Ola Saam 19:3-14

³Ol dislot kaan tok langa wi en wi kaan lisin olabat,

⁴bat pipul ebriweya sabi det stori brom dislot ting. Det stori im shoum miselp langa pipul langa ebri kantri. God bin meigim pleis langa skai blanga det san.

⁵Wen im ailibala det san im kamat brom im pleis, jis laik det yangbala men hubin jis git merrit. Im jis laik strongwan men redi blanga ran det reis.

⁶Det san im gidap wansaid, en godan najasaid langa det skai. Nobodi kaan haidim miselp brom det san.

⁷Det lowa blanga YAWEI nomo garram enijing rong. Im meigim wi strongbala igin. Wi gin trastim det wed blanga YAWEI. Blanga im lowa im meigim pipul sabi det raitwei.

⁸Blanga im lowa im jidan rait olawei. Ol detlot pipul hu teiknodis langa det lowa, im meigim olabat jidan gudbinji. Det lowa blanga YAWEI nomo garram enijing rong. Im meigim wi sabi im wei brabliwei.

⁹Wen wi gibit rispek langa YAWEI im brabli gudwan tharran deya. Wi garra kipgon olataim gibitbat rispek langa im. Det lowa blanga YAWEI im brabli trubalawan. Im oldei gibit pipul feyago.

¹⁰Det lowa blanga YAWEI im mowa gudwan langa brabli gudwan gol. Det shugabeig im switwan, Bat det lowa im brabli mowa switwan.

¹¹Det lowa blanga im dalim wi wanim wi garra dum. Wen wi teiknodis langa im lowa im gibit wi ola gudwan ting.

¹²Ai kaan sabi blanga main nogudbalawei. YAWEI, yu sori langa mi en deigimwei detlot nogudwan ting weya ai nomo bin sabi aibin oldei dumbat.

¹³Nomo larram mi dumbat detlot nogudwan ting weya mi sabi olabat rong. Nomo larram ola nogud ting jidan bos blanga mi. If yu meigim mi lagijat wal ai garra jidan brabli gudwan, en jidan friwan brom ola nogudbalawei.

¹⁴YAWEI, larram ebrijing mi tok, en ebrijing mi jinggabat, meigim yu gudbinji. Yu na kipumbat mi seifwan. En yu na bin seibum mi.