ᤛᤣ᤺ᤰᤕᤢᤰᤔᤡᤒᤠᤜᤠ᤹ 4:8-21

⁸ᤜᤧᤰᤁᤩᤠᤱ ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤔᤡᤸᤗᤧ ᤌᤢᤰᤋᤢᤀᤠᤱ ᤐᤋᤪᤢᤛᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤔᤏᤠᤜᤠ᤹ᤖᤧ ᤂᤢᤏᤡ᤹ ᤛᤢᤜᤠᤱᤕᤢᤰᤐᤠᤜᤠ᤹ ᤏᤢ ᤋᤢᤶᤗᤠᤶᤗᤥ᤺ᤒᤠᤛᤣ.

⁹ᤀᤠᤀᤡᤴ ᤀᤠᤴᤇᤡᤃᤧ ᤁᤴ ᤗᤠᤱᤛᤰᤐᤠ ᤔᤏᤠ᤺ᤴ ᤗᤢᤱᤔᤠ᤹ ᤋᤢᤰᤋᤧᤇᤢᤃᤧᤀᤠᤱ ᤘᤣ᤺ᤳᤋᤧᤒᤠ ᤏᤢ᤺ᤒᤠ ᤕᤠ᤺ᤶᤒᤰᤁᤡᤸᤗᤧ ᤗᤠᤃᤡ ᤂᤡᤏᤡ᤹ ᤋᤃᤠᤱ ᤛᤣ᤺ᤴᤍᤥ᤺ᤛᤧ ᤕᤠᤵᤔᤡ ᤁᤧᤍᤠᤖᤡᤒᤠᤏᤧ ᤑᤠ᤹ᤃᤪ.

¹⁰ᤀᤠᤸᤗ ᤂᤡᤏᤡ᤹ ᤏᤢ ᤘᤣ᤹ ᤀᤡᤛᤪᤠᤀᤡᤗᤒᤠ ᤁᤠᤰ ᤔᤏᤠᤜᤠ᤹ᤖᤧ ᤁᤴ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ. ᤏᤠᤛᤖᤋᤛ᤻ᤔᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤔᤢᤰᤛᤠᤶᤗᤠᤶ ᤁᤴ ᤔᤏᤠ᤺ᤴ ᤂᤡᤏᤡ᤹ ᤋᤃᤡ ᤘᤣ᤺ᤳᤋᤧᤀᤠᤱ ᤕᤧᤵᤗᤥ॥ ᤕᤧᤛᤢ᤺ᤱᤃ ᤂᤡᤏᤡ᤹ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤥ᤺ᤶᤔᤠ ᤛᤧᤵᤔᤠ ᤁᤧᤒᤠᤱᤄᤢᤶᤛᤡᤶ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ᤃ ᤁᤢᤛᤡᤘᤧᤳᤗᤠᤶ ᤁᤢᤜᤡᤱᤘᤧᤳ ᤆᤥᤃᤢᤀᤠᤱ ᤑᤥ᤺ᤰᤂᤢᤖᤥ॥

¹¹ᤂᤢᤏᤧ᤹ ᤁᤢᤔᤧᤴᤏᤥ ᤛᤠᤶᤕᤥᤛᤠᤵᤗᤠ᤺ᤸᤗᤧ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤀᤠᤱ ᤘᤠ᤹. ‘ᤂᤡᤏᤡ᤹ ᤗᤢᤱ ᤁᤧᤃᤠᤶᤒᤠᤜᤠ᤹ᤖᤧ ᤁᤧᤏᤠ᤹ᤖᤢᤶᤒᤠ ᤗᤢᤱᤅᤡᤴ ᤂᤢᤏᤧ᤹ᤀᤣᤖᤥ. ᤁᤖ ᤀᤠᤸᤗᤥ ᤔᤠᤗᤢᤱ ᤐᤥ᤺ᤰᤂᤧᤖᤥ॥’

¹²ᤕᤧᤛᤢᤗᤠᤶᤗᤰ ᤛᤧᤴᤗᤵ ᤘᤠ᤹. ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ ᤔᤧᤴᤇᤠᤶᤃᤧᤴ ᤕᤠᤵᤔᤡᤜᤠ᤹ ᤛᤧᤴᤗᤵ ᤕᤠᤵᤔᤡ ᤁᤧᤒᤡᤒᤠ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤘᤣ᤹ ᤜᤠ᤺ᤳᤋᤠᤱ ᤜᤥ᤺ᤵᤗᤥ॥”

¹³ᤀᤠᤸᤗ ᤕᤜᤢᤍᤡ ᤕᤧᤈᤢᤶᤓᤥᤒᤠ ᤐᤠᤛᤡᤱᤐᤠᤍᤠᤱᤗᤠᤜᤠ᤹ᤖᤧ ᤐᤋᤪᤢᤛ ᤏᤢ ᤕᤢᤜᤢᤴᤏᤠ᤺ᤴ ᤛᤠᤵᤗᤠ ᤔᤧᤴᤏᤡ᤺ᤵᤔᤏᤠ ᤔᤧᤴᤈᤥᤒᤠ ᤘᤕᤧᤳᤇᤡᤛᤠᤱ ᤂᤢᤴᤇᤡ᤹ ᤀᤠ᤺ᤴᤇᤡᤱᤔᤠᤴ ᤔᤧᤏᤡ᤺ᤛᤢᤀᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤁᤴ ᤔᤏᤠᤜᤠ᤹ ᤕᤧᤛᤢ᤺ᤴᤏᤢ ᤘᤕᤧᤳᤇᤡᤒᤠ ᤏᤡᤱᤘᤠ᤹ ᤔᤧᤄᤥ᤺ᤛᤢ॥

¹⁴ᤁᤖ ᤂᤧᤴ ᤁᤧᤘᤣ᤺ᤵᤐᤠ ᤔᤏᤠ᤺ᤴᤏᤠᤱ ᤂᤧᤱᤜᤠ᤹ᤏᤢᤀᤣ ᤕᤧᤒᤧᤒᤠ ᤔᤧᤏᤡ᤺ᤛᤢᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤌᤣᤀᤠᤱ ᤐᤠ᤺ᤵᤔᤠ ᤔᤧᤴᤇᤢᤰᤋᤢᤴᤗᤥ॥

¹⁵ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤐᤋᤪᤢᤛ ᤏᤢ ᤕᤢᤜᤢᤴᤏᤠ᤺ᤴ ᤕᤧᤈᤢᤶᤓᤥᤗᤠᤶ ᤗᤠ᤺ᤰᤁᤠᤳ ᤔᤧᤗ᤺ᤳᤋᤢᤛᤡ ᤜᤧᤰᤁᤩᤠᤱ ᤀᤰᤂᤣᤗ᤹ᤖᤡᤰ ᤐᤠ᤺ᤴ ᤔᤧᤎᤰᤋᤧᤖᤥ.

¹⁶“ᤀᤠᤸᤗ ᤁᤴ ᤔᤏᤠᤜᤠ᤹ ᤌᤣ ᤔᤧᤵᤔᤠᤛᤡᤒᤣ᥅ ᤁᤱᤜᤠ᤹ᤖᤧᤃ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤔᤧᤈᤥᤃᤢᤒᤠᤴ ᤕᤖᤢᤛᤗᤧᤔ ᤁᤧᤕᤢᤱᤒᤠ ᤁᤠᤰ ᤔᤏᤠᤜᤠ᤹ᤖᤧ ᤔᤧᤏᤡ᤺ᤛᤢᤀᤠᤱ ᤔᤧᤘᤠ᤹॥ ᤂᤧᤸᤗᤧ ᤆᤥᤃᤢᤸᤗᤧ ᤀᤠᤏᤡ᤹ᤀᤠᤱ ᤁᤴ ᤔᤧ᤺ᤴ ᤑᤠ᤹ᤀᤠᤱ ᤐᤠ᤺ᤵᤔᤠ ᤛᤢᤰᤔᤧᤍᤧᤳᤏᤧᤴᤗᤥ॥

¹⁷ᤁᤖ ᤁᤴ ᤐᤠ᤺ᤴᤏᤡᤴ ᤔᤏᤠᤜᤠ᤹ᤀᤥ ᤔᤧᤛᤧᤏᤧᤴᤗ ᤑᤠ᤹ᤀᤠᤱ ᤂᤧᤱᤜᤠ᤹ ᤀᤠᤸᤗᤀᤠᤱᤎᤥ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤜᤢ᤹ᤔᤠ ᤗᤧᤖᤧᤇᤧ᤹ ᤑᤠ᤹ᤀᤠᤱ ᤛᤠᤶᤍᤡᤱ ᤐᤡᤔᤠᤛᤡ ᤐᤥ᤺ᤱᤗᤥ॥”

¹⁸ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤕᤠᤶᤔᤥ ᤔᤧᤀᤢ᤺ᤳᤋᤢᤛᤡᤀᤠᤱ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤵᤔᤠ ᤀᤡᤃᤪ ᤜᤢ᤹ᤔᤠ ᤗᤧᤖᤧᤛᤧ᤹ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤔᤧᤒᤡᤖᤢᤛᤡᤖᤥ॥

¹⁹ᤁᤖ ᤐᤋᤪᤢᤛ ᤏᤢ ᤕᤢᤜᤢᤴᤏᤠᤖᤧ ᤏᤥᤃᤵ ᤐᤡᤖᤢᤛᤡ. “ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤂᤡᤏᤡ᤹ ᤁᤧᤒᤠ᤺ᤳᤋᤢᤶᤒᤠᤴ ᤂᤧᤶᤔᤠ ᤏᤢ᤺ᤒᤠᤒᤡ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢᤒᤠᤴ ᤂᤧᤶᤔᤠ ᤏᤢ᤺ᤒᤠᤒᤡ᥅ ᤂᤡᤏᤡ᤹ᤀᤣ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ᥄

²⁰ᤁᤖ ᤀᤠᤴᤇᤡᤃᤧ ᤕᤧᤛᤢᤖᤧ ᤆᤥᤃᤢᤒᤠ ᤐᤠ᤺ᤴ ᤏᤡ᤺ᤛᤢᤛᤡᤃᤧ ᤜᤧᤰᤁᤩᤠᤱ ᤂᤧᤵᤛᤢᤛᤡᤃᤧᤒᤠ ᤐᤠ᤺ᤴᤜᤠ᤹ ᤔᤧᤶᤒᤠ᤺ᤳᤋᤣ ᤘᤠ᤹ᤔᤠ ᤔᤧᤛᤢᤰᤛᤢᤃᤧᤴᤗᤥ॥”

²¹ᤀᤠᤸᤗ ᤁᤠᤰ ᤔᤏᤠᤜᤠ᤹ᤖᤧ ᤂᤧᤵᤔᤥ ᤐᤥ᤺ᤰᤂᤧᤒᤠ ᤜᤡᤴᤍᤥ᤺ᤰᤁᤡᤴ ᤔᤧᤏᤡ᤺ᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤔᤧᤒᤡᤖᤢᤖ ᤁᤢᤏᤠᤖᤠ ᤔᤧᤓᤥ᤺ᤛᤢᤒᤠᤸᤗᤧ ᤆᤥᤃᤢᤸᤗᤧ ᤁᤴ ᤔᤏᤠᤜᤠ᤹ ᤀᤠᤰᤂᤣᤗ᤹ᤖᤡᤰ ᤂᤢᤶᤍᤡᤱ ᤐᤡᤔᤠᤛᤡ ᤑᤠ᤹ᤀᤠᤱ ᤀᤠᤵᤋᤡᤰ ᤁᤢ᤺ᤵᤔᤠ ᤗᤠᤶ ᤂᤥ᤺ᤔᤠ ᤔᤧᤴᤇᤢᤰᤋᤢᤴᤗᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤛᤣ᤺ᤰᤕᤢᤔᤡᤒᤠᤜᤠ᤹ ᤕᤠᤶᤔᤥ ᤕᤱᤔᤠ ᤔᤧᤛᤧᤖᤢᤛᤡᤀᤠᤱ ᤔᤧᤒᤠᤱᤄᤢ ᤔᤧᤍᤣ᤺ᤛᤢᤛᤡ॥