Luka 7:38-50

³⁸Ma i tur namur tana pire ra ura kauna, i tangtangi, i puk ra ura kauna ma ra lur na matana, i u dir ma ra pepe na uluna, ma i manga galum ra ura kauna, ma i tap dir ma ra varku.

³⁹Ba nina ra Parisaio i ga ting pa ia, i gire, i nuk ia ta ra balana dari: Gala go ra tutana ra propet tuna, gala na nunure ra maukua i go ra vavina i bili ia, ba ra tena varpiam.

⁴⁰Iesu i tatike bali ia tana: Simon, iau mainge ina ve u tai tika na magit. Ma i biti: Tena Vartovo, una tata ka.

⁴¹A ivut dir ga kail pa ra mani pire ra tena piapie mani, tikai i kail pa ra ilima na mar na denaria tana, ma ta ra tikai a ilima na vinun uka.

⁴²Ma tago pa ta magit ba dir a bali mule me, i tabar ika dir me. Nuve ta dir na manga mari ia?

⁴³Simon i biti: Iau nuk ia ba nam di ga tabar ia ma ra mangoro. Ma i tatike tana: A dovot kaum nuknuk.

⁴⁴Ma i lingan tadav ra vavina, ma i biti tai Simon: U gire laka go ra vavina? Iau ga ruk ta go ra kubam, pa u tul tar ta tava tagu ure ra ura kaugu, ma go i tar pukpuk ra ura kaugu ma ra lur na matana, ma i tar u dir ma ra pepe na uluna.

⁴⁵Pa u ga galum iau, ma go, papa ra pakana ba iau ga ruk, pa i ngo ma ra galum ra ura kaugu.

⁴⁶Pa u ga ku ra ulugu ma ra dangi, go i tar tap ra ura kaugu ma ra varku.

⁴⁷Kari iau tatike tam: Tago di tar re vue kana mangoro na varpiam, i tar manga kana varmari; ma ta nina di re vue ra ikilik, i ikilik bula kana varmari.

⁴⁸Ma i biti tai ra vavina: Di tar re vue kaum lavur varpiam.

⁴⁹Ma diat dia ki me ta ra nian, dia tir vargiliane diat: To ia go ba i rere vue ra lavur varpiam bula?

⁵⁰Ma i biti tai ra vavina: Kaum nurnur i tar valaun u, una vana ma ra malmal.