1Toxoratamona sina haruangua na Yona, Amitai garanoa, ba:
2“Umesa ula mana long sabanga Ninibe, bu usina haruanga haringinoa na lipudi namua na ngabagu dilibu kubolu diang xumana.”
3Ne Yona bo ba sauya Toxoratamona saing luki mala Tasis. Tauna, ina ri mala ha Yopa, baing sok mana waga tela bo ba ila Tasis. Ina gim wagua saing ila mana, bo ba sauya Toxoratamona bu luki mala.
4Baing Toxoratamona soxi yang haringinoa saing sok tegia, baing kuya xaung yang haringinoa sok sanga'm wagua bo ba xuruti.
5Waga lipuxing uingamdi atiding ditubu mading saing ding taining tainina daxaba mala rangua urana dingiadi. Dibola wagua mauxana buk, baing diting xalaxaladi mari tegia. Baing Yona ri muga waga lunia saing kinu hadali.
6Tauna, waga moxonoa sok mana Yona saing bala ba, “Uraxata ukinu ba? Umesa bu uwagi mana urana ungia! Sangam usinga kira bu tamati te.”
7Ne waga lipuxing uingamdi dahangixaya ba, “Tauna, tatuba tuak tela bu tasok mana lipu baruamta axamang namua.” Dituba tuaga baing hatanga Yona yanoa masok.
8Baing dibala ba, “Ubaxanga gaxarea axamang namua bagu mauxanganoa bo ba sok makira ba! Uraxata mua la li? Uma bi ma? Ung baru yabanta? Ung bakbak baruamta?”
9Yona haxuya haruanga ba, “Nga Hibru tela, nga ngasabu mana Toxoratamona, ina Urana sabalunam, ina tongtongia tek xaung titi.”
10Waga moxondi dimaxuwa haringing sibuna baing dibala ba, “Uraxata ulibu bila ba?” (Ding daxabiau ina bo ba luki sangua Toxoratamona, namua na ina baxanga nadi ba.)
11Yanga baguli haringing sibuna baing rubadi dimesa sabanga sibuna. Binabu duxusunga ba, “Am gariaung baru bu tega manilu mam?”
12Baing Yona haxuya ba, “Aiti nga mesa bu ating nga mari tegia, bu tega manilu. Ngaxabiau nga sibugu namuxigua na ruba sabangadi disok mang ba.”
13Ne lipu uingamdi dui haringina ba daxap wagua mala singia. Ne tega doa sibuna namua na ruba dimesa sabanga sibuna sanga disok haxek singia te.
14Tauna, duwagi mala rangua Toxoratamona ba, “O Toxoratamona, am gasabu, labu uyungam bu am gamati tai mana kubolu bagu am galibu mana lipua li. Labu uta'm haruangia tai mana am gaung lipu mauxangang te goam, namua na ung, O Toxoratamona, ung gulibu murungamia.”
15Baing daxap Yona saing diting mari tegia, baing tega manilu.
16Mana la baguli lipudi dimaxuwa sibuna mana Toxoratamona, baing ditata saing dita bilingadi mala rangua.
17Tauna, Toxoratamona soxi song sabanga mana ba ngaru Yona, baing Yona wa song gamong lunia sanga'm xaidap luwa hiliana yambong luwa hiliana.
