Diyona 4

1

2

3

4

¹Bi Diyona mote i wai nuwavisu bi i medi banina Bada lavedi mote i kovoḡidi.

²Bi Bada lisinemo i laupalina gado, “Oo Bada laḡannemo egu malagaimo e miyamiya bi em yawasana e sibe aubaina mote yà giuwatawatam, taunana aubaina waiḡapa e gose kamaḡem bi e nawa Talisis. Tagu e sibem te Maimaituwa laulau kivivisuvisum bi laulau nuwatoim, mote medimedi makaim. Tam em nuwavaina kenakena nonoḡina aubaina, nuwam kuna vitale te mote ku kovoḡidi.

³Taunana aubaina miya e daboka bi i visu te yà peki.”

⁴Bi Bada, Diyona ena giu i wai munena gado, “Em sibe bai, dabanemo kwa medimedi.”

⁵Ḡome Diyona taun i potiyovo kamaḡe bi i nawa beubeu yawaninemo i miyatulu. Ena kape i voiye bi dibunemo i miya bi i waiwai mayavai te Ninivemo bai ya tubuḡa.

⁶Kamaina bi Bada, Maimaituwa kai i wai anine te ḡome i duga saḡa, te Diyona ena wagulu i tubuḡa, te yai wagulu kauwa. Bi tana mba kaina i wai nuwavisu gulate.

⁷Bi laḡan i sako olaolalemo Maimaituwa mwatamwata i giukamaḡe te mba kaina i koi wai poki.

⁸Laḡannemo suwala i lovotava ba Maimaituwa suwala i voiye te i wai poya gulata. Bi poya ma yavalina i lausuve te Diyona i poyapoyana eete i laugilibubu. Ḡome i ḡoe te maso i peki. Bi i giuna gado, “I visu te yà peki kaka yà miyamiyana.”

⁹Ḡome Maimaituwa, Diyona i giuwena gado, “Em sibe bai bi kaina dabanemo kuna medi?” Bi Diyona, Bada ena giu i waimunena gado, “Tagu egu medi gulata, i visu te yà peki.”

¹⁰Kamaina bi Bada, Diyona i giuwena gado, “Tam kaina mote ku wadi ee ku wai duga bi kwa wai nuwaboyae. Niga kaina ba dudubala ḡemota noponemo i duga saḡa bi dudubala wai labunemo i poki.

¹¹Giukauwa te niga taunina e launuwatoiye, banina ei nuwaboya gulata te lava wapana 120 tausan i waimuli, mainana kota ḡamoḡamo wapedi. Ninivemo lava sa miyamiyana, tedi visu bi gebo sa voivoiyena mote si sibe.”