SKUTKI 4:8-21

⁸O Peter, pherardo le Sentne Duchoha, phenďa lenge: “Tumen, so ľidžan le manušen the o phuredera le Izraeloskere!

⁹Amen sam adadžives sudzimen vaš o lačhipen, so pes kerďa le nasvale manušeske a tumen amendar phučen, sar les sasťarďam.

¹⁰Akor mi džanen savore Izraeliti the tumen, hoj andro nav Ježiš Kristus Nazaretsko sas sasťardo. Oda hin o Ježiš, saves tumen ukrižinďan a o Del les uštaďa andral o meriben. Leskera zoratar hino kada manuš sasto angle tumare jakha.

¹¹Oda hin ‘oda bar, so tumen o murara odčhiďan a so ačhiľa oda hlavno bar.’

¹²A nane andre ňikaste avreste e zachrana, bo aňi nane aver nav tel o ňebos, so uľahas dino le manušenge, andre savo šaj avas amen zachraňimen.”

¹³Sar dikhle, hoj o Peter the o Jan pes na daran, čudaľinenas pes, bo džanenas, hoj hine ča ajse manuša, save nane avrisikade. A prindžarde len, hoj phirenas le Ježišoha.

¹⁴Sar dikhle paš lende te ačhel ole manušes, savo sasťiľa avri, na sas len pre lende so te phenel.

¹⁵Bičhade len avri andral e Bari Rada. Paľis pes maškar peste dovakerenas:

¹⁶“So keraha kale manušenca? Bo savore, save bešen andro Jeruzalem, džanen, hoj prekal lende pes ačhiľa baro zazrakos a amen oda našťi phenas, hoj na.

¹⁷Ale hoj pes oda mek buter te na rozvakerel maškar o nipi, zakazinas lenge, hoj imar buter te na vakeren andre oda nav ňisave manušeske.”

¹⁸Vičinde len a prikazinde lenge, hoj imar te na vakeren aňi te na sikaven andro nav Ježiš.

¹⁹Ale o Peter the o Jan lenge odphende: “Korkore rozsudzinen, či oda ela mištes anglo Del, hoj buter te šunas tumen sar le Devles.

²⁰Bo amen našťi preačhas te vakerel pal oda, so dikhľam the šunďam.”

²¹Paľis lenge mek jekhvar zakazinde a mukle len, bo na arakhle pre lende ňič, vaš soske len šaj potrestinde. Bo savore manuša lašarenas le Devles vaš oda, so pes ačhiľa.