Siyapa 3

1

3

¹⁹Raghanina yagu kabikwarakwara, da yagu wiikedakeda kubura rabarabae anoghosidi, na noko damina ware rarima kawaororana naboni.

²⁰Nokodi sawara anoghosidi, na nuwanuwagu yabero kirakii.

²¹Bi gegha da yagu noghota yaveramagha da Yawe God anoghosi na wiigeruwana adagumayeni.

²²Yawe God yana nuwamonika kiiravidaye na getughurinana, bi yana wiinuwaghaneyana gegha iyakovikovina;

²³didibara patepatena yanavereyana na yanono wiikarukaru, touna nonowa yaberabera ware metagha ivisuwonana naboni.

²⁴Tagumani awonena mayegu bo, “Yawe God na nonowa gwabiguve, na getana awaki ayakayokayoveni, noko kiiravine tagu anitumaghanena kirakiiyeni.”

²⁵Raghanina wawaya yadi tumagha Yawe God gwabine bi sinoyeni, na touna miisena yabera toudi biiyadi.

²⁶Na noko biidi imiise da touda tanikoyakoyagha wiiraborabobo touna kiiravine, basuna touna iniyawiida.

²⁷Imiise bi touda akowa tana kabi da Yawe God tanakabisisireni, raghanina touda patana woudayena.

²⁸Raghanina Yawe God piropiro debadae yatoura, na touda duma tayamakeyowogha tayiraborabobo,

²⁹touda tayituwapore oghogheyana, bi mayiyida siyayowogha dobodobove na, meboda God iyiwiiteda.

³⁰Raghanina wawaya tana nawanawam inarouvi, bo inisisiya berovem, na kiwaghasineni da awaki ibera.

³¹Kiiravine Yawe God geyana wawaya iyamiimiiri kubutena wagiyedina.

³²Raghani mududiye na kabikwarakwara yapiikeni, bi kate bada wiinuwanuwaneyana yidebeni touda biiyadi, basuna yana nuwamonika touda kiiravidaye na getughurinana.

³³Wiisuwona, raghani mududiye na sinivisi da nuwapoya yapiikedi wawaya biiyadi, bi gegha, touna geiyinuwamiise da nokodi bera inaberana.