Jonah 4

1

2

3

4

¹Me dabuy Jonah e ren’nem, me yib e damumuw ngak.

²Ma aram me meybil ni ga’ar, “SOMOL, gu be fithem, gathi gog faram u m’on ndawor gu pag e tabinaw rog, ni irera’ e n’en ni ga ra rin’? Aram fan ni gu athamgil nggu mil nga Tarshish! Ya gu manang ni gur ba Got ni gab sumunguy ma ri ga ma runguy e girdi’; ma gubin ngiyal’ ni gab gumaen’, ma gubin ngiyal’ ni gab gol, ma gubin ngiyal’ ni kam fal’eg rogom kam par nrayag ni ngam thiliyeg lanin’um nge dab kum pi’ e gechig.

³SOMOL, mu thang e pogofan rog, ya kabfel’ ni gu ra yim’ ko bin ni nggu par ni gub fos.”

⁴Me fulweg SOMOL ni ga’ar, “Mang mat’wum ni ngam damumuw?”

⁵Me yan Jonah nga wuru’ fare binaw ko ba’ ni ngek, me yan i par nga but’. Me ngongliy bang i ban’en nge naf ko tagalul’ riy, ni be son ni nge guy e n’en ni nge buchi u Nineveh.

⁶Me gagiyegnag SOMOL ni Got ba ke gek’iy” nge ilal nge yib i upunguy Jonah, nge pi’ e tagalul’ ngak ni fan e nge dabi gafgow ko gowel, mri felan’ Jonah ko fare ke gek’iy.

⁷Machane fa’ani reb e rran riy, ni be puf e woch, me gagiyegnag Got ba ololay nge li’ fare ke gek’iy nge yim’.

⁸Ma fa’ani tolang e yal’ i yan, me l’oeg Got e nifeng nib gowel nge yib ko ngek, me chugur ni nge aw Jonah nga but’ ni bochan gowelngin e yal’ ni be aw ngak. Me finey ni manga yim’. Me ga’ar, “Kabfel’ ni gu ra yim’ ko bin ni nggu par ni gub fos.”

⁹Machane me ga’ar Got ngak, “Mang mat’wum ni ngam damumuw u murung’agen fare ke gek’iy?” Me fulweg Jonah ni ga’ar, “Ri bay mat’wug ni nggu damumuw nggu finey ni kabfel’ ni nggum’!”

¹⁰Me ga’ar SOMOL ngak, “Re ken’ey e ilal u ta’ab nep’, me reb e rran riy me yim’, dariy bochi ban’en ni mu rin’ ngay, gathi gur e mu guy rogon nge ilal, machane ke kireban’um ngay!

¹¹Ere gur dab gu runguy yu Nineveh? Ya bbinaw ni ba ga’ nib pag 120,000 e bitir ni bay riy ndawor ra bucheged ban’en, ma ku er rogon e garbaw ni pire’ ni bay riy.”