San Lucas 7:38-50

³⁸Gate bzrin nu'ula na' naga zua Jesús, na' gudxé'e̱ zran ni'e̱ dxebezre̱', ne guzú lawe̱' dxibe̱' ni'a Jesús nen nisa dxebezre̱', ne bsebizre̱' ni'e̱ nen xicha xíchaje̱', ne bnupe̱' ni'a Jesús, na' gulu'e̱ na da dxelá zixre na'.

³⁹Na' benne' xudau' fariseo, bénnea' gunné̱' Jesús lizre̱', gate blé'ene̱' da nigá, gunné̱' lu lázrdawe̱': “Chela benne' nigá da li naque̱' benne' dxuchálaje̱' waláz chee̱ Dios, guéquebe'equeze̱' aja naca chee̱ nu'ula nigá dxuté̱' ni'e̱, lawe' da naque̱' nu'ula dul-la.”

⁴⁰Nadxa Jesús guzre̱' benne' fariseo na': ―Simón, de̱ tu da guchálajle̱na' lue'. Na' beche̱be benne' fariseo na': ―Gunná, Benne' Wese̱de.

⁴¹Jesús gunné̱': ―Chupa benne' dxelal-le̱' dumí chee̱ tu benne' tu dxusánte̱zqueze̱' benne' dumí. Tue̱' dxal-le̱' chee̱' lazruj chee̱ chupiza, na' xetúe̱' dxebague̱' lazruj chee̱ chupa beu'.

⁴²Lawe' da quebe dxelezéquene̱' xelexexízruje̱' chee̱ bénnea', na' le̱' bnite lawe̱' chee̱ dxúpate̱ benne' ca' ca naca da dxelebague̱' chee̱'. Na'a gunná, ¿nula benne' caní zrí'idxene̱' bénnea'?

⁴³Simón beche̱be̱': ―Dxéqueda' bénnea' bnite lawe̱' chee̱' da zrendxa. Na' Jesús guzre̱' le̱': ―Da li dxennáu'.

⁴⁴Nadxa Jesús gunné̱'e̱ nu'ula na', na' guzre̱' Simón: ―¿Dxelé'enu' nu'ula nigá? Neda' guxu'a lizru', ne quebe nu gunná be'enu' quibe ni'a, san nu'ula nigá gudibe̱' ni'a nen nisa dxebezre̱', ne bsebizre̱' na nen xicha xíchaje̱'.

⁴⁵Quebe bnupu' neda', san nu'ula nigá, gate guxú'utea', quebe dxusane̱' dxunúpequeze̱' ni'a.

⁴⁶Quebe gulú'u da za xíchaja', san nu'ula nigá gulu'e̱ ni'a da dxelále̱'e̱ zixre.

⁴⁷Chee̱ le̱ na' dxapa' lue', lawe' da nazrí'ile̱'e̱ne̱' neda', da nigá naca bea na ba bnite lawa' chee̱' ca naca dul-la zan chee̱', san bénnea' naca bábaze dul-la chee̱' da bnite lawa', láteze zrí'ine̱' neda'.

⁴⁸Nadxa Jesús guzre̱' nu'ula': ―Dul-la chiu' ba bnite lawa'.

⁴⁹Na' benne' ca' zaj zre̱'e nen Le̱', ne zaj dxe'e̱ na' gulezú lawe̱' dxelenné̱' lu lázrdawe̱': “¿Nuzra benne' nigá, dxunite láuqueze̱' dul-la?”

⁵⁰Jesús guzre̱' nu'ula na': ―Ba naláu' lawe' da guxéajle̱'u chia'. Bexíaj dute̱ xel-la dxebeza zri lazre'.