Yontu 119:32-129 - PIIPILI ƖSƆ TƆM TAKƎLAƔA

³²Nyɑ́ kʋsəsɩɩtʋ kɛ mɑ nɩɩkənɑ teu. Mpi tɔ, n kulɑ mɑ ɩsɛ.

³³Tɑcɑɑ hʋlɩ-m nyɑ́ kʋtʋtʋtʋ mpɑɑʋ nɑ mɑ́ tɔkɩ-tɩ nɑ mɑ́ tɑlɑ tənɑɣɑ.

³⁴Tɑcɑɑ hɑ-m nyəm nɑ mɑ́ tɔkɩ nyɑ́ kiiu nɑ mɑ́ təŋəɣɩ-kʋ nɑ mɑ lotu tənɑ.

³⁵Yele nɑ mɑ́ nɩɩnɑ nyɑ́ kʋsəsɩɩtʋ. Mpi tɔ, mɑ sɔɔlɑ-təɣɩ.

³⁶Ponɑ mɑ hʋwɛɛ kɛ nyɑ́ kʋsəsɩɩtʋ kiŋ. Tɑɑ ponɑ-yɛɣɛ liɣitee luluɣu cɔlɔ.

³⁷Ləsɩ mɑ ɩsɛ kɛ kpɑɩ nyəm tɔɔ. Tɑɑ yele nɑ mɑ́ pɑɑsənɑ kpɑɩ nyəm. Yele nɑ mɑ́ wɛɛ nyɑ́ luɣu nyəntʋ tɑɑ.

³⁸Lɑ nyɑ́ təmlɛ tʋ mɑɣɑ nti n kɑ sɩɩwɑ mpɑ pɑ nyɑŋnɑ-ŋ tɔ.

³⁹Mɑ wɛnɑ fɛɛlɛ sɔɣɔntʋ kɛ́. Tɑɑ yele nɑ tə́ mɑɣɑnɑ-m.

⁴⁰Nti mɑ nyɩɩləɣɩ sɔsɔm tɔɣɔlɛ nyɑ́ kʋtʋtʋtʋ lɑpʋ. N kɛ́ siɣisilu kɛ́, hɑ-m weesuɣu.

⁴¹Tɑcɑɑ nyɑ́ kʋpɑntʋ ɩ́ kɔɔ mɑ tɔɔ nɑ ń yɑ mɑ nyʋɣʋ ɩsɩɩ n sɩɩʋ tɔ.

⁴²Nɑ mɑ́ wɛɛnɑ nti mɑɑ cɔ mɑ tʋʋlɑɑ tɔ. Mpi tɔ, nyɑ́ kʋyɔɣɔtʋtʋ kɛ mɑ lɑpɑ nɑɑni.

⁴³Tɑɑ ləsɩ tɑmpɑnɑ tɔm kɛ mɑ nɔɣɔ tɑɑ təkpɑtɑɑ. Nti n mɑɣɑsəɣɩ nyɑ́ tɑɑ tɔɣɔ mɑ tɑŋɑɑ.

⁴⁴Mɑɑ tɔkɩ nyɑ́ kiiu kɛ pɑɑ kʋyɑkʋ ŋkuɣu tɑm tɔɔ kɛ́.

⁴⁵Mɑ cɑɑ mɑ́ tɔnɑ mɑ təɣɩ. Mpi tɔ, nyɑ́ kʋsəsɩɩtʋ kɛ mɑ pɛɛkəɣɩ.

⁴⁶Mɑɑ heeli nyɑ́ kʋsəsɩɩtʋ tɔm kɛ ɑwulɑɑ, fɛɛlɛ kɑɑ wɛɛ-m.

⁴⁷Nyɑ́ kʋsəsɩɩtʋ kɛ mɑ lɑŋlɛ hɛɛnɑɑ. Mpi tɔ, mɑ sɔɔlɑ-təɣɩ.

⁴⁸Mɑ nɩɩkənɑ nyɑ́ kʋsəsɩɩtʋ kɛ́. Mɑ sɔɔlɑ-təɣɩ. Mɑ cɑɑ mɑ mɑɣɑsɩ-təɣɩ mɑ tɑɑ kɛ́.

⁴⁹Tɔɔsɩ tɔm nti n kɑ heelɑ nyɑ́ təmlɛ tʋ mɑ́ tɔ tə tɔɔ. Ntɩ tə tʋnɑ-m nɑɑni.

⁵⁰Ntɩ tə hɛɛsəɣənɑ mɑ lɑŋlɛ kɛ mɑ wɑhɑlɑ tɑɑ. Nyɑ́ tɔm kʋpɑntʋ hɑɑkənɑ-m weesuɣu.

⁵¹Pɑɑ ɩsəcɑʋtʋnɑɑ woŋiɣi-m mɑ tɑ lɩɩ nyɑ́ kiiu tɑɑ.

⁵²Tɑcɑɑ mɑ tɔɔsəɣɩ nyɑ́ lɔŋtɑɑ hʋʋlɛ tɔm nɑ pə́ hɛɛsəɣɩ mɑ lɑŋlɛ.

⁵³Mɑ́ nɑɑkɩ ɑsɑɣɑɑ mpɑ pɑ lɔɔkɩ nyɑ́ kiiŋ tɔ, pɑ́ɑ́nɑ́ kpɑɑkɩ-m kɛ́.

⁵⁴Nyɑ́ kiiŋ tɔm kɛ mɑ yooki yontu kɛ timpi mɑ kɛ́ ɩkɔm tɔ.

⁵⁵Mɑ tɔɔsəɣɩ nyɑ́ hətɛ kɛ ɑhoo nɑ mɑ́ tɔkəɣɩ nyɑ́ kʋsəsɩɩtʋ.

⁵⁶Mpi pə kɛ́ mɑ nyəm tɔɣɔlɛ, sɩ mɑ́ tɔkəɣɩ nyɑ́ kʋsəsɩɩtʋ.

⁵⁷Mɑ lɛləɣɩ sɩ mɑ nyəntʋ ntɛ́ sɩ mɑ́ təŋ nyɑ́ kʋyɔɣɔtʋtʋ.

⁵⁸Mɑ wiikinɑ-ŋ nɑ mɑ lotu tənɑ, nyənɩ mɑ pətɔɔtəlɛ ɩsɩɩ n kɑ sɩɩʋ nyɑ́ nɔɣɔ tɔ.

⁵⁹Mɑ hʋʋ mɑ mpɑɑʋ tɔm kɛ mɑ tɑɑ, nyɑ́ kʋsəsɩɩtʋ kɛ mɑ cɑɑ təŋʋɣʋ.

⁶⁰Mɑ lɑkɩ nyɑ́ kʋsəsɩɩtʋ kɛ lɔŋ kɛ́ təcɑʋ. Mɑ kɑɑ yele nɑ tə́ leeli.

⁶¹Asɑɣɑɑ kɑtɔsɩ tɑmɑ-m kɛ́. Amɑ mɑɑ sɔɔkɩ nyɑ́ kiiu tɔɔ.

⁶²Mɑ kʋləɣɩ ɑhoo hɛkɑ nɑ mɑ́ sɑ́-ŋ́. Mpi tɔ, nyɑ hʋʋlɛ wɛ teu.

⁶³Mɑ kɛ́ mpɑ pɑ nyɑŋnɑ-ŋ nɑ pɑ́ tɔkəɣɩ nyɑ́ kʋsəsɩɩtʋ tɔ pɑ tɑɑpɑlʋ kɛ́.

⁶⁴Hɑɩ, Tɑcɑɑ, nyɑ́ kʋpɑntʋ sunɑ tɛtʋ. Sɛɣɛsɩ-m nyɑ́ kʋsəsɩɩtʋ.

⁶⁵Tɑcɑɑ n lɑpɑ kʋpɑntʋ kɛ nyɑ́ təmlɛ tʋ mɑɣɑ, ɩsɩɩ n kɑ yɔɣɔtʋɣʋ tɔ.

⁶⁶Sɛɣɛsɩ-m ləmɑɣɑsɛɛ kʋpɑnɑ nɑ nyəm. Mpi tɔ, mɑ tɛmɑ mɑ tɑɑ nɑ nyɑ́ kʋsəsɩɩtʋ kɛ́.

⁶⁷Lɔŋ ɩlɛ ye n tɑ hɔ mɑ ŋkpɑŋʋɣʋ mɑɑ tɔkəɣɩ nyɑ́ tɔm. Amɑ nɔɔnɔɔ mɑ təŋəɣɩ nyɑ́ kiiŋ.

⁶⁸N kɛ́ kʋpɑŋ kɛ́ nɑ kʋpɑntʋ lɑtʋ. Hʋlʋ-m nyɑ́ luɣu nyəntʋ.

⁶⁹Ɩsəcɑʋtʋnɑɑ pilisiɣi-m kɛ́ nɑ pɑ kɑloolɑɣɑ. Amɑ mɑ tɔkɑ nyɑ́ kʋsəsɩɩtʋ kɛ nɑ lotu kʋlʋmtʋ.

⁷⁰Pɑ ləmɑɣɑsɛɛ tɑɑ toowɑɣɑ ɩsɩɩ nim. Ɩlɛnɑ mɑ́ɑ́ hʋləsəɣɩ lɑŋlɛ nɑ nyɑ́ kiiu.

⁷¹Pə wɛ teu sɩ pə́ pɑsɑ-m kɛ́. Ɩlɛnɑ mɑ́ cɛkənɑ nyɑ́ kʋsəsɩɩtʋ.

⁷²Nyɑ́ nɔɣɔ tɑɑ kʋsəsɩɩtʋ kəlɑ-m teu kɛ wʋlɑ nɑ liɣitee wontu tuutuumɑ.

⁷³Nyɑ́ niŋ ŋmɑnɑ-m. Hɑ-m lɑɣɑtʋ nɑ mɑ́ kpɛləmənɑ nyɑ́ kʋsəsɩɩtʋ.

⁷⁴Mpɑ pɑ nyɑŋnɑ-ŋ tɔ pɑ nɑɑ-m nɑ pɑ lɑŋlɛ hʋləməɣɩ. Mpi tɔ, nyɑ́ nɔɔsɩ sɩɩʋ kɛ mɑ tɛɛləɣɩ.

⁷⁵Tɑcɑɑ, mɑ nyəmɑ́ sɩ nyɑ́ hʋʋlɛ siɣisɑɑ kɛ́. Nyɑ́ tɑmpɑnɑ təŋʋɣʋ tɔɔ kɛ́ n pɑsɑ-m.

⁷⁶Nyɑ́ kʋpɑntʋ ɩ́ hɛɛsɩ mɑ lɑŋlɛ ɩsɩɩ n kɑ sɩɩʋ nyɑ́ təmlɛ tʋ mɑɣɑ nɔɣɔ tɔ.

⁷⁷Hʋlʋ-m sɩ n sɔɔlɑ-m nɑ pə́ hɑ-m weesuɣu. Mpi tɔ, nyɑ́ kiiu kɛ mɑ lɑŋlɛ hɛɛkənɑ.

⁷⁸Pə́ liɣiti ɩsəcɑʋ nyə́mɑ mpɑ pɑ muɣuluɣu-m mʋsʋŋ tɔ. Mpi tɔ, nyɑ́ kʋsəsɩɩtʋ tɔm kɛ mɑ mɑɣɑsəɣɩ mɑ tɑɑ.

⁷⁹Mpɑ pɑ nyɑŋnɑ-ŋ tɔ pɑ́ kɔɔ mɑ kiŋ nɑ pɑ́ cɛkənɑ nyɑ́ kʋsəsɩɩtʋ.

⁸⁰Mɑɑ lɑ nyɑ́ luɣu nyəntʋ nɑ lotu kʋlʋmtʋ. Ɩlɛ fɛɛlɛ kɑɑ tɔɣɔ-m nyɑ́ kiŋ.

⁸¹Mɑ tɑŋɑ nyɑ́ nyʋɣʋ yɑpʋ kɛ tətɛɣɛtɛɣɛ. Nyɑ́ tɔm kɛ mɑ tɛɛləɣɩ.

⁸²Mɑ ɩsɛ tɛŋnɑ nyɑ́ nɔɣɔ sɩɩʋ kiŋ kɛ́, nɑ mɑ́ pɔɔsəɣɩ sɩ pəlee kɛ́ n kɑ hɛɛsɩ mɑ lɑŋlɛ?

⁸³Mɑ tɔnʋɣʋ cukɑ kpɑsɩ kɛ́ ɩsɩɩ kɔŋlɛ kɛ nyɔɔsɩ tɑɑ. Mɑ kɑɑ sɔɔ nyɑ́ kʋsəsɩɩtʋ tɔɔ.

⁸⁴Kʋyɛɛŋ ɩsənɑɣɑ pə kɑɑsɑ nyɑ́ təmlɛ tʋ mɑ? Wɑɑtʋ wei kɛ́ n kɑ́ hʋʋnɑ mpɑ pɑ tʋɣʋ-m wɑhɑlɑ tɔ?

⁸⁵Ɩsəcɑʋtʋnɑɑ huliɣinɑ mɑ nɔɣɔ tɔɔ kɛ́ pɔɔŋ, pɑɑ təŋəɣɩ nyɑ́ kiiu kɛ pɑɑ pəcɔ.

⁸⁶Nyɑ́ kʋsəsɩɩtʋ tənɑ kɛ́ kʋsiɣisitʋ kɛ́. Pɑ tʋɣʋ-m wɑhɑlɑ kɛ mʋsʋŋ kɛ́, wɑɑsɩ-m.

⁸⁷Pɑ kɑɣɑ pɑ hu-m nɑ pɑ́ kʋ-m ɩlɛ mɑɑ lɔɔkɩ nyɑ́ kʋsəsɩɩtʋ.

⁸⁸Hɑ-m weesuɣu kɛ nyɑ́ kʋpɑntʋ tɔɔ, ɩlɛnɑ mɑ təŋ nyɑ́ kʋsəsɩɩtʋ.

⁸⁹Hɑɩ, Tɑcɑɑ, n wɛ tɑm tɔɔ kɛ́. Nyɑ́ tɔm cɑɣɑ teu kɛ ɩsɔtɑɑ kɛ́.

⁹⁰Kʋpɑntʋ nti n lɑkɩ tɔ tɩɩ tɛŋ. Nyɑ́ sɩɩnɑ tɛtʋ nɑ tə nyɔɔwɑ teu.

⁹¹Nyɑ́ kʋsəsɩɩtʋ tɔɔ kɛ́ pə tənɑ pə cɑɣɑ teu kɛ sɑŋɑ. Mpi tɔ, pə tənɑ pə lɑkɩ-ŋ təmlɛ.

⁹²Ye mɑ lɑŋlɛ tɑɑ hɛɛnɑ nyɑ́ kiiŋ, mɑɑ lepɑ mɑ wɑhɑlɑ tɑɑ kɛ́.

⁹³Mɑ kɑɑ sɔɔ nyɑ́ kʋsəsɩɩtʋ. Ntəɣɩ n hɑɑkənɑ-m weesuɣu.

⁹⁴Mɑ kɛ́ nyɑ́ nyəŋ kɛ́, wɑɑsɩ-m. Mpi tɔ, nyɑ́ kʋsəsɩɩtʋ kɛ mɑ pɛɛkəɣɩ.

⁹⁵Asɑɣɑɑ cɛŋəɣɩ-m kɛ́ sɩ pɑ kʋɣʋ-m. Pɑɑ nɑ mpʋ nyɑ́ kʋsəsɩɩtʋ kɛ mɑ keŋnɑ ŋkpɑŋŋ.

⁹⁶Mɑ nɑwɑ təmɑ kʋpɑnɑ tənɑ tənɑsɩ. Amɑ nyɑ́ kʋsəsɩɩtʋ fɛɩ tənɑɣɑ.

⁹⁷Mɑ sɔɔlɑ nyɑ́ kiiu kɛ sɔsɔm kɛ́. Kʋ tɔm kɛ mɑ mɑɣɑsəɣɩ kʋyɛɛŋ tənɑ.

⁹⁸Nyɑ́ kʋsəsɩɩtʋ hɑɑkɩ-m ləmɑɣɑsɛɛ nɑ pə́ kəlɩ mɑ kolontunɑɑ. Mpi tɔ, tə wɛ mɑ kiŋ kɛ tɑm tɔɔ kɛ́.

⁹⁹Mɑ tɛɛ mɑ sɛɣɛsəlɑɑ tənɑɣɑ nyəm. Mpi tɔ, nyɑ́ kʋsəsɩɩtʋ kɛ mɑ mɑɣɑsəɣɩ.

¹⁰⁰Mɑ tɛɛ kʋkpɑtəlɑɑ kɛ ləmɑɣɑsɛɛ. Mpi tɔ, mɑ tɔkɑ nyɑ́ kʋtʋtʋtʋ.

¹⁰¹Mɑ kisɑ mpɑɑŋ ɩsɑɣɑŋ tɑɑ tɔntɛ sɩ mɑ́ pəsɩ nɑ mɑ́ tɔkɩ nyɑ́ tɔm.

¹⁰²Mɑɑ hɑtələɣənɑ nyɑ́ kʋsəsɩɩtʋ. Mpi tɔ, nyɑ́ sɛɣɛsəɣənɑ-m.

¹⁰³Nyɑ́ tɔm wɛ leleŋ kɛ mɑ tɑntɑhɑɑʋ tɑɑ kɛ́. Tə kəlɑ tɩɩŋ kɛ leleŋ kɛ mɑ nɔɣɔ tɑɑ.

¹⁰⁴Nyɑ́ kʋsəsɩɩtʋ pəsəɣənɑ-m nyəntʋ nɑ mɑ́ kisiɣi pɔpɔtʋ tənɑ.

¹⁰⁵Nyɑ́ tɔm wɛnnɑ ɩsɩɩ fətəlɑ kɛ mɑ nɔɔhɛɛ tɛɛ nɑ pə́ nɑɑkɩ mɑ mpɑɑʋ tɑɑ.

¹⁰⁶Mɑ tuuki sɩ mɑɑ tɔkɩ nyɑ́ kʋsəsɩɩtʋ. Mɑɑ lɑ ɩsɩɩ mɑ tuuwɑ tɔ.

¹⁰⁷Tɑcɑɑ, pə pɑsɑ-m teu kɛ́. Yele nɑ mɑ́ wɛɛnɑ weesuɣu ɩsɩɩ n yɔɣɔtʋɣʋ tɔ.

¹⁰⁸Hɑɩ, Tɑcɑɑ, mʋ mɑ sələmʋɣʋ ɩsɩɩ kʋcɔɔʋ. Sɛɣɛsɩ-m nyɑ́ kʋsəsɩɩtʋ.

¹⁰⁹Mɑ weesuɣu wɛ ɑsolɑ tɑɑ kɛ́ tɑm kɛ́. Amɑ mɑ kɑɑ sɔɔ nyɑ́ kiiu tɔm.

¹¹⁰Asɑɣɑɑ nyəkɩ-m kɑtɔsɩ kɛ́. Amɑ mɑɑ hɑtələɣənɑ nyɑ́ kʋsəsɩɩtʋ.

¹¹¹Nyɑ́ kʋtʋtʋtʋ kɛ-m kʋpɑntʋ sɔsɔɔntʋ kɛ tɑm tɔɔ kɛ́, tə hɛɛsəɣɩ mɑ lɑŋlɛ.

¹¹²Mɑ tʋ mɑ tɑɑ sɩ mɑ́ təŋ nyɑ́ kʋsəsɩɩtʋ*fɑ* hɑlənɑ mɑ səm.

¹¹³Mɑ tɑɑ kpɑɑnɑ ɑtɑɑ nɑ ɑ wɑɑlɩ yəlɑɑ kɛ́. Amɑ mɑ sɔɔlɑ nyɑ́ kiiu.

¹¹⁴Nyɑɣɑlɛ mɑ kpʋlʋɣʋ tətʋlɛ nɑ mɑ kentulu. Nyɑ́ kʋyɔɣɔtʋtʋ kɛ mɑ tɛɛləɣɩ.

¹¹⁵Asɑɣɑɑ mɛ ɩ́ hɑtələnɑ-m. Ɩlɛnɑ mɑ́ tɔkɩ mɑ Ɩsɔ kiiŋ.

¹¹⁶Te-m ɩsɩɩ n kɑ sɩɩʋ nyɑ́ nɔɣɔ tɔ nɑ mɑ́ hiki weesuɣu. Nyɑɣɑ mɑ tɛɛləɣɩ, tɑɑ tʋ-m fɛɛlɛ.

¹¹⁷Wɛɛ mɑ tentu nɑ pə́ yɑ mɑ nyʋɣʋ. Ɩlɛnɑ mɑ pɑɑsənɑ nyɑ́ kʋsəsɩɩtʋ kɛ tɑm tɔɔ mɑ́ tɑɑ hɛɛsɩ.

¹¹⁸N tɔɣɔnəɣɩ mpɑ pɑɑ təŋəɣɩ nyɑ́ kʋsəsɩɩtʋ tɔɣɔ. Mpi tɔ, pɑ tʋsʋɣʋ ɩɩ wɑɑsəɣɩ pʋlʋ.

¹¹⁹N lɔɔkɩ ɑtɛ ɑsɑɣɑɑ tənɑɣɑ ɩsɩɩ hute. Pə tɔɔ kɛ́ mɑ sɔɔlɑ nyɑ́ kʋsəsɩɩtʋ.

¹²⁰N tʋ nyɑ́ sɔɣɔntʋ kɛ mɑ tɑɑ nɑ mɑ tɔnʋɣʋ seliɣi, nɑ mɑ́ nyɑŋnɑ nyɑ́ hʋʋlɛ.

¹²¹Mɑ tɔkɑ nyɑ́ kiiu nɑ nyɑ́ siɣisuɣu kɛ́. Tɑɑ pɛtɩ-m mɑ ŋmɑkəllɑɑ.

¹²²Sɩɩ nyɑ́ təmlɛ tʋ mɑɣɑ nɔɣɔ sɩ n kɑ́ sənɑ-m. Tɑɑ yele nɑ kɑlɑmpɑɑnɩ nyə́mɑ muɣulu-m.

¹²³Mɑ tɑŋɑ nyɑ́ nyʋɣʋ yɑpʋ. Mɑ tɑŋɑ ɑkɑɩtʋ nti tə tɔm n sɩɩwɑ nɔɣɔ tɔ nɑ mɑ ɩsɛ tɛŋ.

¹²⁴Lɑ nyɑ́ təmlɛ tʋ mɑɣɑ kʋpɑntʋ, nɑ ń sɛɣɛsɩ-m nyɑ́ kʋsəsɩɩtʋ.

¹²⁵Mɑ kɛ́ nyɑ́ təmlɛ tʋ kɛ́, hɑ-m lɑɣɑtʋ nɑ mɑ́ nyɩ́ nyɑ́ kʋsəsɩɩtʋ.

¹²⁶Tɑcɑɑ pə tɑlɑɑ sɩ ń lɑ pʋlʋ. Pɑ yɔkəɣɩ nyɑ́ kiiu kɛ́.

¹²⁷Pə tɔɔ kɛ́ mɑ sɔɔlɑ nyɑ́ kʋsəsɩɩtʋ nɑ pə́ kəlɩ wʋlɑ kʋpɑmpɑŋ.

¹²⁸Pə tɔɔ kɛ́ mɑ nyənəɣɩ nyɑ́ kʋtʋtʋtʋ tənɑɣɑ kʋsiɣisitʋ nɑ mɑ tɑɑ kpɑɑkənɑ pɔpɔtʋ.

¹²⁹Nyɑ́ kʋsəsɩɩtʋ kɛ kʋpɑmpɑntʋ kɛ́ pə tɔɔ kɛ́ mɑ təŋəɣɩ-tɩ.