpɑnɑ təŋʋɣʋ nɑ siɣisuɣu nɑ kʋpɑntʋ nɑ teu kɛ nyɑ́ nɔɣɔ tɔɔ.

¹⁶Yəlɑɑ mpɑ pɑ nyəmɑ́ nyɑ́ ɑkɑntəlɛ wulɑ tɔɣɔlɛ leleŋ nɩɩlɑɑ, nyɑ́ ɩsɛntɑɑ kɛ́ pɑ wɛ tɑm.

¹⁷Pɑ lɑŋlɛ hɛɛnɑ nyɑ́ hətɛ kɛ kʋtɑmsɑ, nɑ pɑ́ sɑŋ pɑ tɩ nɑ nyɑ́ siɣisuɣu.

¹⁸Pɑ toŋ teeli kɛlɛ nyɑ́, nyɑ́ kʋpɑntʋ kpɑɑsəɣənɑ tɑ́ toŋ.

¹⁹Tɑcɑɑ kɛlɛ tɑ́ kʋkentuɣu, Ɩsɛɣɛlɩ nɑŋŋ tʋ ntɛ́ tɑ́ wulɑʋ.

²⁰Kʋyɑkʋ nɑkʋlɩ n yɔɣɔtənɑ nyɑ́ kʋsɔɔlʋ kɛ toosee tɑkɑ tɑɑ sɩ n hɑ nyɑ́ toŋ kɛ ɑkɑ, nɑ ń tɔɔ ɩfepu kɛ yəlɑɑ tɑɑ.

²¹N hikɑ nyɑ́ təmlɛ tʋ Tɑfiiti, nɑ ń ləsɩ-ɩ nɑ ń pəlɩ-ɩ kɔtɑɣɑ nim.

²²N kɑ́ sənɑ-ɩ nɑ toŋ, nɑ ń pəsɩ-ɩ yʋlʋ toŋ tʋ.

²³Kolontu kɑɑ tuti-ɩ, yʋlʋ ɩsɑɣɑʋ nɑ́ kɑɑ pəsɩ-ɩ.

²⁴Nkɑ nɑŋtɩ ɩ kolontunɑɑ kɛ ɩ nɔɣɔ tɔɔ, nɑ ń mɑ́ mpɑ pɑɑ cɑɑkɩ-ɩ tɔ.

²⁵N kɑ́ lɑpɩ-ɩ nyɑ́ kʋpɑntʋ, nɑ ɩ toŋ kpɑɑkənɑ nyɑ́ hətɛ.

²⁶N kɑ́ tʋ ɩ niŋ tɑɑ kɛ́ teŋku, nɑ ń yele nɑ ɩ́ pəsɩ pusi.

²⁷Hɑlɩ n kɑ́ yɑɑ-ɩ nɑ ɩ́ tɔ sɩ: Nyɑɣɑlɛ mɑ cɑɑ Ɩsɔ nɑ mɑ nyʋɣʋ yɑpʋ kʋkpɑmʋɣʋ.

²⁸Ɩlɛnɑ nyɑɑ pəsɩ-ɩ nyɑ́ pəyɑlʋ kɑncɑɑlɑɣɑ nyəŋ wei ɩ kɛ́ ɑtɛ ɑwulɑɑ sɔsɑɑ tənɑ tɑɑ sɔsɔ tɔ.

²⁹N kɑ́ sɩɩ-ɩ kʋpɑntʋ kɛ tɑm tɔɔ, pəyele nɔɣɔ ŋkɑ nyɑ́ nɑ-ɩ ɩ́ pɛɛlɑɑ tɔ kɑ kɑɑ lɑɣɑsɩ.

³⁰N kɑ́ yele nɑ ɩ lʋlʋɣʋ nyə́mɑ wɛɛ tɑm tɔɔ, nɑ ɩ kɑwulɑɣɑ nɑ́ɑ́ leeli ɩsɩɩ ɩsɔtɔnʋɣʋ.

³¹Ye ɩ lʋlʋɣʋ nyə́mɑ lɔwɑ nyɑ́ kiiŋ nɑ pɑ́ kisi nyɑ́ kʋsəsɩɩtʋ kɛ təŋʋɣʋ,

³²ye pɑ kisiɣi nyɑ́ kʋtʋtʋtʋ nɑ pɑɑ tɔkəɣɩ nyɑ́ kʋsəsɩɩtʋ,

³³ɩlɛ n kɑ́ cɑɑ kpɑ́tʋɣʋ nɑ ń hɔnɑ pɑ ŋkpɑŋʋɣʋ nɑ ń mɑ́-wɛɣɛ pɑ ɩsɑɣɑtʋ tɔɔ.

³⁴Amɑ n kɑɑ pɛ-wɛɣɛ nyɑ́ kʋpɑntʋ, pəyele n kɑɑ pɛ-wɛɣɛ nyɑ́ teu.

³⁵N kɑɑ yɔkɩ nyɑ́ nɔɣɔ pɛɛlʋɣʋ. Pəyele n kɑɑ lɑɣɑsɩ nti n yɔɣɔtɑɑ tɔ.

³⁶N tɛmɑ tuunɑʋ nɑ nyɑ́ tənɑŋŋ wɛɛtʋ, n kɑɑ pəsɩ ń looli Tɑfiiti.

³⁷Tɑfiiti lʋlʋɣʋ kɑ wɛɛ tɑm tɔɔ kɛ́, nɑ ɩ kɑwulɑɣɑ kumte wɛɛ nyɑ́ ɩsɛntɑɑ ɩsɩɩ ilim.

³⁸Nɑ ɩ́ leeli ɩsɩɩ ɩsɔtʋ, ɩnɩ ɩ kɛnɑ ɑseetɑ tʋ kʋpɑŋ wei ɩ wɛ ɩsɔtɔnʋɣʋ tɑɑ tɔ.

³⁹Pɑɑ nɑ mpʋ pɑ́ɑ́nɑ́ kpɑ-ŋ nɑ ń lɔ wulɑʋ wei n kɑ ləsɑɑ nɑ ń pəlɩ nim tɔ nɑ ń yele-ɩ nɑ ɩ́ hoti.

⁴⁰N yɔkɑ nɔɣɔ ŋkɑ nyɑ nɑ nyɑ́ təmlɛ tʋ ɩ pɛɛlɑɑ tɔ nɑ ń wɑkəlɩ ɩ ntenuɣu nɑ ń lɔ-kʋɣʋ ɑtɛ.

⁴¹N yɔkɑ ɩ koloosi toŋ nyənsɩ tənɑ, nɑ ń pəsɩ ɩ koloosi ɑcɑlɛɛ kɛ ncɑɑ.

⁴²Mpɑtɔntɑɑ tənɑ kuuki ɩ wontu kɛ́, nɑ ɩ cɔlɔ nyə́mɑ pɑɑkənɑ-ɩ.

⁴³N kpɑɑsɑ ɩ kolontunɑɑ ɑpɑlʋtʋ, nɑ ń lɑ nɑ mpɑ pɑɑ cɑɑkɩ-ɩ tɔ pɑ lɑŋɑ hɛɛ.

⁴⁴N kʋwɑ ɩ yoou wontu lɔŋ. Pəyele n tɑ sənɑ-ɩ yoou tɑɑ.

⁴⁵N lɛɛkɑ ɩ kɑwulɑɣɑ toŋ, nɑ ń pəsɩ ɩ kumte kɛ kpɛntəlɑsɩ kɛ ɑtɛ.