38Iroompaquea arejetapojaca ichoocaquegueti Jesoshi ocatiapojaca igontatapojacagueti, iraanaca oparijaatanaquequea ojaquija oshaguitsitariquea iguitiqui. Ariquea osheguititantajariquea omae, onintaguititanaqueriquea, aisa oshaguiguititantacari casancajencajari.
39Ariquea yamenaquerogueti pariseo cajemaquerica Jesoshi itsovironaquitequi iquenquejanaque: “Arimajagueti iriogueti tsavetantatsica intsatsitavaquempa taaqueate pamipojiri, intsaque queroca ococani, intsatavaquequea iroguenti quempevaetatsica.”
40Iroompaquea icantanaquequea Jesoshi icanqueri pariseo: —Shimo, chooca noncanquempica. Icanqueriquea: —Iintsijate, Tsatacaantantatsica, pincantenaja.
41Icanqueriquea Jesoshi: —Chooca mavite shirampari, yaacoqueri imentaquitsite jocavaquenerica, icanqueriquea: ‘Oncoajicatapojajegueti poguipiajatenaja.’ Aparoquea yaacoqueri 500 tenario. Iriraquea itsipa ariguenti yaacoqueri 50.
42Cotanquitsiquea iriatimpajia ocoajicavepojaja aavetapojaja iroguipiantajenemparimeca teequea inchoocatajeji imentaquitsitejia querocampaquea irajaiajeri irivegaratantajemparica. Ariquea icantajiriquea: ‘Ompeashitanajempaquea intati.’ Imaicaquea iintsija pincanquena ¿queri pintsamajaquemparineca?
43Icanqueriquea Shimo: —Iriocajate ipeacomajacaca. Icanqueriquea Jesoshi: —Pitampaticamajataquero.
44Ariqueate ipitsocavetanaca yamenanaquero manquigarentsi, icanqueriquea Shimo: —¿Ari pamenaquero ocatica manquigarentsi? Noquijavepojaca pitsovironaquitequi teetari pojocavaquena pijatsite najacaguititaquempame. Iroatimpa ajacaguititanquenaro ojaquija, osheguititantajanaroquea omae.
45Aisa teequea pinintavorotenaji, cotanquitsiquea iroatimpa onintaguitiquenaquea incajaranqui arejevaeca imaica.
46Teetarite pimpantantenaroji orejiqui noguitoqui, cotanquitsiquea iroatimpaquea oshaguiguititaquenaquea casancajencajari.
47Irootaquequea imaica noncanquempi ocovaeguishevecaroqueate taaca opajitapae, cotanquitsiquea imaica shetajaqueate maasanopae, irooriji opintsamajataquena. Cotanquitsiquea iriraquea irishetsijitaqueca capichaji ipeacaaguishetacaca, capichajaniqui impintsatantavequempa.
48Iroompaquea icantsitaroquea manquigarentsi: —Imaicaquea shetanajaquea picovaeguishevetacaca.
49Ariquea irirajia icajemajiqueca itsipatsipaicaca ishecajiacagueti icantavacaajianacaquea: —¿Taashia ipajita iricatica shetsitantaqueroca covaeguisherentsi?
50Cotanquitsiquea Jesoshi icantsitaroquea aisa: —Imaicaquea meshiajimpi irooriji pavempojana. Poanaje pishinevaequempa.
Irocashi 7
Irocashi 7:38-50