San Lucas 7:38-50

³⁸Ta sácu ñá na̱caxítí ña̱ sa̱ha̱ Jesús ta xi̱hín ticui̱í nu̱u̱ ñá na̱jácuchu ñá sa̱há. Ta tá na̱ndihi já na̱jáhi̱chi̱ ñá do̱ xi̱hín ijí ji̱ni̱ ña̱. A̱nda̱ já na̱tatí yúhu̱ ñá sa̱há. Ta na̱chojó ñá sítí támi sáha̱n cán ja̱ta̱ sáha̱ á.

³⁹Tá na̱xini mé da̱ fariseo, da̱ na̱cana Jesús vehe da cán ña̱ yóho já na̱ca̱hán da̱ já: “Tá profeta ndusa ná cacuu da̱ yóho ta sa̱ cánda̱a̱ va ini da ndá ñá cúú ñá cáni ndaa ndáha̱ sa̱ha̱ dá jáchi̱ cúú ñá ña̱ cája cua̱há cua̱chi”, na̱ca̱hán Simón cán.

⁴⁰A̱nda̱ já na̱cachi Jesús já xi̱hín da̱ fariseo cán: —Cande̱hé Simón, cuni jo̱ho ná ca̱ha̱n i̱ xu̱hu̱n —na̱cachi Jesús xi̱hi̱n dá. A̱nda̱ já na̱cachi Simón cán já xi̱hi̱n Jesús: —Ca̱ha̱n mé á xi̱hín i̱, xitoho i̱ —na̱cachi da.

⁴¹A̱nda̱ já na̱sacu Jesús in quia̱hva nu̱ dá já na̱cachi a já xi̱hi̱n dá: —Na̱sa̱nduu i̱vi̱ da̱ta̱a ta na̱sa̱yicá da̱ jiu̱hún nu̱ mé da̱ sáhan tóo a cán. In da na̱sa̱yicá u̱hu̱n ciento ta inga da na̱sayicá i̱vi̱ jico u̱xu̱.

⁴²Ta ni in da̱ cán co̱ ndéé da̱ cha̱hvi da ña̱ yícá da̱ sa̱há ña̱ cán quéa̱ na̱caja cáhnu ini da̱ sáhan tóo jiu̱hún cán sa̱há ña̱ yícá ndíví da̱ cán. Ta viti cachún xi̱hín i̱, Simón, ndá da̱ cáhún ti̱xi ndíví da̱ yóho cacuu da da̱ qui̱hvi̱ ini chága̱ mé da̱, da̱ na̱caja cáhnu ini sa̱ha̱ cuéntá ña̱ na̱sa̱yicá da̱ cán —na̱cachi Jesús xi̱hi̱n Simón.

⁴³A̱nda̱ já na̱nducú ñehe Simón cán tu̱hun nu̱ Jesús já na̱cachi da já xi̱hi̱n á: —Cája i̱ cuéntá ña̱ quíhvi̱ ini chága̱ da̱ na̱sa̱yicá cua̱há jiu̱hún cán nu̱ dá —na̱cachi da. A̱nda̱ já na̱cachi Jesús já xi̱hi̱n Simón: —Mé a̱ nda̱a̱ cáhu̱n —na̱cachi a.

⁴⁴A̱nda̱ já na̱sande̱hé Jesús ñá na̱cho̱jo̱ sítí sa̱há cán já na̱cachi a já xi̱hi̱n Simón: —Cande̱hé va̱ha ñáñáha̱ ja̱n, Simón. Na̱qui̱hvi i̱ vehún joo co̱ó na̱sa̱hún ticui̱í ndoo sa̱há i̱. Joo ñáñáha̱ yóho na̱jácuchu ñá sa̱há i̱ xi̱hín ticui̱í nu̱u̱ ña̱. Ta tá na̱ndihi já na̱jáhi̱chi̱ ñá sa̱há i̱ xi̱hi̱n ijí ji̱ni̱ ña̱.

⁴⁵Ta yóhó, co̱ó na̱tatí yu̱hún sa̱jóho ye̱he̱ tá na̱sa̱a̱ i̱ vehún. Joo ñá yóho, ja̱nda̱ nani na̱qui̱hvi ñá vehún tátí yúhu̱ ñá sa̱há i̱. Ta a̱nda̱ viti ñúhú cája ñá a̱.

⁴⁶Ta ni co̱ó na̱chojó tohún sítí ji̱ní i̱ tá na̱xi̱nu̱ i̱ vehún. Joo ñá yóho na̱chojó ñá sítí támi sáha̱n sa̱há i̱.

⁴⁷Ta cáchí i̱ xu̱hu̱n, Simón, ña̱ xi̱hín ña̱ cája ñá yóho náha̱ ña̱ mé a̱ nda̱a̱ quíhvi̱ ini ñá ye̱he̱ jáchi̱ na̱caja cáhnu ini i̱ sa̱há cua̱chi ñá va̱tí cua̱há ndiva̱ha cúú á. Joo ndá na̱ cáhán ña̱ chá cuití va cua̱chi cája cáhnu ini i̱ sa̱ha̱, na̱ cán cúú ri na̱ chá cuití quíhvi̱ ini na ye̱he̱ —na̱cachi Jesús xi̱hi̱n Simón.

⁴⁸A̱nda̱ já na̱casáhá cáchí a̱ já xi̱hi̱n ñáñáha̱ cán: —Sa̱ na̱caja cáhnu ini i̱ sa̱há cua̱chún viti.

⁴⁹Ta tócó ndihi java ga̱ na̱ na̱taca ndúu coo nu̱ mesa vehe Simón cán na̱casáhá cáchí xi̱hi̱n táhan na já: —Ndá ta̱a cúú da̱ yóho jáchi̱ ja̱nda̱ cua̱chi cája ña̱yivi cája cáhnu ini da sa̱ha̱ —na̱cachi xi̱hi̱n táhan na̱ cán.

⁵⁰A̱nda̱ já na̱cachi Jesús já xi̱hi̱n ñáñáha̱ cán: —Na̱ca̱cu ndaa ínimu̱n jáchi̱ na̱candeé inún ye̱he̱. Cuanúhu̱ ta a̱ ndícani ga̱ inún viti —na̱cachi Jesús xi̱hi̱n ña̱.