Sabóor 78:4-64

⁴Dunu ko nëbb sunuy doom, xanaa di ko jottli maas giy ñëw, xamal leen jaloorey Aji Sax ji ak kàttanam aki kéemaanam.

⁵Bindal na sëti Yanqóoba téereb seede, muy yoon wi mu tegal Israyil. Mu sant maam yi, ñu xamal ko seeni doom,

⁶ngir ñiy juddu ëllëg xam ko, am ay doom, ñu màgg, ba xamal ko seeni doom,

⁷ngir ñu wóolu Yàlla, baña fàtte jëfi Yàlla, di jëfey santaaneem,

⁸te baña roy seeni maam; maas gu të woon te déggadi, ñu ñàkk pastéef te sàmmuñu kóllërey Yàlla.

⁹Waa giirug Efrayim ñoo soxi fitt, te keroog xare ba ñoo daw.

¹⁰Ñoo sàmmul kóllërey Yàlla, gàntal yoonam,

¹¹ba fàtte ay jalooreem, di kéemaan yi mu leen won.

¹²Fa seen kanami maam la def kéemaan, fa diiwaanu Cowan, réewum Misra.

¹³Moo xar géej ga, jal ndox ma nim tata, jàlle leen.

¹⁴Bëccëg mu jiitee leen aw niir, ak leeru sawara guddi gépp.

¹⁵Moo xar ay doj ca màndiŋ ma, mbàmbulaan wal, mu nàndal leen;

¹⁶mu sotti ndox mu balle ciw xeer, walal, mu safi dex.

¹⁷Teewul ñu wéy di moy Aji Kawe ji, di ko gàntal ca màndiŋ ma.

¹⁸Ñoo diiŋate Yàlla xol, di xemmem ñam wu bakkane.

¹⁹Ñuy waxal Yàlla naan: «Xam ngeen ne Yàlla manu noo taajal ndab ci màndiŋ mi!

²⁰Dóor naw doj, moos, ndox ma fettax, wal ma baawaan, waaye aw ñam nag? Daa mana leel mbooloo mii aw yàpp?»

²¹Aji Sax ji dégg ci, mer lool; xolam tàng ci sëti Yanqóoba, am sànj tàkkal Israyil.

²²Dañoo gëmul Yàlla, doyloowuñu wallam.

²³Mu digal niir ya fa kaw, ubbi bunti asamaan,

²⁴tawal leen mànn, ñu lekk: peppum asamaan la leen leel;

²⁵mburum jàmbaar la nit lekk, mu wàcceel leen ca lu ne gàññ.

²⁶Yàlla wale ngelawal penku fa asamaan, bëmëx ak dooleem ngelawal bëj-saalum.

²⁷Mu tawal leenu yàpp, mu saawe ni pënd, di njanaaw yu ne gàññ ni feppi suufas géej,

²⁸wàcce ko fa seen digg dal ba, mu dajal seeni dëkkuwaay.

²⁹Mu faj seen aajo, ñu lekk ba suur këll.

³⁰Teewul bala seen xel a dal, seen lanc jàllagul sax,

³¹Yàlla mer na, dal ci seen kaw, bóom ña ëpp doole ca ñoom, fàdd waxambaaney Israyil.

³²Loolu lépp teewul ñuy bàkkaar ba tey te gëmuñu ay kéemaanam.

³³Mu dagg seeni fan, mu wéy ni cóolóol, faat seen bakkan ci safaan bu gaaw.

³⁴Ba leen Yàlla fàddee, ña des sàkku ko, tuub, waññiku ci moom.

³⁵Ñu fàttliku ne Yàllaay seen cëslaay, xam ne Yàlla Aji Kawe jeey seen njotlaay.

³⁶Teewul ñu di ko jéema naxey wax, di ko fen.

³⁷Joxuñu ko woon xol, sàmmuñu kóllëreem.

³⁸Teewul mu yërëm, baal leen seen ñaawtéef, ba sànku leen. Muñ na meram, muñati, te toppul xolam,

³⁹ndax xalaataat ne suuxu neen lañu, di noo guy dem te du délsi.

⁴⁰Gàntal nañu ko ba tàyyi ca màndiŋ ma, teg ko naqar ca ndànd-foyfoy ga.

⁴¹Ñu dellu di diiŋat Yàlla, di naqaral Aji Sell, ji séddoo Israyil.

⁴²Fàtte nañu ndimbalam la, bés ba mu leen jotee ca noon ba,

⁴³ba def ay firndeem ca Misra, muy kiraamaam ya ca Cowan.

⁴⁴Moo soppli deret seen yooni ndox, ba naaneetuñu wal ya.

⁴⁵Mu wàcce seen biir ndiiraanu weñ yu leen di lekk, ak mbott yu leen sànk.

⁴⁶Mu jox soccet yi seen gàncax, jébbal njéeréer yi seen meññeef.

⁴⁷Seen garabi reseñ, mu fóome tawab yuur, seen garabi sikomoor, mu fóome waame.

⁴⁸Seen jur gu gudd, mu bàyyeek tawab yuur, seeni gàtt, mu bàyyeek sawaray melax.

⁴⁹Yàlla sotti leen tàngooru xadaram, mu dim sànj ak naqar ak njàqare, lépp di gàngooru ndaw yu indiy musiba.

⁵⁰Mu afal meram, ba musalul seen bakkan, xanaa jébbal leen mbas ma.

⁵¹Daa fàdd képp kuy taaw ca Misra te juddoo seen digg doole, fa xaymay sëti Xam.

⁵²Mu génne ñoñam niy gàtt, wommat leen ni gétt ca màndiŋ ma,

⁵³ba yóbbu leen fu wóor te tiituñu; seeni noon, géej ga mëdd leen.

⁵⁴Mu yóbbu leen fa suufam su sell sa, fa tund woowu mu jënde dooleem.

⁵⁵Da leena dàqal ay xeet, dogal leen céru suuf, sancal giiri Israyil ca seeni xayma.

⁵⁶Teewul ñuy diiŋat ak a gàntal Yàlla Aji Kawe ji, sàmmuñu ay dénkaaneem,

⁵⁷xanaa dëddu, di ko wor ni seeni maam, toogadi ni xala gu yolom.

⁵⁸Ñu di ko merlook seen bérabi jaamookaay, di ko fiirlook seen jëmmi tuur.

⁵⁹Ba ko Yàlla yégee, mer na, ba jéppi Israyil lool.

⁶⁰Mu gental dëkkuwaayam ba ca Silo, xaymaam ba mu sampoon ca doom aadama ya.

⁶¹Mu jébbal ngàllo màndargam dooleem, may gànjaram ca loxol noon ba.

⁶²Daa bàyyee ñoñam saamaru noon, ndax mere yooya séddoom.

⁶³Seeni waxambaane deeye xare, seeni janq lamb;

⁶⁴seeni sarxalkat loroo saamar, te jëtun jooyul.