San Lucas 7:38-50

³⁸Mänit tiägøøyy jøøbiä. Mänitä Jesús tiecypiujy wyiinnøøhaam. Mänit tiecymieex̱y quiuhwaayhaam. Mänit tiecychuꞌxy. Mänit tiecyñähjahx̱y perfumehaam.

³⁹Mänitä Simón tiägøøyy tajpä maabiä: “Coo jaꞌa Jesús häxøpy quiunajuøhñdiä, tøø häxøpy ñajuøꞌøy coo yøꞌø toꞌoxiøjc quiuhhiṉä.”

⁴⁰Mänitä Jesús jaꞌa Simón ñämaayy: ―Simón, tsøg mädiáacäm. Mänitä Simón yhadsooyy: ―Wiindsǿṉ, tsøc.

⁴¹Mänitä Jesús miänaaṉ̃: ―Jim̱ä jäyaꞌay hijty tuꞌug miänuuꞌxyhadyii jäyaꞌay metscä. Tuꞌjäyaꞌay hänajty miänuuꞌxyhaty mägoox̱mägoꞌx denarios. Jatuꞌug, juxychäguiꞌxmajc.

⁴²Cab hajxy hänajty tii miøødä nebiä ñuuꞌxy hajxy yajnähwáꞌadsät. Mänit hajxy ñämaayyä: “Weends yhity.” Hoorä, pøṉädaꞌa maas mädsógäp.

⁴³Mänitä Simón yhadsooyy: ―Jueꞌedaꞌa, jaꞌa craa jaꞌa ñuuꞌxy maas may hijty miøødpä. Mänitä Jesús miänaaṉ̃: ―Jeꞌe pues.

⁴⁴Mänitä Jesús jaꞌa toꞌoxiøjc miøjheeꞌpy. Mänitä Simón ñämaayy: ―Cooc̈h yaa ndägøøyy maa miic̈h mdøgootiän, cábøch miic̈h nøø tøø xmioꞌoy cooc̈h ndecypiújät. Jaduhṉ hajxy nax̱y nguhdujthájtäm. Pero yøꞌø toꞌoxiøjc, wyiinnøøháamhøch ndecy tøø xpiujjä, quiuhwaayháamhøch ndecy tøø xmieex̱ä.

⁴⁵Cábøch miic̈h tøø xchuꞌxy, pero yøꞌø toꞌoxiøjc, tehṉgájnøch ndecy xwyiꞌi chuꞌxä.

⁴⁶Cábøch miic̈h jaꞌa nguhwaay tøø xyhooṉä. Jaduhṉ hajxy nax̱y nguhdujthájtäm. Pero yøꞌø toꞌoxiøjc, perfumeháamhøch ndecy tøø xyhooṉä.

⁴⁷Xjiaanc̈h tehm̱ chójpøch yøꞌøduhṉ; paadiä piojpä quiädieey yajnähwáatsäxä, hoy hijty may jia møødä. Pero pøṉä pojpä cädieey hijty caꞌa jaty møød, cábøch jaduhṉ xjiaty wiingudsähgøꞌøy.

⁴⁸Mänitä Jesús jaꞌa toꞌoxiøjc ñämaayy: ―Tøøc̈h miic̈h jaꞌa mbojpä mgädieey nyajnähwáatsäm.

⁴⁹Jaꞌa hajxy hänajty jiiby pahäñaabiä, mänit hajxy tiägøøyy niñämáayyäbä: ―Maa jaꞌa cuhdujtädaꞌa tøø yhuuc paatpä coo jaꞌa pojpä cädieey yajnähwaꞌac̈h.

⁵⁰Mänitä Jesús jaꞌa toꞌoxiøjc ñämáaguiumbä: ―Cooc̈h nmädiaꞌagy tøø xmiäbøjcä, páadyhøch jaꞌa mbojpä mgädieey tøø nyajnähwaꞌac̈h. Nøcxnä jootcujc.