Yontu 19:3-14

³Wʋlɛ sɛɣɛsəɣənɑ lɛntɛ kɛ tə tɔm. Nɑ ɑhoo nɑ́ɑ́ heeliɣi lɛnnɑ kɛ ɑ tɔm.

⁴Pɩɩ yɔɣɔtəɣɩ sɩ yʋlʋ ɩ́ nɩɩ pə nɔɣɔ.

⁵Pɑɑ nɑ mpʋ, pə tɔm cɔɔkɩ ɑntulinyɑ tənɑsɩ tənɑɣɑ. Ɩsɔ sikɑ ilim kɛ cokəle kɛ ɩsɔtɑɑ kɛ́.

⁶Pə wɛ kɛ́ ɩsɩɩ ɑkpɑɣɑlʋ lɩɩkʋɣʋnɑ ɩ nɑŋ tɑɑ tɔ, nɑ ɩ́ tʋɣɩ mpɑɑʋ nɑ lɑŋhʋlʋmlɛ ɩsɩɩ ɑkɑ.

⁷Pə lɩɩkənɑ ɑntulinyɑ tənɑɣɑ kɑnɛɣɛ, nɑ pə́ tɔlənɑ lɛŋkɑ. Pʋlʋpʋ ɩɩ fitiɣi pə hɑŋɑɣɑ.

⁸Tɑcɑɑ nyɑ́ kiiŋ wɛ kɛ́ təcʋŋŋ, nɑ ɩ́ hɑɑkɩ toŋ nɑ weesuɣu. Tɑcɑɑ nyɑ́ kʋsəsɩɩtʋ tɑ siti tə wɛ kɛ́ təcʋŋŋ. Tə kuliɣi mpɑ pɑ tɑ nyɩ pʋlʋ tɔ pɑ ɩsɛ.

⁹Tɑcɑɑ nyɑ́ kʋtʋtʋtʋ siɣisɑɑ kɛ́ nɑ tə́ hɛɛsəɣɩ mpɑ pɑ nɩɩkənɑ-tɩ tɔ pɑ lɑŋɑ. Nyɑ́ kiiŋ siɣisɑɑ kɛ́ təkpɑtɑɑ, nɑ ɩ́ kuliɣi ɩsɛ.

¹⁰Tɑcɑɑ nyɑmnɑʋ tewɑɣɑ, yəlɑɑ kɑ nɩɩnɑ-ŋ ḿpʋɣʋ tɑm tɔɔ. Nyɑ́ kʋsəsɩɩtʋ wɛ tɑmpɑnɑ kɛ́ nɑ tə siɣisɑɑ.

¹¹Tə kəlɑ wʋlɑnɑɑ kʋpɑmpɑmɑ kɛ teu. Nɑ tə́ kəlɩ tɩɩŋ sɛtɑɣɑ nim nyəŋkɑ mɑɣɑmɑɣɑ kɛ leleŋ.

¹²Ntɩ tə sɛɣɛsəɣənɑ nyɑ́ təmlɛ tʋ mɑ́. Tə tɔkʋɣʋ tɑɑ mɑ wɑɑkɩ mɑ weesuɣu tɑɑ kɛ́.

¹³Nɔɣɔlʋ ɩɩ cɛkəɣənɑ ɩ tɑsəkəlɛ. Wii mɑɣɑ timpi mɑ tɑ cɛkənɑ tɔ.

¹⁴Kenti-m kɑlɑmpɑɑnɩ nyə́mɑ, pɑ tɑɑ ŋmɑkəlɩ-m. Wɑɑtʋ ɩnəɣɩ mɑɑ te teu nɑ ń fiti-m kʋpəntʋɣʋ ɩsɑɣɑʋ.