Yontu 78:4-64

⁴Pə fɛɩ sɩ tə́ ŋmɛsɩ-təɣɩ tɑ́ piyɑ. Tɩɩ kɛɛsɩ tɑ́ piyɑ piyɑ kɛ Tɑcɑɑ sɑmtʋ tɔm. Nɑ ɩ tomɑ nɑ piti təmɑ wenɑ ɩ lɑpɑ tɔ pə tɔm.

⁵Ɩsɔ tʋwɑ kʋtʋtʋtʋ nɑ ɩ́ sɩɩ kiiu kɛ ɩ yəlɑɑ kɛ Ɩsɛɣɛlɩ tɑɑ. Nɑ kiiŋ ɩnɩ ɩ́ hʋlɩ tɑ́ cɔsɔnɑɑ sɩ pɛlɛ pɑ́ sɛɣɛsɩ-təɣɩ pɑ piyɑ.

⁶Ɩlɛnɑ pɛlɛ pɑ piyɑ nyɩ-tɩ, nɑ səlɛ sɩ tɔɔwɑ ɩlɛ sɩ sɛɣɛsɩ-təɣɩ sɩ piyɑ.

⁷Ɩlɛnɑ pɑ́ tʋ Ɩsɔ kɛ́ nɑɑni pɑ tɑɑ sɔɔ ɩ təmɑ tɔɔ, nɑ pɑ́ tɔkɩ ɩ kʋsəsɩɩtʋ.

⁸Ɩlɛ pɑ kɑɑ təŋ pɑ cɑɑnɑɑ ɩkpɑtɛ. Pɛlɛ pɑɑ kɛ́ kɑɑnɩɩtʋnɑɑ nɑ tɔɔ kʋllɑɑ piitim kɛ́. Pɑ fɛɩ nɑɑni, pə́cɔ pɑɑ təŋəɣɩ Ɩsɔ kɛ́ teu kɛ pɑ ləmɑɣɑsɛɛ tɑɑ.

⁹Ɩfəlɑyim lʋlʋɣʋ nyə́mɑ mpɑ pɑ kɛ́ tɔtɔlɑɑ tɔ, pɑ sewɑ yoou kɛ kʋ wule.

¹⁰Pɑ tɑ́ tɔkɩ pɑ́ nɑ Ɩsɔ pɑ nɔɣɔ pɛɛlʋɣʋ. Pɑ kisɑ ɩ kiiŋ tɑɑ tɔntɛ.

¹¹Pɑ sɔɔwɑ Ɩsɔ kookɑlənɑɑ nɑ ɩ təmɑ sɔsɔɔnɑ wenɑ ɩ kɑ yelɑɑ nɑ pɑ́ nɑ́ tɔ.

¹²Ɩsɔ kɑ lɑpɑ kɔkɔlɔ nyəmnɑɑ kɛ Icipiti hɔɣɔlʋɣʋ ŋku pɑ yɑɑ sɩ Sowɑŋ tɔ kʋ tɑɑ kɛ́ pɑ cɔsɔnɑɑ ɩsɛntɑɑ kɛ́.

¹³Ɩsɔ fɑɣɑ lʋm nɑ pə́ yele-wɛɣɛ mpɑɑʋ nɑ pɑ́ tɛɛ nɑ ɩ́ kɑɑ-wəɣɩ huɣule ɩsɩɩ koluŋɑ.

¹⁴Ɩsɔŋmʋntʋɣʋ hʋlɑɣɑnɑ-wɛɣɛ mpɑɑʋ kɛ ilim tɑɑ, ɩlɛnɑ kʋ mʋɣɩ kɔkɔ kɛ pɑɑ ɑhoo nnɑ.

¹⁵Ɩsɔ fɑɣɑ kʋkpɑmʋɣʋ kɛ wʋlɑɣɑ tɛtʋ tɑɑ nɑ ɩ́ yele nɑ pɑ́ nyɔɔ tɛtʋ tɛɛ lʋm.

¹⁶Ɩsɔ lɑpɑ nɑ lʋm sɛɛlɑɑ lɩɩnɑ kʋkpɑmʋɣʋ tɑɑ nɑ pə́ kpe ɩsɩɩ pusi.

¹⁷Amɑ tɑ́ cɑɑnɑɑ tɔŋɑ ɩsɔtɑɑ Ɩsɔ sɔsɔ kɛ pəntənɑʋ nɑ pɑ́ kʋləɣɩ Ɩsɔ tɔɔ kɛ́ wʋlɑɣɑ tɛtʋ tɑɑ tənɑ.

¹⁸Tɑ́ cɑɑnɑɑ mɑɣɑsɑ Ɩsɔ kɛ́ pɑ tɑɑ sɩ pɑ nɑɑ ɩ wɑɑlɩ, kɛ timpi pɑ sələmɑ-ɩ tɔɣɔnɑɣɑ ɩsɩɩ pɑ sɔɔlɑɑ tɔ.

¹⁹Hɑlənɑ pɑ́ tʋʋ Ɩsɔ sɩ: Nn pəsəɣɩ nɑ ń cɑlɩ-tʋɣʋ tɔɣɔnɑɣɑ kɛ wʋlɑɣɑ tɛtʋ tɑɑ.

²⁰Tɑmpɑnɑ n mɑpɑ kʋkpɑmʋɣʋ nɑ lʋm kpe, nɑ pə́ hɛɛ lɔɔŋ yɑɑ. Ɩlɛ n pəsəɣɩ nɑ ń hɑ nyɑ́ yəlɑɑ kɛ tɔɣɔnɑɣɑ nɑ nɑntʋ nɑ?

²¹Ḿpʋɣʋ Tɑcɑɑ n nɩɩwɑ nɑ pɑ́ɑ́nɑ́ kpɑ-ŋ nɑ nyɑ́ tɑɑ hɑŋnɑ Ɩsɛɣɛlɩ nyə́mɑ ɩsɩɩ kɔkɔ,

²²kɛ timpi pɑ tɑ tɛ-ŋ nɑ pɑ tɑɑ tɔ. Pɑ tɑ lɑ nɑɑni kɛ́ nyɑ́ wɑɑsʋɣʋ tɔm.

²³Ḿpʋɣʋ n yɔɣɔtənɑ ɩsɔŋmʋntʋ nɑ ń tʋlɩ ɩsɔtɔnʋɣʋ tɑɑ nɔnɔɔsɩ.

²⁴Nɑ ń yele nɑ Mɑnnɑ*fɑ* hoti pɑ tɔɔ ɩsɩɩ tɛʋ sɩ pɑ tɔɣɔ. Ɩsɔtɑɑ tɔɣɔnɑɣɑ kɛ n hɑ nyɑ́ yəlɑɑ kɛ mpʋ.

²⁵Ɩsɔtɑɑ tillɑɑ tɔɣɔnɑɣɑ kɛ n hɑ-wɛ, nɑ pɑ́ tɔɣɔ nɑ pɑ́ hɑɣɑ.

²⁶Ḿpʋɣʋ Ɩsɔ n yelɑɑ nɑ ilim təlɩɩlɛ heelim mɑ́, nɑ ń kɔnɑ ilim mpətəŋ tɔɔ nyəm nɑ nyɑ́ toŋ.

²⁷Nɑ ń lɑ́ nɑ nɑntʋ tii pɑ tɔɔ ɩsɩɩ mʋsʋɣʋ. Sumɑsɩ tuutuumɑ kɛ n kɔnɑ-wɛ ɩsɩɩ teŋkunɑɑ nɔɔsɩ kɑnyəŋɑ.

²⁸N lɑpɑɣɑ nɑ sɩ hoti tɑ́ cɑɑnɑɑ təsikile nɑ sɩ cɔɔnɑ pɑ təcɑɣɑlɛ.

²⁹Tɑcɑɑ hɑ-wɛɣɛ mpi pɑ nyɩɩlɑɣɑ tɔ. Ɩlɛnɑ pɑ́ tɔɣɔ nɑ pɑ́ hɑɣɑ kɑtɑtəlɑɣɑ.

³⁰Tɑ́ cɑɑnɑɑ tɔɣɔnɑɣɑ kɑ wɛ pɑ nɔɔsɩ tɑɑ kɛ́, pɑ luluŋ tɑ tɩɩ sətɑ,

³¹ḿpʋɣʋ Ɩsɔ tɑ́ɑ́ huunɑ-wɛ nɑ ɩ́ kʋ Ɩsɛɣɛlɩ ɩfepiyɑ tɑɑ ɩfepiyɑ.

³²Pɑɑ nɑ mpʋ tɔ, pɑ tɑ tʋnɑ nyɑ́ kɔkɔlɔ nyəmnɑɑ nɑ pɑ́ tɔŋɑ ɩsɑɣɑtʋnɑɑ kɛ lɑpʋ.

³³Ḿpʋɣʋ n kpiisɑ-wɛ nɑ heelim, nɑ ń tisi wɑhɑlɑ kɛ́ pɑ tɔɔ kɛ kpɑkpɑɑ, nɑ ń sɩɩ pɑ weesiŋ tənɑɣɑ.

³⁴Wɑɑtʋ wei səm kɔŋ tɑ́ cɑɑnɑɑ ɩlɛnɑ pɑ́ kɛɛsənɑ Ɩsɔ nyɑ́ tɔɔ nɑ pɑ́ pɛɛkəɣɩ sɩ ń kenti pɑ tɔɔ.

³⁵Nɑ pɑ́ tɔɔsɩ sɩ n kɛ́ pɑ kʋkpɑmʋɣʋ. Ɩsɔtɑɑ Ɩsɔ Sɔsɔ kɛ́ pɑ wɑɑsʋlʋ.

³⁶Amɑ pɑ ntompee kɛ pɑ puɣusɑɣɑnɑ-ŋ nɑ pɑ́ looliɣi-ŋ nɑ pɑ nsəmɑ.

³⁷Pɑ tɑɑ tɛŋɩ-ŋ nɑ pɑ tɑɑ kɛ́ teu, pəyele pɑ tɑ tɔkɩ nyɑ́ nɑ-wɛ mə nɔɣɔ pɛɛlʋɣʋ.

³⁸Pɑɑ nɑ mpʋ, nyɑ́ suulu tɔɔ, n wiiki ɩsɑɣɑlɑtɑɑ pətɔɔtəlɛ, nn wɑkələɣɩ-wɛ. N kpɑɑ nyɑ́ təɣɩ tɑm kɛ́, nn hɑɑkɩ nyɑ́ təɣɩ nyɑ́ pɑ́ɑ́nɑ́ tənɑ tɑɑ.

³⁹Nɑ ń tɔɔsɩ sɩ tɑ cɑɑnɑɑ kɛ́ yəlɑɑ kɛ yem kɛ́. Pɑ kɛ́ heelim mpi pə tɛɛkɩ pə kɑɑ məlɩ tɔɣɔ.

⁴⁰Tɑ́ cɑɑnɑɑ kʋlɑ nyɑ́ tɔɔ kɛ́ wʋlɑɣɑ tɛtʋ tɑɑ nɑ pɑ́ kpɑɑsəɣɩ nyɑ́ pɑ́ɑ́nɑ́ tɔ pə fɛɩ kɑlʋɣʋ.

⁴¹Pɑ tɑ hɛɛsɩ Ɩsɔ nyɑɣɑ mɑɣɑsʋɣʋ sɩ pɑ nɑɑkɩ nyɑ́ wɑɑlɩ, nɑ pɑ́ kpɑɑsəɣɩ Ɩsɛɣɛlɩ Ɩsɔ Nɑŋŋ tʋ nyɑ́ nyɑ́ pɑ́ɑ́nɑ́.

⁴²Pɑ tɑ tɔɔsɩ Ɩsɔ nyɑ́ nyɑ́ toŋ tɔɔ nɑ ɩsənɑ n kɑ yɑpɑ-wɛɣɛ kolontu niŋ tɑɑ tɔ.

⁴³Tɑ cɑɑnɑɑ sɔɔ piti təmɑ wenɑ n kɑ lɑpɑ Icipiti tɛtʋ tɑɑ nɑ kɔkɔlɔ nyəmnɑɑ mpɑ n lɑpɑ Sowɑŋ hɔɣɔlʋɣʋ tɑɑ tɔ.

⁴⁴N pəsɑ Icipiti nyə́mɑ pusi lʋm kɛ cɑləm nɑ pɑ́ wɩɩ sɩ lʋm kɛ nyɔɔʋ.

⁴⁵Nɑ ń kɔnɑ-wɛɣɛ kɑcɔsɩ sɔtʋ nyənsɩ nɑ sɩ́ nyɔɔ pɑ cɑləm. Nɑ sɑlɛɛ, nɑ ɑlɛ ɑ wɑkəlɩ-wɛ.

⁴⁶Nɑ ń tʋ pɑ tɑwɑ nɑ pɑ hɑtəmʋtʋ kɛ kʋtoloŋ.

⁴⁷Nɑ ń yele nɑ tɛʋ ɩsɑɣɑʋ nɑ tɔmpɛɛ wɑkəlɩ pɑ lɛsɛŋ tɩɩŋ nɑ tɩɩŋ kʋlʋlʋŋ lɛləŋ.

⁴⁸Nɑ tɛʋ tɔmpɛɛ kʋ pɑ tɔlɑ nɑ kʋ nɑsɩ pɑ kɑləkəŋ.

⁴⁹Ḿpʋɣʋ Ɩsɔ nyɑ́ n mʋ Icipiti nyə́mɑ nɑ pɑ́ɑ́nɑ́ sɔsɔɔnɑ nɑ nyɑ́ tɑɑ huunɑ-wɛ nɑ pɑ lɑŋɑ wɑkəlɩ, nɑ ń tilinɑ-wɛɣɛ ɩsɔtɑɑ tillɑɑ wɑkəllɑɑ kpekəle.

⁵⁰N hɑɣɑ-wɛ nɑ nyɑ́ pɑ́ɑ́nɑ́ kɛ ḿpʋɣʋ, pə tɑɣɑ səm tike kɛ n tʋ-wɛ. Amɑ n sʋsɑ-wɛɣɛ wɑhɑlɑ tɑɑ nɑ pɑ ɩsɛ.

⁵¹Nɑ ń kʋ Icipiti nyə́mɑ ɑpɑlʋpiyɑ kɑncɑɑlɑɣɑ nyənsɩ tənɑ. Kɑm lʋlʋɣʋ nyə́mɑ ɩwɩɩlɛ kɑncɑɑlɑɣɑ nyəntɛ səpənɑ mpʋ.

⁵²Ḿpʋɣʋ n tiikɑ nyɑ́ yəlɑɑ nɑ ń tɛɛnɑ-wɛ ɩsɩɩ pɑ ləsʋɣʋ heeŋ kɛ kɑləkʋ tɑɑ tɔ, nɑ ń tiiki-wɛɣɛ wʋlɑɣɑ tɛtʋ tɑɑ ɩsɩɩ tɔlɑ.

⁵³N ponɑ-wɛɣɛ nɑ nɑɑni, sɔɣɔntʋ fɛɩ-wɛ, nɑ teŋku li pɑ kolontunɑɑ.

⁵⁴Pə wɑɑlɩ kɛ́ n ponɑ-wɛɣɛ nyɑ́ tɛtʋ nɑŋŋ nyəntʋ tɑɑ kɛ́ pʋɣʋ ŋku n mʋwɑ tɔ kʋ tɔɔ.

⁵⁵Nɑ n tɔɣɔnɩ Kɑnɑɑŋ piitimnɑɑ nɑ n tɑlɑ yəlɑɑ kɛ pɑ tɛtʋ nɑ ń sɩɩ Ɩsɛɣɛlɩ kpekɑ yəlɑɑ kɛ pɑ tɛɛsɩ tɑɑ.

⁵⁶Pɑɑ nɑ mpʋ tɔ pɑ́ mɑɣɑsɑ ɩsɔtɑɑ Ɩsɔ Sɔsɔ nyɑ́ nɑ pɑ́ kʋlɩ nyɑ́ tɔɔ, pɑ tɑ tɔkɩ nyɑ́ kʋsəsɩɩtʋ.

⁵⁷Pɑ hɑtələnɑ Tɑcɑɑ nyɑ́ nɑ pɑ́ pəsɩ tɛtɛlɑtɑɑ ɩsɩɩ pɑ cɑɑnɑɑ. Pɑ yɔɔləɣɩ ɑpɑlʋtʋ kɛ́ ɩsɩɩ tɔɔʋ ŋku kʋ hikɑ fitɑɑ tɔ.

⁵⁸Tɑ́ cɑɑnɑɑ kʋsɑ Ɩsɔ nyɑ́ nyɑ́ pɑ́ɑ́nɑ́ nɑ pɑ təfɛɛnlɛnɑɑ nɑ pɑ́ kʋsɩ nyɑ́ ɩsɛsɛɛmlɛ nɑ pɑ tɩɩŋ.

⁵⁹Ɩsɔ n nɩɩ mpʋ ɩlɛnɑ pə́ kʋsɩ nyɑ́ pɑ́ɑ́nɑ́ nɑ ń kpiisi Ɩsɛɣɛlɩ nyə́mɑ nɑ toŋ.

⁶⁰Nɑ ń lɔ nyɑ́ təyɑɣɑ ŋkɑ kɑ tɑɑ n kɑ wɛ nyɑ́ yəlɑɑ hɛkʋ kɛ Silo tɔ.

⁶¹Nɑ ń yele nɑ kolontunɑɑ lɛɛkɩ nyɑ́ ɑtɑkɑɑ wei ɩ hʋləɣɩ nyɑ́ toŋ nɑ nyɑ́ teeli tɔ.

⁶²Ɩlɛnɑ ń mʋ pɑ́ɑ́nɑ́ nɑ nyɑ́ yəlɑɑ, nɑ ń yele nɑ pɑ́ kʋ-wɛ.

⁶³Yoou kʋwɑ tɑ cɑɑnɑɑ ɩfepiyɑ, pɑ pɛɛlɑɑ tɑ hiki mpɑ pɑɑ sɑɑ tɔ.

⁶⁴Pɑ kʋwɑ pɑ kɔtəlɑɑ kɛ yoou tɑɑ, pɑ leelɑɑ tɑ wii-wɛ.