Lukas 7:38-50

³⁸Jesus baegp̱a, guguiṯa dimugp̱a hibaiṯa gayaya dayom. Ameg leb goḵaḏa, Jesus baegp̱a ne amu iḵi uḏugp̱a op̱iaya, Jesus baeg ootuqiṯaṯa, goḏen amu Jesus baeg laaiṯom.

³⁹Amu ḏo gumak danab-Parasia, Jesus onigp̱a e uḏiom ele, nug keeke amu anṯa, inam dab mak awom. “Danab umu Nug genab propetlob amu ah umu ep̱eg bahia aḏaṯe amu nuhig kobol ele doolo. Ah umu nug hip̱unin ah,” awa aum.

⁴⁰A amu Jesus Nug danab amu nuhig dab makp̱a anam aawo doya, Nug miag matula oḏ meṯa aum. “Simon, da nai laa madip̱i na dooḵutnu ool daaṯe,” awa aum. Awa a Simon nug aum. “Ip̱uniṯak danab, nahip nai amu mehuqe!” awa aum.

⁴¹Anam a amu Jesus Nug nai imu maṯia aum. “Danab aḏit laa a beḏulahp̱a danab laanu keekenu nob ele. Danab laa nug nuhig daden nob amu 100 kina amu laa nuhig daden nob amu 10 kina ele.

⁴²Amu a keeke nob amu eḏuglahnu amu elele iiṯa amunu danab amu nug ahilah keeke nob amu uua, oo ii daye, uhuqa matom. Aria a oolahp̱a danab aun nug danab men doḏo matom, nuhignu oo oḵainab mauhḵu?” awa aum.

⁴³Awa a amu Simon nug Jesus nai maṯie doya, oḏep̱a awa aum. “Dahil dab makp̱a amu danab nug keeke nob oḵai uua, uhuqa meṯom ele, nug am anam dooḵu,” awa aum. A amu Jesus eḏua amegp̱a aum. “Dab mak amu tutuḵu, na nob ena meme,” awa aum.

⁴⁴Jesus Nug anam anana amu Nug eḏua, ah neeḵiṯaṯa, Simon amegp̱a aum. “Na ah imu anidṯem. Da na laut oop̱a nemi amu na le aon dona, da bael ii ihame amge ah imu nug ameg lebp̱a da bael ihaha, nug iḵi uḏugp̱a op̱iom.

⁴⁵Na da ii ootuqilme amge da lag oop̱a neiyi, ah imu nug dig ma, da bael ootuqiṯaṯa daaṯe.

⁴⁶Amu na da iḵil goḏen ii laaidme amge ah imu nug goḏen awa uḏia, da bael laaidṯe.

⁴⁷Amunu da na amenp̱a aṯem. Nug hip̱unin kuḏum heum amu da aaḵu uhuqa medaṯem. Aḏinu? Nug dahilnu oo huanak mauhṯe. Amge danab nug hip̱unin nakok he, da hip̱unin nuhig uhuqen meṯai, nug dahilnu oo nakokib mauhṯe,” awa aum.

⁴⁸Nug anam anana amu Nug ah amegp̱a aum. “Da hip̱unin nahip amu uhuqen medaṯem,” awa aum.

⁴⁹Jesus Nug ah amegp̱a nai anam a amu danab nug ele oh balalp̱a daap̱ig ag aḵa aḵa nai maṯin ap̱ig. “Nug am danab aun, Nug hip̱unin uhuqa meṯak danabte?”

⁵⁰Anam aeg amge Jesus Nug baula ah amu amegp̱a aum. “Na ootp̱a genab doome amunu da hei, na ena daaṯem. Na maḏoḏ ele uḵe!” awa aum.