1Pal o pandž dživesa avľa tele o nekbareder rašaj Ananijaš le phurederenca the le Tertulloha, savo sas baro manuš andro vakeriben, hoj te vakeren pro Pavol anglo vladaris.
2Vičinde le Pavol a o Tertullus chudľa pre leste te vakerel: “Nekbareder Felix, amen džanas, hoj prekal tu avľa baro smirom a prekal tiri goďi hin andre kada narodos feder dživipen!
3Amen furt andre savoro, ó, baro Felix, všadzik tuke igen paľikeras!
4Ale hoj tut but te na zľikerav, mangav tut, hoj amen sikra te šunes avri andre tiro lačhipen.
5Bo avľam pre oda, hoj kada manuš hino sar nasvaľiben, kerel upre le Židen a anel nasmirom maškar lende pal calo svetos. Ľidžal e sekta, savi pes vičinel o Nazariti,
6a kamelas te meľarel o chramos. Amen les chudľam a kamľamas te sudzinel pal amaro zakonos,
7ale avľa o veľiťeľis Lisijaš a cirdňa les bara zoraha avri andral amare vasta a iľa les het.
8Paľis prikazinďa olenge, save pre leste vakerenas, hoj te aven ke tu. Sar tu lestar phučeha, the korkoro tut dodžaneha pal oda savoro, so amen pre leste vakeras.”
9O Židi ačhenas vaš o Tertullus a denas les čačipen.
10Sar kerďa o vladaris le vasteha le Pavloske, hoj te vakerel, phenďa o Pavol: “Džanav, hoj imar but berš sudzines kada narodos. Vašoda phenava bi e dar o čačipen pal mande.
11Bo šaj tut dodžanes, hoj nane oleske buter sar dešuduj (12) džives, sar man geľom te modľinel andro Jeruzalem.
12A na arakhle man varekaha te vakerel aňi te marel upre le nipen andro chramos, andro sinagogi, aňi andro foros.
13Aňi tuke oda našťi presikaven, so pre mande akana vakeren.
14Ale oda tuke avri phenav, hoj me služinav mire dadengere Devleske ole dromeha, so on vičinen sekta. Pačav savoreske, so hin pisimen andro Zakonos the Proroka.
15Užarav pro Del a pačav oleske, hoj ušťena andral o meriben o čačipnaskere the o nalačhe – avke sar the on.
16Vašoda kerav sa, hoj man te el žužo jilo anglo Del the anglo nipi.
17Pal o buter berš avľom andro Jeruzalem, hoj te anav mire narodoske almužni, dari the obeti.
18Diňom man te žužarel a paľis varesave Židi andral e Azija man arakhle andro chramos. Na sas ode manca ňisave nipi, aňi na sas vika.
19On akana kade majinde te ačhel angle tu, hoj te vakeren, so len pre mande hin.
20Abo kala, save hine ade, mi phenen či arakhle pre mande nalačhipen akor, sar ačhavas angle Bari Rada.
21Ňič, ča oda jekh lavoro, so phenďom, sar ačhavas angle lende, a vriskinďom: ‘Adadžives man sudzinen vaš oda, bo sikavav, hoj o mule ušťena andral o meriben.’ ”
22Sar oda šunďa o Felix, bo ov mištes džanelas pal oda pačaben, prethoďa lengero sudos a phenďa: “Sar avela o veľiťeľis Lisijaš, paľis rozsudzinava tumari veca.”
23Phenďa le veľiťeľiske upral o šel, hoj te phanden le Pavol andre loki bertena a te domukel leskere učeňikenge te avel a te anen leske oda, so kampel.
24Pal vajkeci dživesa avľa o Felix peskera romňaha la Druzillaha, savi sas Židkiňa, bičhaďa pal o Pavol a šunelas les, so vakerel pal o pačaben andro Ježiš Kristus.
25Sar vakerelas o Pavol pal o spravodľišagos, pal oda, hoj pes te zľikeras le žadoscendar, the pal o sudos, so avela, daranďiľa o Felix a phenďa: “Akana imar dža, ale sar man ela časos vičinava tut.”
26Ale androda ov užarelas, hoj les o Pavol dela love, hoj les te premukel. Vašoda pal leste the buterval bičhavelas a vakerelas leha.
27Sar pregeľa duj berš, o Porcius Festus ačhiľa vladaris pal o Felix. O Felix kamelas te avel pre dzeka le Židenge, vašoda mukľa le Pavol andre bertena.
