Yona (Jona) 4

1

2

3

4

¹Yona gamona doa mana baguli saing ramramona haring.

²Baing sabu mana Toxoratamona ba, “O Toxoratamona, bungina ngawauyu yabagia, ngaharua bila li! Namua na ngaluki mala sap Tasis. Ngaxabiau ung Urana usingangam kubolu xaiyam, ung sanga ba atim sala sap te saing ung murum haringing sibuna mam bungingbunginalo. Bungingbunginalo uxauxau mana xugia hatumingama saing uhaxuya lipudi mauxangadingdi te.

³Tauna Toxoratamona usahi walingagua. Namua na ngamati alaing xai sibuna, ne ngawauyu alaing xai te.”

⁴Ne Toxoratamona haxuya ba, “Gamiangamga baguli bola maring, bo?”

⁵Tauna Yona sauya long sabanga saing rung longga bagu xaidaba haing. Tongtongia xahi yanggam la lo, rung yonggaxinia, saing ragu mana baraxinta bagu laing sok mana long sabangga ba.

⁶Baing Toxoratamona, ina Urana, mogu waxu tela saing ria sok etua mana Yona sanga'm sina yongga mana toxona xaung sangga saliang te. Baing Yona yaha sibuna mana waxua ba.

⁷Ne buragina buraraging sibuna Urana mogu moxamoxa tela ma saing gaxuti waxua bu mutuxu.

⁸Bungina xaidaba haing Urana mogu yang saliana ma mana longga xaidaba haing, saing xaidaba sala Yona toxona sibuna, sanga'm maxandi dili saing bo ba makmatia. Bo ba mati saing harua ba, “Na ngamati alaing xai sibuna, na ngawauyu alaing xai te.”

⁹Ne Urana harua na Yona ba, “Gamiangama mana waxua baguli bola maring, bu?” Yona haxuya ba, “Wane. Gamiangagua maringgu. Lugua sala haringing sibuna sanga ba ngamati.”

¹⁰Ne Toxoratamona harua ba, “Waxua baguli owa mana yambong taininau ne yambong tela mutuxu; ung guwasa mana te saing ung gulibu sok te. Ne ung gusinga olang mana!

¹¹Ne Ninibe 120,000 lipu haing ludingdi dimesa mana kubolu tela te duwa saing asaxa nangnangdi xumana xauna duwa. Ne long sabangga lo sanga ba ngausinga te?”