Wɛ̃nalɛ 4 - Bibeli Luayãtaalá

Wɛ̃nalɛ 4

Click on verse(s) to share them!

¹Vua siakũ̀ɛ fá! Vua tɛ̃ɛtɛ̃ɛ lì! Lua kpɛ́ gbɛ̀ bɛɛɛdeↄ fã̀aa zɛ́kpaaↄu píi.

²Siↄnade pↄ́ wàlɛ ń bɛɛɛ lɛɛũ ń vuao yãaↄ, wà ń dílɛ lán gĩ̀ ooↄwa, oobona ↄzĩɛ.

³Baa gbɛ̃gbonaↄ ì yↄ̃́ kpá ń nɛ́ↄwa aa miɛ. Ma gbɛ̃́ↄ sↄ̃ aa pãsĩkũ̀, aa gↄ̃̀ lán taataawa gbáau.

⁴Nɛ́ yↄ̃minaↄ lɛ́na nàalɛ ń lɛ́ musu imi yã́i. Nɛ́ↄ lɛ́ pɛ̃ɛ gbɛa, kási gbɛ̃e lɛ́ línɛ́o.

⁵Nɛ́ pↄ́ aaì blɛ maa ble yãaↄ gↄ̃̀ gɛmbɛ̃ɛnaↄ ũ zɛaↄ guu. Nɛ́ pↄ́ wà ń gwá ń pↄkasa ↄdeↄ lɛ́ pↄblea wɛɛlɛ bisau tufua.

⁶Ma gbɛ̃́ↄ vãikɛa dɛ Sↄdↄũdeↄ duunala. Lua Sↄdↄũpi suumpà kã́ndoɛ, gbɛ̃e i ↄdawào.

⁷An kíaↄ zɛ̃a dɛ bùntafaa yãa, an pípia dɛ vĩ'ipua. An mɛↄ tɛ̃a lán lubiiwa, an zɛa maa lán safiiwa.

⁸Tiasa an sia dɛ nísi bòo góa, tó aa bɛ gãaɛ, wìli ń dↄ̃o. Aa gↄ̃̀ wákambaauↄ ũ, aa gↄ̃̀ lán lí giiwa.

⁹Gbɛ̃́ pↄ́ gàga zĩuↄ mi na dɛ gbɛ̃́ pↄ́ lɛ́ gaga ń nↄanaoↄla. Bua pↄ́ↄ kuo, aalɛ ibaba, aa gↄ̃̀ wooo.

¹⁰Baa nↄɛ wɛ̃nadↄ̃nɛdeↄ ń nɛ́ↄ fùukɛ̀ ńzĩa. An nɛ́piↄ gↄ̃̀ ń pↄblea ũ ma gbɛ̃́ↄ tↄ̀lↄzↄ̃a guu.

¹¹Dii pↄfɛ̃ pàlamá, à a pↄkũma pãsĩ bↄ̀bↄmá. À tɛsↄ̃̀ Siↄnawa, à kũ̀ a ɛ̃wa.

¹²Dṹnia kíaↄ ń gbɛ̃́ pↄ́ kú a guuↄ píi, aalɛ e yãa Yelusalɛũ ibɛɛↄ fↄ̃ gɛ̃ a bↄlɛuo.

¹³Aà ãnabiↄ duuna ń aà gbàgbanaↄ vãikɛa yã́iɛ. Aa gbɛ̃maaↄ dɛ̀dɛ ń wɛ̃́lɛ guuɛ.

¹⁴Ɔ̃ aaìↄ ↄmalɛmalɛ zɛaↄ guu lán vĩ̀aↄwa sa. Aa gbãlɛ̀ gbɛ̃dɛapi yã́i, gbɛ̃e lí we ↄkã̀ ń pↄkasaↄwao.

¹⁵Wìↄ wiidↄmá, à gɛ́i gbãsĩdeↄ! À gɛ́i, à gɛ́i, ásu ↄkãwáo! Aaìↄ bàalɛ wàↄ liaaliaa, buipãleↄ i onɛ́: Á e àↄ ku lao.

¹⁶Dii mɛ́ ń fãaa ń oa fɛ̃́nkpaao, a ye à ń eo. Wìli ń gbàgbanaↄ gwa pↄe ũo, wìli gbɛ̃zↄ̃ↄↄ wɛgwao.

¹⁷Wá wɛ́ dↄ gbɛ̃́ↄzi aa dↄwálɛ e wá wɛ́ wò pã. Kua gudↄ̃akĩi wa buie dã̀, a fↄ̃ wá suaba sↄ̃o.

¹⁸Lá wálɛ táa'o píi, wàlɛ wá wɛɛ, wili e wa bɛbɛ gãaɛ lↄo. Wá wɛ̃ni gↄ̃̀ lɛɛ, wá gↄↄ ye pai, asa wá kua lɛ́ kàɛ.

¹⁹Wá gbɛ̀sɛlɛnaↄ wãa dɛ kúu bↄa musua. Aa pɛ̀lɛwázi gbɛ̀sĩsĩↄ musu, aa wá dãdã gbáau.

²⁰Kía pↄ́ Dii kpà wá ĩ́an wɛ̃nide ũ, aa aà kũ̀ ń baio. Wálɛ e yãa ↄ̃mɛ aↄ kpaawázi buipãleↄ guu.

²¹Á Ɛdↄũ pↄ́ á kú Uzu bùsuuↄ, à vĩ àↄ kɛ̃aa ń pↄnao gĩa! Lua a a pↄkũma í dↄɛ́ à mi à kã sↄ̃ɛ, í á pↄkasaↄ wolowá.

²²Siↄnadeↄ, á ĩadama lɛ́ a ká, wa táánↄ zĩ̀zↄↄ ũ lↄo. Ɛdↄũↄ, Dii a bↄbↄánↄ ń á duunao, i á vãikɛa wíɛ́ á musu.

BREAK EVERY YOKE
Creating and distributing free Bible translations for the web and mobile phones to every tribe on Earth. Click to learn how you can support this work!

Wɛ̃nalɛ 412345