Yontu 49:4-17

⁴ləmɑɣɑsɛɛ tɔm kɛ mɑ yɔɣɔtəɣɩ, nɑ mɑ tɑɑ kʋmɑɣɑsətʋ wɛnɑ hʋwɛɛ kɛ sɔsɔm kɛ́.

⁵Mɑ welisiɣi teu kɛ ɩtuule tɑɑ kɛ́, nɑ mɑ́ tɛləsəɣɩ-tɛ nɑ cəmʋɣʋ.

⁶Pepe tɔɔ kɛ́ mɑɑ tɑsɑ nyɑm kɛ wɑhɑlɑ wɑɑtʋ kɛ sɑɑ wei mɑ kolontunɑɑ kɑ́ tɑ-m nɑ pɑ́ tʋɣʋ-m wɑhɑlɑ tɔ.

⁷Pɑ liɣitee tuutuumɑ kɛ pɑ tʋ nɑɑni nɑ pɑ́ hɔŋ pɑ tɩ nɑ pɑ wɛnɑʋ kɑtɑtəlɑɣɑ.

⁸Amɑ pɑ tɑɑ nɔɣɔlʋ fɛɩnɑ toŋ sɩ ɩ́ yɑ Ɩsɔ cɔlɔɣɔ ɩ tɔɣɔntəlɛ weesuɣu yɑɑ ɩ mɑɣɑmɑɣɑ ɩ nyəŋkʋ.

⁹Yʋlʋ ləsɑɣɑ kəlɑ liɣitee, pɑɑ pə lɑ́ ɩsənɑ nɔɣɔlʋ kɑɑ pəsɩ kɑ yɑpʋ.

¹⁰Pɑ hʋʋkɩ sɩ pɑɑ fiti pəlɑɑʋ pɑ kɑɑ sɩ?

¹¹Tɑmpɑnɑ tɔɔ, pɑɑ n kɛ́ nyəntʋ yɑɑ kʋmɛlɛŋ, n kɑ́ sɩ kɛ́, nɑ ń yelinɑ lɛlɑɑ kɛ nyɑ́ wɛnɑʋ.

¹²Pɑɑ pɑ hɑwɑ pɑ tɛtʋ kɛ pɑ həlɑ pəlɑɑʋ tike kɑ́ tɛnɑ nɑ kʋ pəsɩ pɑ təcɑɣɑlɛ tɑm tɔɔ nyəntɛ.

¹³Yʋlʋ sɔsɔɔntʋ kɑɑ sɔɔsɩ ɩ weesuɣu kɛ tɑɣɑləŋ. Ɩ wɛ tənɑɣɑ kɛ teitei kɛ́ ɩsɩɩ kpəntɛ.

¹⁴Yəlɑɑ mpɛ pɑ təɣɩ pɑ tʋɣɩ nɑɑni nɑ pɑ́ nyənəɣɩ pɑ kʋyɔɣɔtʋtʋ tike kɛ tɑmpɑnɑ nyəntʋ.

¹⁵Ɩlɛ mpi pɑ kɔŋ tɛɛsənɑʋ tɔɣɔlɔ. Pɩɩ keeti-wɛɣɛ ɩsɩɩ heeŋ nɑ pə́ sʋsɩ ɑtɛtəlɛ tɑɑ nɑ səm pəsɩ pɑ tiikilu. Nɑ pə siɣisinɑ-wɛɣɛ pəlɑɑʋ təpəŋpəŋ nɑ pɑ teu sɩ. Atɛtəlɛ tɑɑ kɛlɛ pɑ təcɑɣɑlɛ.

¹⁶Amɑ Ɩsɔ kɑ́ yɑ-m ɑtɛtəlɛ tɑɑ tənɑ, nɑ ɩ́ ləsɩ-m.

¹⁷Pɑɑ yʋlʋ wɛnɑʋ tɔŋnɑ hukuɣu nɑ ɩ́ sʋʋkɩ toŋ nyɑ́ lɑŋlɛ ɩ tɑɑ pɛlɩ.