LUKAS 7:38-50

³⁸Katen' bžine' zaka' x̱kóže'le Jesusen', wži'e x̱ni'e Ḻe', ẕbeže'. Naž wzó ḻawe' žesbise' ni'a Jesusen' ḻen nis ẕbeže', na' beẕíe' ni'e ḻen yicha' yichje'. Bnope'e ni'e, na' wloé'e dan' ẕḻa' ẕix̱ ḻo ni'e.

³⁹Kate' benne' yodo' fariseon', bennen' bḻiže' Jesusen', bḻe'ele' da' ni, wzá' ḻaže'e, na' wnné': “Chela' nak benne' ni benne' ẕchaḻje' ḻo wláz Dios, gákbe'ele' da' nak no'le ni ẕgane' Ḻe', na' da' žone', dan' nake' no'le ḻe'e.”

⁴⁰Naž Jesusen' gože' benne' fariseon', na' wnné': —Smon, de to da' žénela' yapa' le'. Beží'i bennen', na' wnné': —Wnná, benne' wsedle.

⁴¹Jesusen' gože' ḻe': —Wzóa to benne' wnni'a, na' wnníta'gak chope benne' zej nbage'e mežw chie'. To bennen' nbage'e chie' laẕjwe' che chopiz, na' yetóen' nbage'e chie' laẕjwe' che chop byo'.

⁴²Dan' bi de mežw chégake' nich chíẕjwgake' dan' zej nbage'e chie', che ḻen benít ḻawe' che žoptie' dan' zej nbage'e chie'. Wnná na'a. ¿Noẕle benne' chope' ki ží'ižele' bennen' benít ḻawe' chégake'?

⁴³Beží'i Smon na', na' wnné': —Žekla' neda', bennen' wbága'že' mežw chie', dan' benít ḻawe'. Jesusen' gože' ḻe': —Da' likze ẕnno'.

⁴⁴Naž beyéchj Jesusen', na' bwie' no'len', na' gože' Smon na': —¿Ẕḻe'elo' no'le ni? Wyoá'a ližo', na' bi benno' nis da' chibla' ni'a, san no'le ni besbise' ni'a ḻen nis ẕbeže', na' beẕíe' ni'a ḻen yicha' yichje'.

⁴⁵Bi bzechw ḻawo' neda', san kate' za' bžintia' ližo', bi wzóa ži no'le ni, ẕnope'e ni'a.

⁴⁶Bi wló'o set yichja', san no'le ni wloé'e dan' ẕḻa' ẕix̱ ni'a.

⁴⁷Che ḻen žapa' le', doḻa' ẕen dan' wbaga' no'le ni, ba benít ḻawa' chie', na' nží'iḻe'ele' neda'. No benne' ženít ḻaw Dios chie' láte'do'ze, láte'do'ze nži'ile' Dios.

⁴⁸Naž Jesusen' gože' no'len', na' wnné': —Doḻa' wbago'o ba benít ḻawa' chio'.

⁴⁹Naž benne' ka' želbé'ḻene' Jesusen' tẕen gan žáwgake' wzó ḻáwgake' želyi'e ljéžgake', na' wnnágake': —¿Noẕkze benne' ni, ženít ḻawe' doḻa'?

⁵⁰Naž Jesusen' gože' no'len', na' wnné': —Dan' žejḻi'o chia' neda', ba beló'. Binlo beyéj ližo'.