SAN LUCAS 7:38-50

³⁸C'oti tä wa'tä tu pat bajca sätz'ä yoc u chen uq'ue. U t'ulesan u c'äbjut tu yoc y de ya'i u sucbi t'oc u tzuc y u tz'utz'ben yoc y u tatz'ben t'oc ni jätz'äcnib.

³⁹Jinq'uin u chäni ni aj fariseo u joq'ui tä c'uxnanba, u yäli tu c'ajalin uneba ca'da: “Si fuera mero ajt'an ta Dios ni winicda u chenica conoce machca une ni ixic que mu' u täle'ba, y cua'tac u chen, uc'a uneba ixcherajtanä”.

⁴⁰De ya'i aj Jesús u yälben ca'da: ―Simón, ya'an cua' cä xe cälbenet. Une u p'ali: ―Älä jiq'uin, Cajnoja.

⁴¹Aj Jesús u yäli ca'da: ―Cha'tu winic u cherben debe untu machca u yäq'ue' tä q'uexcan u taq'uin. Untuba u cherben debe quinientos denarios y ni otro untuba u cherben debe cincuenta.

⁴²Mach'an cua' t'oc u toje'ob y une u chi perdona u cha'tumajob. Älbenon jiq'uin caxcamba de unejob u xe u yajna'tan más ni u yum ni taq'uin.

⁴³Aj Simón u p'ali ca'da: ―Cäle' que ni cherbinti perdona másba. Aj Jesús u yälbi ca'da: ―Toj chich a wäli.

⁴⁴De ya'i aj Jesús u suti u jut ca'an ni ixic y u yälben aj Simón ca'da: ―¿A chänen ni ixicda? Ochon tan a wotot y mach a wäc'bon ja' tuba cä poque' t'oc coc, pero uneba u poqui coc t'oc u c'äbjut, y u suqui t'oc u tzuc.

⁴⁵Aneba mach a tzucti'i cä c'äb, pero ni ixicda mach u yäcti u tz'utz'benon coc desde a'ochon.

⁴⁶Aneba mach a taybon cä pam t'oc loción, pero ni ixicdaba u taybon coc t'oc jätz'äcnib.

⁴⁷Jin uc'a cälbenet cache' a'uti perdona u noj q'uenel tanä u chiba uc'a mäx u yajna'tanon, pero jini machca u yute perdona tz'ita'ba, tz'ita' u yajna'tanon.

⁴⁸De ya'i u yälbi ni ixic ca'da: ―A tanä alaj uti perdona.

⁴⁹Machcatac ya' chumca t'oc tä mesa u täq'uijob u maläc äle'ob ca'da: ―¿Caxcaba winic wäre ni jinda que u chen perdona täcä u tanä untu?

⁵⁰De ya'i u yälbi ni ixic ca'da: ―Uc'a a tz'oni, a japi chich aba. Corre cux, y mach a ni' chen pensa cua'.