Yontu 74:5-16

⁵Pɑ́ nɑ pɑ lɑwɑ kɛ́ nɑ pɑ loŋ ɩsɩɩ tɑɑsɩ sɛtəlɑɑ kɛ hɔtʋɣʋ tɑɑ.

⁶Nɑ pɑ́ fɑkɩ lɛɛsəŋ nɑ pɑ́ yɔkəɣɩ lɛləŋ.

⁷Pɑ tʋ kɔkɔ kɛ nyɑ́ təsɛɛlɛ nɑ pɑ́ yɔkɩ nɑ pɑ́ wɑkəlɩ timpi nyɑ́ hətɛ wɛɛ tɔ.

⁸Nti pɑ mɑkɩ pɑ lɑŋɑ tɑɑ tɔɣɔlɛ sɩ, pɑ́ wɑkəlɩ-tʋɣʋ tɔm kʋlʋm tɔɔ. Pɑɑ wɔ kɔkɔ kɛ lonɑ nnɑ ɑ tɑɑ Ɩsɔ nɑ yəlɑɑ pɑ suliɣi tɔ.

⁹Tɩɩ tɑsəɣɩ nɑʋ kɛ mpi pə hʋləɣɩ sɩ Ɩsɔ wɛɛ tɔ. Ɩsɔ kʋyɔɣɔtʋtʋ tɛləsəlɑɑ nɑ́ fɛɩ tɔtɔ. Tɑ tɑɑ nɔɣɔlʋ tɑ nyɩ ɩsənɑ pɩɩ tɑɑŋɩ tɔ.

¹⁰Hɑɩ, Ɩsɔ Tɑcɑɑ, pəlee kɛ́ kolontunɑɑ kɑ́ hɛɛsɩ nyɑ́ hətɛ kʋtʋɣʋ? Pəlee kɛ́ pɑɑ hɛɛsɩ-tɛɣɛ footuɣu?

¹¹Pepe tɔɔ kɛ́ n sumɑ, nɑ nn sɑŋ nyɑ́ niŋ ntɔɣɔŋ kʋsʋɣʋ sɩ n mɑ?

¹²Hɑɩ, Ɩsɔ, nyɑɣɑlɛ mɑ wulɑʋ kɛ too lɔŋtɑɑ, nyɑ́ wɑɑsəɣənɑ tɛtʋ tɑɑ.

¹³Nyɑ́ toŋ kɛ n fɑɣɑnɑ teŋku nɑ ń yɔkɩ lʋm tɛɛ tʋmɑɑ sɔsɑɑ nyɔɔŋ.

¹⁴N yɔkɑ tʋm sɔsɔ Lefiyɑtɑŋ nyʋɣʋ nɑ ń pɛtɩ-ɩ wʋlɑɣɑ tɛtʋ tɑɑ yəlɑɑ sɩ pɑ́ tɔɣɔ.

¹⁵Nyɑ́ hulinɑ lʋm sɛɛlɑɑ nɑ ń hɛɛ lɔɔŋ nɑ ń yele nɑ pusi nsi sɩɩ nyɔɔkɩ tɔ sɩ lʋm nyɔɔ.

¹⁶Nyɑɣɑlɛ ilim tɑɑ nɑ ɑhoo pə tʋ. Nyɑ́ lɑpənɑ ilim nɑ ɩsɔtʋ.