SOSUWEE 22:26-33

²⁶Dɛɛ̀ te kɛ̀ ti mɑɑ́ diwũɔ̃tɔ̀nnì, ti í di mɑɑ́ kɛ bo nfeu iwũɔ̃ ti Yiɛ̀ nKuyie nyoo ti nkù pɑ̃ɑ̃ ntidiitì.

²⁷Ti dì mɑɑ́ kɛ̀ dì bo bɛnkɛ ti tɑumɛ̀ mmɛ nɛ̀ díndi, kɛ dò ntínti nɛ̀ dínni nɛ̀ ti yɑɑ̀bío ti mɔkɛ kucɛ kɛ bo mbɑ́ɑ́ nti Yiɛ̀ nKuyie, nkɛ nkù feu iwũɔ̃ kɛ tuɔ̀ nku wũɔ̃tɔ̀nnì ĩ́nkɛ̀, kɛ kù feu mɛtɑummɛ̀ kpɛyi. Dɛ mɔ̀nnì di bí bɑ́ɑ́ nɑ kɛ́nɑ́kɛ́ ti kpɛyi kɛ dɔ̀ ì í mɔkɛ kucɛ kɛ bo nkɔkɛ́ ti Yiɛ̀ nKuyie nkɔbɛ miɛkɛ.

²⁸Ti yɛ̀mmɛ̀ dò nkɛ̀ bɛ̀ nɑɑ tì bɛ́i nti borɛ̀ yoo ti yɑɑ̀bí bo dɛ̀, ti dɔ̀: Ntɛ ti cicɛbɛ̀ mɑɑ́ dìì wũɔ̃tɔ̀nnì ti Yiɛ̀ nKuyie. Bɛ̀ í dì mɑɑ́ kɛ bo nkɔù iwũɔ̃ Kuyie nkɛ tuɔ̀ nyoo bɛ̀ nkù pɑ̃ɑ̃ ntidiitì, bɛ̀ dì mɑɑ́ kɛ̀ dì bo bɛnkɛ ti tɑumɛ̀ mmɛ nɛ̀ díndi.

²⁹Ti í di mɑɑ́ kɛ bo yetɛ ti Yiɛ̀ nKuyie nkɛ kù bùtínnɛ́ yíe, ti í dì mɑɑ́ kɛ bo nkɔù iwũɔ̃ kɛ tuɔ̀ nkɛ kù pɑ̃ɑ̃ ntidiitì, yoo kɛ kù feu iwũɔ̃. Ti í dɔ́ kɛ́nfeu iwũɔ̃ kupíkù tɛkù mɑkù kɛ yóu ku wũɔ̃tɔ̀nnì dìì bo ku cĩ́ɛ̃̀tɛ̀.

³⁰Kɛ̀ ikuɔ́ nìùtì Pinɑsi nɛ̀ Isidɑyɛɛribɛ kó bɛkótíbɛ̀ nɛ̀ bɛ̀ɛ̀ bɑkɛ́ iwuɔ nkɛ̀ bɛ̀ɛ keè Dubɛnniibɛ nɛ̀ Kɑdiibɛ nɛ̀ Mɑnɑnsee kɔbɛ dikéè bɛ́i ntì kɛ̀ dɛ̀ɛ bɛ̀ nɑrikɛ.

³¹Kɛ̀ Edeɑsɑɑ birɛ Pinɑsi ikuɔ́ nìùtìi bɛ́i nkɛ dɔ̀: Ti bɑntɛ́ di mmɔ̀nnì kɛ dò nti Yiɛ̀ nKuyie mbo ti cuokɛ̀ kɛ yɛ̃́ di í kù cɑ̀ɑ̀rɛ̀mɛ̀ kɛ kù miɛkɛ bo pɛikɛ Isidɑyɛɛribɛ.

³²Kɛ̀ Edeɑsɑɑ birɛ Pinɑsi ikuɔ́ nìùtì nɛ̀ Isidɑyɛɛribɛ kó bɛkótíbɛ̀ kɛ̀ bɛ̀ɛ cɑu nDubɛnniibɛ nɛ̀ Kɑdiibɛ kɛ́ítɛ́ Kɑdɑɑdi kɛ́kò nKɑnnɑhɑ̃ɑ̃ Isidɑyɛɛribɛ borɛ̀ kɛ́ bɛ̀ nɑ̀kɛ́.

³³Kɛ̀ Isidɑyɛɛribɛɛ keè bɛ̀ nɑ̀kɛ́ tì kɛ́sɑ̃ntɛ ti Yiɛ̀ nKuyie nkɛ tɛ̃́nkɛ í mbɑ̀ɑ́tí kɛ bo dokɛ́nɛ̀ Dubɛnniibɛ nɛ̀ Kɑdiibɛ.