1O Peter the o Jan džanas upre andro chramos trin orendar pro modľitbi.
2Ipen anenas varesave muršes, savo sas bango, kanastar les e daj anďa pro svetos. Les hordinenas sako džives paš o chramos paš o vudar, so pes vičinel Šukar, hoj peske te mangel love olendar, save džanas andro chramos.
3Sar ov dikhľa le Peter the le Jan, hoj kamen te džal andro chramos, mangelas len, hoj les te den vareso.
4Akor o Peter the o Jan dikhle pre leste a phende: “Dikh pre amende!”
5Ov dikhelas pre lende igen bares, bo užarelas, hoj les dena vareso.
6Ale o Peter phenďa: “Somnakaj the rup man nane, no oda, so man hin, oda tut dava: Andro nav Ježiš Kristus Nazaretsko ušťi a dža!”
7Chudľa les a hazdňa les čače vastestar. Takoj pro than leske zoraľile o pindre the o khoča,
8chučiľa upre a phirelas. Geľa lenca andro chramos, kaj phirelas, chučkerelas radišagostar a lašarelas le Devles.
9Savore nipi, save ode sas, les dikhle te phirel a te lašarel le Devles.
10Mištes les prindžarenas, hoj oda sas ov, savo bešelas paš e chramoskeri brana, so pes vičinelas Šukar, a žobrinelas. A igen pes čudaľinenas olestar, so pes leske ačhiľa.
11O bango phirelas pal o Peter the pal o Jan a savore manuša pes zgele ke lende andre bari dvora le Šalamunoskeri, bo našťi ke peste avenas.
12Sar oda dikhľa o Peter, odphenďa le manušenge: “Muršale andral o Izrael, so tumen oleske avke čudaľinen? Abo soske pre amende avke dikhen, sar te oda amen peskera zoraha kerďamas, hoj ov phirel? Abo vašoda, bo sam pobožna?
13O Del le Abrahamoskero, le Izakoskero the le Jakoboskero, o Del amare dadengero oslavinďa peskere čhas le Ježiš, saves tumen diňan andre a na kamenas les akor, sar les o Pilat kamelas te premukel.
14Tumen na kamenas le Sentnes a Čačipnaskeres, ale mangenas, hoj tumenge te premukel le vrahos.
15Ale oles, ko del o dživipen, tumen murdarďan. Les o Del uštaďa andral o meriben a amen sam oleske švedki!
16Dikhen kale muršes a prindžaren les. Diňa peskero pačaben andro nav Ježiš Kristus a avľa leske pale e zor andro pindre. Angle tumare jakha o pačaben andro Ježiš calkom sasťarďa kale muršes.
17Phralale, akana džanav, hoj tumen aňi na džanenas, so kerďan, aňi ola, save tumen ľidžan.
18O Del phenďa prekal savore peskere proroka, hoj leskero Kristus cerpinela, a kerďa, hoj pes avke te ačhel.
19Vašoda akana keren pokaňje a visaren tumen, hoj pes tumenge te khosel o bini a te avel pre tumende nevi zor the o smirom le Devlestar,
20hoj te bičhavel tumenge le Ježiš Kristus, savo sas pre oda imar anglal dino.
21Ov mušinel te ačhel andro ňebos dži akor, medik o Del na prikerela savoro, pal soste imar čirla vakerelas prekal savore peskere sentna proroka.
22Bo o Mojžiš phenďa le dadenge: ‘O Raj, tumaro Del, tumenge ačhavela prorokos tumare phralendar avke sar man. Les šunena andre savoreste, so tumenge phenela.
23Ela avke, hoj dojekh manuš, savo na šunela ole prorokos, ela le Devleskere manušendar odčhido.’
24A o Samuel the savore aver proroka, save sas pal leste, tiš pal kala dživesa vakerenas.
25Le Devleskere zasľubeňja, so phenďa prekal peskere proroka, hine prekal tumende a tumen hin o kotor pre zmluva, so o Del phandľa tumare dadenca, sar phenďa le Abrahamoske: ‘Prekal tiro potomkos, požehňinava savore narodi pre phuv.’
26Sar o Del ačhaďa peskere Služobňikos le Ježiš, ešeb (peršo) les bičhaďa tumenge, hoj tumen te požehňinel avke, hoj te visarel tumen tumare binošne dromendar.”
