SAN LUCAS 7:38-50

³⁸Nɛ nu'a ra xisu mi hupʉ ja rá gua ra Jesús, nɛ mi zoni. Janangue bi mboxpʉ ja rá gua ra Jesús a rá guidä, nɛ bi ducua rá gua yʉ́ xtą, nɛ ɛ̨mmɛ zʉspa rá gua ra Jesús, nɛ bi xispa rá gua ra 'yɛ̨thi yʉmanho.

³⁹Nɛ nu'a ra mɛngu bʉ, 'bʉ mi nu 'bɛ'a i øt'a ra xisu, bi bɛ̨nsɛ: “Him majuąni rá pøngahyą Oją a ra Jesús,” nguetho ɛ̨mbi hingui pądi ra 'yomt'ɛ̨ni a ra xisu.

⁴⁰Nu ra Jesús bʉya, bi 'yɛ̨mp'a: ―Nu'i grá Simón i ja'a ga xi'i. Nu ra Simón bi 'yɛ̨na: ―Gra xänbate, dami xic 'bʉ.

⁴¹Nu ra Jesús bʉya, bi xih ra Simón n'da ran t'uti, nɛ bi 'yɛ̨mbi: ―Mi 'bʉ a n'da ran 'yohʉ ząi di hmih ra mbɛti. Nɛ mi 'bʉ'a n'da ran 'yohʉ bi hmiti cʉt'a ciɛnto, nɛ man'da bʉya bi hmiti yote ma'dɛt'a thoho.

⁴²Nɛ nu'ʉ gätho yoho hin'yʉ 'bɛ'a dí co'ts'a ra mbɛti xí mba ma hmiti. Janangue nu'a xí hmih ra mbɛti bʉya, bi punba thoho ʉ. Dami xic ya, Simón, nda'a man'da da bɛ̨n'a ra mate bi t'ørpe, bi 'yɛ̨n'a ra Jesús.

⁴³Nu ra Simón bi dąh pʉya, nɛ bi 'yɛ̨na: ―Masque gue'a ran 'yohʉ min dupate xʉn ngu, man'da da bɛ̨n'a ra mate bi t'ørpe, bi 'yɛ̨na. ―Majuąni a guím bɛ̨ni, bi 'yɛ̨n'a ra Jesús.

⁴⁴Nu ra Jesús bʉya, bi hyɛ̨t'a ra xisu nɛ bi 'yɛ̨mp'a ra Simón: ―Guí nu na ra xisu 'bʉcua, nu'bʉ má cʉt'ua ja ni ngu xíngui ts'ʉ gá 'dac ra dehe gue xcá pe't'ä ma gua, pɛ nu ra xisu i hucua, rá guidä í mbercä ma gua nɛ yʉ́ xtą í dugä ma gua.

⁴⁵Pɛ nu'i, hin gá sʉsca ma 'yogu ngue xquí zɛnguagui, pɛ nuna ra xisu him bin hɛ̨ a ní zʉsca ma gua.

⁴⁶Nɛ nu'i, hin gá cosca ma yą ra aceite, pɛ nuna ra xisu i hucua, bi xisca ma gua ra 'yɛ̨thi yʉman'u.

⁴⁷Guehna dí xi a i na, xʉn ngu rá ts'oqui na ra xisu nɛ xʉn ngu rá punbi ya, janangue ɛ̨mmɛ im bɛ̨ngä na. Pɛ nu'ʉ im bɛ̨nsɛ ts'ʉtho ra punbi i honi, man'da ts'ʉtho im bɛ̨ngä ʉ, bi 'yɛ̨n'a ra Jesús.

⁴⁸Nɛ nubʉya, bi 'yɛ̨mp'a ra xisu: ―Ya ma punbi ni ts'oqui ya, bi 'yɛ̨n'a ra Jesús.

⁴⁹Nɛ nu'ʉ i sihmɛ bʉ bin 'yɛ̨mzɛhɛ ʉ: ―To'o nín 'yohʉ na, gue i ɛ̨na sä di punba yʉ́ ts'oqui n'da, bin 'yɛ̨mzɛhɛ ʉ.

⁵⁰Pɛ nu ra Jesús bi 'yɛ̨mp'a ra xisu: ―Gá 'yɛ̨c'yɛigui, janangue ya ma punbi ni ts'oqui ya. Ní mba ya nɛ gan johya, bi 'yɛ̨mbi.