1Nɑ sɑ̃ɑwɑ tɔnu wi u nɔni swɑ̃ɑru yɛ̃ te tɑ nɑ Yinni Gusunɔn mɔrun sɔ̃.
2U derɑ nɑ dɑ yɑm wɔ̃kuru sɔɔ, mi yɑm bururɑm sɑri.
3Nɛ turowɑ u nɔmɑ doke bururu kɑ yokɑ.
4U derɑ nɑ woorɑ sɑɑ nɛn wirun di sere kɑ nɛn nɑɑsɔ. N sɑ̃ɑre u nɛn kukunu kɔsukɑ,
5u kɑ mɑn nuku sɑnkirɑnu kɑ nɔni swɑ̃ɑru bunɑnɑ nɡe ɡbɑ̃rɑru.
6U derɑ nɑ dɑ yɑm wɔ̃kuru sɔɔ nɡe ɡɔri be bɑ ɡu n tɛ.
7U mɑn ɡbɑ̃rɑru bunɑnɑ n ku kɑ yɑri, mɑ u mɑn bɔkuɑ kɑ yɔni dɑmɡii.
8Mɑ nɑ nɔɔɡiru suɑ nɑ somiru kɑnɑ. Adɑmɑ u ǹ mɑn swɑɑ dɑki u sere nɛn kɑnɑru mwɑ.
9U nɛn swɑɑ kɛnuɑ kɑ kpee bɑkɑnu, u ye ɡo.
10U kukuɑ u mɑn mɑrɑ nɡe ɡbeeku bɔ̃ɔ ɡe ɡɑ yɑɑ mɑrɑ. U mɑn mɑrɑ nɡe ɡbee sunɔ ɡe ɡɑ yɑɑ yɔɔru bwɛ̃ɛyɛ.
11U nɛn swɛɛ bɔɔrɑ, mɑ u mɑn mwɑ u ɡɛ̃ɛkɑ. U mɑn deri biti sɔɔ.
12U win tɛndu bɛri mɑ u mɑn kuɑ nɡe yɑɑ ye u koo to.
13U nɛn yɛ̃sɑ yɑburɑ kɑ sɛ̃ɛnu.
14Mɑ tɔmbu kpuro bɑ mɑn yɛ̃ɛmɔ bɑ womusu dokemɔ tɔ̃ɔ bɑɑtere.
15U derɑ nɑ nɔni swɑ̃ɑru wɑ mɑ nuku sɑnkirɑrɑ mɑn ɡoomɔ nɡe tɑm.
16U derɑ nɑ kpenu temɑ mɑ nɛn donnu bɔɔkirɑ. Mɑ u mɑn torom wisi.
17U derɑ nɑ ǹ mɑɑ wɑ̃ɑ bɔri yɛndu sɔɔ, nɑ ǹ mɑɑ nuku dobu mɔ.
18Mɑ nɑ ɡeruɑ nɑ nɛɛ, nɑ ǹ mɑɑ dɑm mɔ, nɑ ǹ mɑɑ ɡɑ̃ɑnu yĩiyɔ wi, Yinni Gusunɔn mi.
19Nɑ̀ n nɛn nɔni swɑ̃ɑru yɑɑyɑ, n dɑ n sɑ̃ɑrewɑ nɡe dɑ̃ɑ sosurɑrun nimɑ nɑ nɔrɑ kɑ dɛ̃ɛ.
20Nɑ̀ n yenibɑ kpuro yɑɑyɑ, nɑ rɑ wururewɑ.
21Adɑmɑ wee ye yɑ mɑn yĩiyɔbu wɛ̃ɛmɔ. Nɑ kĩ n tii ye yɑɑyɑsiɑ n ɡere.
22Yerɑ, Yinni Gusunɔn durom kun kpɑ, win wɔnwɔndɑ kun mɑɑ nɔru kue.
23Tɑ rɑ n wurɑmɑmɔwɑ bururu bɑɑtere. Win bɔrɔkiniru tɑ kpɑ̃.
24Nɑ nɛɛ, Yinni Gusunɔ u sɑ̃ɑwɑ nɛɡii. Yen sɔ̃nɑ nɑ yĩiyɔbu mɔ wi sɔɔ.
25U rɑ wi u nùn nɑɑnɛ sɑ̃ɑ kĩru sɔ̃ɔsi, kpɑ u wi u nùn kɑsu durom kuɑ.
26Yɑ wɑ̃ tɔnu ù n Gusunɔn somiru mɑrɑ kɑ tɛmɑnɑbu.
27Yɑ wɑ̃ tɔnu u Gusunɔn yoru wurɑ win ɑluwɑɑsiru sɔɔ.
28Ù n lɑɑkɑri mɛɛribu ɡɑbu wɑ, u tii ɡɑwo sɛ̃ɛ u dɑ u n wɑ̃ɑ wi turo, domi Yinni Gusunɔwɑ u nùn bu kpɛ̃ɛ.
29U n nùn wiru kpĩiyɛ win nuku sɑnkirɑnu sɔɔ, kpɑ u n yĩiyɔ mɑ u koo nùn somi.
30U wi u nùn bɑɑrɑ soomɔ bɑɑru tĩiyɔ u sɔmɛ, kpɑ u wurɑ bu nùn wɔmɛ.
31Domi Yinni Gusunɔ u ku rɑ tɔnu biru kisi kɑ bɑɑdommɑɔ.
32Bɑɑ ù n derɑ yɛ̃ro u nɔni swɑ̃ɑru wɑ, kɑ mɛ, u nùn kĩ too, domi win wɔnwɔndɑ kpɑ̃.
33N ǹ win kĩru u kɑ tɔnu nɔni sɔ̃, kpɑ u nùn nuki sɑnku.
34Yinni Gusunɔ u yɛ̃ sɑnɑm mɛ bɑ yobu nɔni sɔ̃ɔmɔ bɑ tɑɑkumɔ. U yɛ̃ sɑnɑm mɛ bɑ ǹ tɔmbu kuɑmmɛ nɡe mɛ n weenɛ. U yɛ̃ sɑnɑm mɛ bɑ ǹ bu siriɑmmɛ dee dee.
37Goo kun kpɛ̃ u nɛɛ, ɡɑ̃ɑnu nu kooro, Yinni Gusunɔ ù kun nin woodɑ wɛ̃.
38Wi, Gusunɔ Wɔrukoo wiyɑ u rɑ de ɡeɑ kɑ kɔ̃sɑ yu nɑ.
39Ǹ n mɛn nɑ, mbɑn sɔ̃nɑ tɔnu u ko n weeweenu mɔ̀. U de u weeweenu ko win durum sɔ̃.
40Yen sɔ̃, i de su bɛsɛn dɑɑ mɛɛri kpɑ su ye wɛ̃ɛri su wɑ su kɑ ɡɔsirɑmɑ Yinni Gusunɔn mi.
41Gusunɔ u wɑ̃ɑ wɔllɔ. I de su nɔmɑ yiiyɑ su nùn kɑnɑ.
42Su nɛɛ, Yinni, sɑ durum kuɑ, sɑ nun seesi. A ǹ sun suuru kue.
43A tii beruɑ wunɛn mɔru bɑkɑn sɔ̃, mɑ ɑ sun nɑɑ ɡirɑ ɑ ɡo wɔnwɔndu sɑri.
44A duɑ ɡuru wiru sɔɔ ɑ ku kɑ bɛsɛn kɑnɑru nɔn sɔ̃.
45A derɑ bɑ sun ɡɑrisi nɡe kubɑnu bwesenun suunu sɔɔ.
46Bɛsɛn yibɛrɛbɑ kpuro bɑ sun nɔɔ kuurimɔ.
47Ye yɑ sun tie, yerɑ nɑndɑbu kɑ bɛrum, domi bɑ bɛsɛn yɑ̃nu ɡurɑ, bɛsɛn tem mu kuɑ bɑnsu.
48Wee nɑ nɔni yĩresu kokumɔ yèn sɔ̃ nɛn tɔmbɑ kɑm kuɑ.
49Nɛn nɔni yĩresu kokumɔ, su ǹ yɔ̃re,
50nɑ kɑ mɑrɑ Yinni Gusunɔ u nɛn lɑɑkɑri koomɑ wɔllun di,
51kpɑ u wɑ mɑ ye yɑ Yerusɑlɛmuɡibu deemɑmɔ, yɑ nɛn nuki sɑnkɑ.
52Be bɑ mɑn tusɑ kɑm sɔɔ bɑ mɑn nɑɑ ɡirɑ nɡe ɡunɔ.
53Bɑ kĩ bu nɛn wɑ̃ɑru kpeesiɑ wɔru sɔɔ. Bɑ mɑn kpenu kɑsukɑ.
54Nim mu mɑn mwɛɛmɔ, mɑ nɑ nɛɛ, nɑ kɑm kuɑwɑ.
55Sɑɑ ye sɔɔ, nɑ kɑnɑru kuɑ nɑ nɛɛ, Yinni Gusunɔ, nɑ nun sokɑ sɑɑ wɔru ɡe sɔɔn di,
56mɑ ɑ nɛn nɔɔ nuɑ. A ku wunɛn swɑɑ kɔre. A nɛn wuri kɑ nɛn weeweenu nɔɔwɔ.
57Dɔmɑ te, ɑ mɑn susi, ɑ mɑn sɔ̃ɔwɑ ɑ nɛɛ, n ku bɛrum ko.
58Yinni ɑ mɑn siriɑ mɑ ɑ nɛn wɑ̃ɑru yɑkiɑ.
59A wɑ kɔ̃sɑ ye bɑ mɑn kuɑ, ɑ mɑn sirio.
60A wɑ mɔru ye bɑ mɑn kɔsiemɔ kɑ nɔɔ tiɑ ye bɑ mɔ̀ bu kɑ mɑn seesi.
61Yinni Gusunɔ, ɑ ben wɔmɑ nuɑ ye bɑ mɑn koosimɔ.
62A ben nɔɔ tiɑ wɑ ye bɑ mɑn koosi bɑ kɑ mɑn ɡerusimɔ tɔ̃ɔ bɑɑtere.
63Ye bɑ mɔ̀ kpuro sɔɔ ɡesi, nɛnɑ bɑ rɑ n womu dokemɔ.
64Yinni Gusunɔ, nɑ yɛ̃ mɑ kɑɑ bu kɔsie nɡe mɛ ben kookoosu nɛ.
65Kɑɑ ben ɡɔ̃run nɔni wɔ̃ke kpɑ ɑ de wunɛn bɔ̃ri yi n sɑ̃ɑ ben bɑɑ.
66Kɑɑ bu nɑɑ ɡirɑ kɑ mɔru bɑkɑ kpɑ ɑ bu kpeerɑsiɑ bɑ kun mɑɑ wɑ̃ɑ tem mɛ sɔɔ.
