1Andre ola dživesa, sar sas furt buteder učeňika, chudle o Helenisti te dudrinel pro Hebreja, hoj na pomožinenas lengere vdovenge sako džives avke sar avre vdovenge.
2Akor peske o dešuduj (12) džene vičinde savore učeňiken a phende: “Nane oda šukares, hoj amen te omukas le Devleskero lav a te keras kala buča.
3Vašoda kiden avri tumendar efta muršen, pal save dojekh džanel, hoj hine pherde le Sentne Duchoha the la goďaha. Len ačhavaha pre kadi buči
4a amen pes šaj modľinas a služinas le Devleskere laveha calo časos.”
5Oda lav sas pre dzeka savoredženenge a kidle avri le Štefan, muršes, kas sas pherdo pačaben the Sentno Duchos, the le Filip, le Prokorus, le Nikanor, le Timon, le Parmenas the le Mikulaš andral e Antiochija, savo sas Grekos a savo imar sigeder pregeľa andre Židoviko pačaben.
6Ačhade len anglo apoštola a on pes pre lende modľinde a thode pre lende o vasta.
7Le Devleskero lav barolas a sas furt buteder učeňika andro Jeruzalem. A the igen but rašaja pačanďile.
8O Del diňa le Štefan pherdo lačhipen (milosť) the zor a kerelas maškar o nipi bare ďivi the zazraki.
9A avle varesave manuša andral e Libertinsko sinagoga, kaj sas Židi andral e Cirenija the Alexandrija, a mek ole, save sas andral e Cilicija the andral e Azija, a vesekedinenas pes le Štefanoha.
10Ale našťi avle anglal ola goďaha the ole Duchoha, saveha vakerelas.
11Akor podčhide muršen, save phende: “Šunďam les te vakerel nalačhe lava pro Mojžiš the pro Del.”
12Avke marde upre le nipen the le phurederen the le zakoňiken. Avle pre leste, chudle les a ľigende les angle Bari Rada.
13Ačhade falošne švedken, save phende: “Kada manuš na preačhel te vakerel nalačhe lava pre kada Sentno Than the pro Zakonos.
14Bo šunďam les te vakerel, hoj oda Ježiš Nazaretsko čhivela tele kada than a čerinela o tradiciji, so amenge diňa o Mojžiš.”
15Savore, save bešenas andre Bari Rada, pes zadikhle pro Štefan a dikhle leskero muj avke sar muj le aňjeloskero.
