Wɛ̃nalɛ 3 - Bibeli Luayãtaalá

Wɛ̃nalɛ 3

Click on verse(s) to share them!

¹Má dɛ gbɛ̃́ pↄ́ Dii pↄkũma gotↄ̃̀wà à taasi è ũɛ.

²À ma ya à ma kpa gusiauɛ, i kɛ gupuau no.

³Mámɛ ìↄ ↄtↄ̃a gↄↄpii, a láaa vĩo.

⁴A tò ma mɛ ibàba, à ma wáↄ wìwi.

⁵À kona ń mɛkɛmuunao lìamazi lán bĩ́iwa.

⁶A tò ma ye gusiau lán gbɛ̃́ pↄ́ gà à gɛ̃̀gɛ̃ↄwa.

⁷À gĩ lìamazi, má fↄ̃ bↄo, à mↄ̀ gala gbiaↄ kpàmɛɛ.

⁸Ma wiilɛ̀, ma suabalɛ zùaàzi, kási i swã́sɛmazio.

⁹À gĩbò ń gbɛ̀ gbɛ̃̀nɛↄ, a pã̀ ma zɛ́a a dɛ̀.

¹⁰À gↄ̃̀mɛɛ lán gbɛaana pↄ́ naalɛa ge nↄ̀ↄmusu pↄ́ ye láuwa.

¹¹À zɛ́ sìa, à ma taitai, à ma ↄ̃̀ↄkpà.

¹²À a ka kpà sáa, ↄ̃ à ma dilɛ pↄ́ pↄ́ á pá ũ.

¹³À a gbàla kaↄ tↄ̃̀ ma baluwa.

¹⁴Ma gↄ̃ ma gbɛ̃́ↄnɛ pↄ́ yáalↄa ũ, aa lɛdàmanↄ ḿpii.

¹⁵À blɛ kĩ̀sã ò'omɛɛ, à ma kaka ń gↄ̃io.

¹⁶À gbɛ̀kↄsↄ kpàa, ma swaa ɛ̀'ɛ, à ↄ̃zↄ̃̀a tufua.

¹⁷À ma kɛ̃ aafiawa, má dↄ̃ bↄ́ wì mɛ nama lↄo.

¹⁸Ɔ̃ ma mɛ̀, ma gↄ̃ yɛ̃̀ɛɛsai, ma wɛ́ dↄ Diizi lↄo.

¹⁹Ma liaaliaaa wɛ́tɛ̃a guu dↄmagu, a dɛmɛɛ gↄ̃i ń konao ũ.

²⁰Yã́pi ìↄ dↄamagu maamaaɛ, ↄ̃ ma kúsu kwɛ̀.

²¹Yã́ pↄ́ ìↄ dↄmagu ì to ma nↄ̀sɛ àↄ daa doũn kɛ:

²²Dii gbɛ̃kɛ mɛ́ tò wi midɛo, aà wɛ̃nadↄ̃anɛ lí láao.

²³Aà yeańzi ìↄ dafu lá gu lɛ́ dↄɛ, a náai vĩ zↄ̃ↄ.

²⁴Ma mɛ̀, Dii mɛ́ ma baa ũ, a yã́i má sↄ̃́aaàzi.

²⁵Dii maa gbɛ̃́ pↄ́ an wɛ́ dↄaàziↄnɛ, gbɛ̃́ pↄ́ aalɛ aà kĩ́i wɛɛlɛↄ.

²⁶Wɛdↄa Diizi zↄasai à ń suaba mɛ́ maa.

²⁷A maa gbɛ̃́ taasi fↄ̃ a ɛ̀waasogↄↄɛ.

²⁸Aà zↄ̃lɛ ado kílikili, asa Dii mɛ́ aà dàu.

²⁹Aà a mipɛlɛ bùsuu, iↄ wɛdↄaàzi.

³⁰Aà a gɛɛ dↄ gbɛ̃́ pↄ́ ye a sãnkɛɛ, i to wí a kṹ.

³¹Asa Dii lí gí gbɛ̃́i à aà tò we gↄↄpiio.

³²Baa tó à aà dà taasiu, ì aà wɛ̃nagwaɛ a gbɛ̃kɛ zↄ̃ↄ lɛ́u.

³³Dii lí gbɛ̃́ swã́gaga ń pↄnaoo, ìli aà da taasiu pão.

³⁴Tó wàlɛ ↄ̃zↄ̃ zĩ̀zↄↄwa dṹnia guu guei,

³⁵tó wàlɛ ń yã́ málɛnɛ́ Lua Musude kpɛ́ kpɛɛlɛ,

³⁶tó wàlɛ yã́kpalɛkɛ gbɛ̃́ↄnɛ kolea, Diipi lɛ́ eo lé?

³⁷Démɛ a fↄ̃ mɛ á kɛ, i kɛ, tó Dii i a zɛbↄɛ̀o ni?

³⁸Vãi ń maao ì gbɛ̃́ le Lua Musude lɛ́ saia?

³⁹Gbɛ̃nazĩn bɛ̃́ɛ nɛ́ zɛ́ vĩ à zↄaka a duuna ĩadama yã́ musuo.

⁴⁰Wà wɛ́tɛ wá kuai wà gwa maamaa, wí ɛa su Diiwa.

⁴¹Wà ↄdↄ Luazi musu ń nↄ̀sɛmɛndoo, wí mɛ:

⁴²Wa duunakɛ̀, wa swã́gbãakɛ̀, ↄ̃ ni sùuukɛwanↄo.

⁴³N pↄkũma kàkanla, n pɛwá, n wá dɛdɛ wá wɛ̃nagwasai.

⁴⁴N sↄlↄ luabɛpuanau, kɛ́ ńsu wá wabikɛa mao yã́i.

⁴⁵N wá dílɛ ukↄlↄ ge bìsa ũ buipãleↄ guu.

⁴⁶Wá ibɛɛↄ swaa bìiwá ḿpii.

⁴⁷Vĩa ń zua baiuo mɛ́ gↄ̃̀wɛ̃ɛ ń músio ń kaalɛao.

⁴⁸Ma wɛ́'i lɛ́ bàalɛ lán swa'iwa ma gbɛ̃́ↄ tↄ̀lↄzↄ̃a yã́i.

⁴⁹Ma wɛ́'i aↄ kwɛ zɛsaiɛ, aↄ kã́maboa vĩo,

⁵⁰e Dii gɛ wɛzu zĩ́lɛ à e.

⁵¹Yã́ pↄ́ ma wɛ̃́lɛ nↄɛↄ lè, kɛ́ ma wɛsìɛ, ma nↄ̀sɛ ↄ̃̀ↄkpà.

⁵²Gbɛ̃́ pↄ́ aa íbɛlɛsɛ̀manↄ pãↄ lɛ́ ma wɛ lán bãwaɛ.

⁵³Aa ye ma wɛ̃ni bↄlia ɛu, aa ma papa ń gbɛo.

⁵⁴Í dàmala, ↄ̃ ma mɛ̀ ma gaɛ sa.

⁵⁵Kua za ɛ̀ títiu we ma lɛzùnzi, Dii.

⁵⁶Kɛ́ ma suaba wiilɛ̀, ń mà, ni swã́kpa ma yã́ao.

⁵⁷Kɛ́ ma lɛzùnzi, n sↄ̃mazi, n mɛ̀ másu vĩakɛo.

⁵⁸Dii, n zɛmanↄ yã́kpalɛu, n ma wɛ̃ni sì.

⁵⁹Ń è lá wà ma yã́ màlɛmɛɛ, ↄ̃ n yãnakpàa, Dii.

⁶⁰Ń è lá aa ye tↄsia ń vãi pↄ́ aa a lɛkpàaĩmazio píi.

⁶¹Dii, ń mà lá aa ma sↄ̃sↄ̃ ń vãi pↄ́ aa a lɛkpàaĩmazio píi.

⁶²Ma ibɛɛpiↄ ìↄ lɛ́pɛ kↄ̃ swã́u, aaìↄ lɛkpaaĩmazi gↄↄpiiɛ.

⁶³Ǹ ń zↄ̃lɛa gwa ń ń fɛlɛao, ma tↄ́ mɛ́ gↄ̃̀ ń lɛ ũ.

⁶⁴Dii, fĩabonɛ́ a zɛ́wa, kɛnɛ́ an yãkɛa lɛ́u.

⁶⁵To an swã́ gbãakũ, ní láaizĩmá.

⁶⁶Pɛ́má ń pↄfɛ̃o, ní ń tↄ̀lↄzↄ̃ dṹniau.

BREAK EVERY YOKE
Creating and distributing free Bible translations for the web and mobile phones to every tribe on Earth. Click to learn how you can support this work!

Wɛ̃nalɛ 312345

Wɛ̃nalɛ 3
1
2
3
4
5