Yontu 37:20-35

²⁰Asɑɣɑɑ kɔŋ lepu kɛ́. Tɑcɑɑ kolontunɑɑ kɑ́ sɑɑlɩ kɛ́ ɩsɩɩ nyɩɩtʋ hɛtʋ yɑɑ kɔkɔ nyɔɔsɩ.

²¹Ɩsɑɣɑʋ kəntəɣɩ kɛ́ ɩɩ fɛləɣɩ. Amɑ siɣisilu nɑ́ hɑɑkənɑ luɣu kʋlʋmʋɣʋ.

²²Mpɑ Tɑcɑɑ kooliɣi kʋpɑntʋ tɔ mpɛ pɑ tənnɑ tɛtʋ. Ɩlɛnɑ pə́ kpiisiɣi mpɑ ɩ təŋsəɣɩ mpusi tɔ.

²³Ye ɩ lɑŋlɛ hɛɛnɑ yʋlʋ tɔntɛ, ɩ hɑsəɣɩ ɩ nɔɔhɛɛ tɛɛ kɛ́.

²⁴Pɑɑ ɩ tɩɩ hotɑɑ ɩɩ sɑɑləɣɩ ɑtɛ. Ɩ tɔkəɣɩ ɩ niŋ tɑɑ kɛ́ nɑ ɩ kʋsɩ-ɩ.

²⁵Too mɑ kʋlʋɣʋ tɔ, hɑlənɑ mɑ kpɑtəlɑɣɑ, mɑ tɑ nɑtɑ pə lɔwɑ siɣisilu, yɑɑ pə sʋsɑ ɩ piyɑ kɛ tɔɣɔnɑɣɑ sələmʋɣʋ tɑɑ.

²⁶Ɩ hɑɑkənɑ luɣu kʋlʋmʋɣʋ kɛ tɑm kɛ́ nɑ Ɩsɔ kooliɣi ɩ piyɑ kɛ kʋpɑntʋ.

²⁷Kisi ɩsɑɣɑtʋ nɑ ń lɑkɩ kʋpɑntʋ ɩlɛ nyɑ́ piitim kɑ́ wɛɛ tɛtʋ tɑɑ kɛ́ tɑm.

²⁸Mpi tɔ, siɣisuɣu kɛ Tɑcɑɑ n sɔɔlɑɑ. Pəyele nn lɔɔkɩ nyɑ́ yəlɑɑ. N kentiɣi pɑ tɔɔ kɛ́ tɑm kɛ́. Amɑ n kɑ́ kpiisi ɑsɑɣɑɑ piitim.

²⁹Siɣisilɑɑ kɑ́ tɔɣɔnɑ tɛtʋ nɑ pɑ́ cɑɣɑ tə tɑɑ kɛ́ tɑm.

³⁰Ləmɑɣɑsɛɛ tɔm kɛ siɣisilɑɑ yɔɣɔtəɣɩ nɑ pɑ́ kpɑɑləɣɩ tɑmpɑnɑ təŋʋɣʋ.

³¹Pɑ Ɩsɔ kiiŋ wɛ pɑ lotu tɑɑ kɛ́, pɩɩ cɛŋləɣɩ-wɛ.

³²Ɩsɑɣɑʋ cɛŋəɣɩ siɣisilu kɛ́ nɑ ɩ́ pɛɛkəɣɩ ɩ kʋɣʋ.

³³Amɑ Tɑcɑɑ ɩɩ yeki sɩ ɩsɑɣɑʋ ɩ́ kpɑ siɣisilu kɛ ɩ səkpɑŋ tɑɑ. Yɑɑ siɣisilu tɔm ɩ́ sɩ təhʋʋlɛ tɑɑ.

³⁴Tɛɛlɩ Tɑcɑɑ nɑ ń təŋəɣɩ ɩ mpɑɑʋ. Ɩ kɑ kʋsɩ nyɑ́ nyʋɣʋ nɑ ń tɔɣɔ tɛtʋ nɑ ɩ́ kpiisi ɑsɑɣɑɑ nɑ ń nɑ́.

³⁵Mɑɑ nɑwɑ ɩsɑɣɑʋ nɑ ɩ́ ŋmɑkələɣɩ. Nɑ ɩ́ pɩɩ sɔsɔm ɩsɩɩ tʋɣʋ kɛ Lipɑŋ tɛtʋ kʋpɑntʋ tɑɑ.