SALMOS 74:5-16

⁵Hualajque ica ininhachas huan huejhueyi martillos hasta nesiyaya queja cuajcuahuini tlatlajco cuatitlamitl.

⁶Huan ama ica ininteposhua quitlapanque huan quixolejtoque nochi tlamantli tlen ica tlayejyecchijtoyaj motiopa.

⁷Quena, motiopa quitlatijque, huan quimahuispolojque moixpa nopa tlen quihuicayaya motoca, huan quimajcajque tlalchi.

⁸Huan quiijtojque ipan ininyolo: “Ma tijtlamixolehuaca nochi tlen onca ipan ni tlali.” Huan yajque campa hueli huan quitlatijque nochi israelita tiopantini, campa timosentiliyayaj para timitzhueyichihuase, Toteco Dios.

⁹Ayoc onca niyon se tlamantli tlen quinextía para timotlacajhua. Ayoc onca tiocamanalohuani. Ayoc aca huelis techilhuis hasta quema tlamis nochi ya ni.

¹⁰Toteco Dios, ¿hasta quema tlamis mitzmahuispolohuaj mocualancaitacahua? ¿Huelis ax quema tiquintlatzacuiltis?

¹¹¿Para tlen tihuejcahua para titechpalehuis? ¿Para tlen ax tijnextía mohueyi chicahualis huan titechpalehuía?

¹²Hasta tlen huejcajquiya Toteco Dios itztoc notlanahuatijca. Yajaya nechpalehuijtoc ipan ni tlaltepactli huan campa hueli campa niyajtoc.

¹³Ica mochicahualis tijxelo hueyi atl. Huan tiquintzontlamilti huejhueyi tlapiyalime tlen temajmatijque tlen itztoyaj ipan atl.

¹⁴Tijcuaxamani nopa hueyi tlapiyali tlen itoca Leviatán, huan inacayo tiquinmacac ma quicuaca nopa tecuanime tlen itztoyaj ipan huactoc tlali.

¹⁵Tijchijqui ma meya atl ipan huejhueyi ameltini, huan tijchihua para miyac atemitl ma quipiyaca atl. Nojquiya tiquinhuatzqui sequin atemitl tlen ax quema huactoyaj.

¹⁶Ta moaxca tonali huan yohuali. Ta tijchijchijqui metztli huan tonati.