Luka 7:38-50

³⁸A donda bon na ten. A taminda Isa kɔfɛ ka i lɔ a sen kɔrɔ ka kasi. Ka a to kasila, a ɲaji bɔra ka buruburu Isa sen kan ka ie suma. Wo rɔ, a ka Isa sen jɔsi a jɛrɛ kunsi la ka ie sunbu, ka ban ka ie mamun latikɔlɔn tulu la.

³⁹Farisi cɛ mɛn ka Isa kili damunun kanma ka wo bɛɛ lakɔrɔsi ka a fɔ a jɛrɛ kɔndɔ ko: «Ni cɛ ɲin tun kɛra Alla la nabiɲuma jɛrɛ jɛrɛ ri, a tun di muso suu ɲin lɔn, mɛn da a bolo maa a la ten. A tun di a lɔn ko muso ɲin tɛrɛ ye kojuukɛla le ri.»

⁴⁰Isa ka a fɔ Farisi cɛ yɛ ko: «Simɔn, n ye a fɛ ka kuma do fɔ i yɛ.» Simɔn ka a jabi: «Karanmɔɔ, i ye a fɔ.»

⁴¹Isa ko: «Cɛ do la julu tun ye mɔɔ fila la. Kelen ta bɛnni wodigbɛ kɛmɛ loolu la. A tɔ kelen ta bɛnni wodigbɛ biloolu la.

⁴²Wo fila si ma se julu sarala. Wodi tii wo hinara ie la, ka diɲɛ ka ie fila la julu to ye. A ye di? Alu fila rɔ, cɛ ri diya yon yɛ ka tamin?»

⁴³Simɔn ka a jabi: «N hankili rɔ, mɛn na julu tun ka bon, cɛ ri diya wo le yɛ ka tamin.» Isa ko: «Ale le wo ri jɔ!»

⁴⁴Isa ka a ɲa lɔ muso rɔ, ka a fɔ Simɔn yɛ ko: «Simɔn, i ma muso ɲin yen wa? N nara i wara, i ma ji di n ma ka n sen mako. Kɔni a ka n sen suma a ɲaji la, ka a jɔsi a kunsi la.

⁴⁵I ma n sunbu foli rɔ. Kɔni kɛbi n donda yan, ale ma n sen sunbu boloka.

⁴⁶I ma n kun mamun tulu la, kɔni a ka latikolon mun n sen na.

⁴⁷Tuɲa ka fisa. Muso ɲin da kojuu siyaman kɛ kɔrɔman. Kɔni a la hakɛ bɛɛ a labe ka a masɔrɔn a la kaninteya ra wara. A ragbɛ! Mɔɔ mɛn ma makotoli ba sɔrɔn ten, a la kaninteya tɛ kɛ ten.»

⁴⁸Wo rɔ, Isa ka a fɔ muso yɛ ko: «I ra makoto i la kojuu bɛɛ la.»

⁴⁹Mɛnilu siini tɛrɛ ye, woilu ka a fɔ ie jɛrɛ kɔndɔ ko: «Ɛɛ! Yon ye ɲin di, mɛn di mɔɔ makoto a la kojuu la?»

⁵⁰Kɔni Isa ka a fɔ muso yɛ ko: «I ra ikisi bi i la lemɛniya sababu la. Wa! Alla ye hɛra kɛ i yɛ!»