SAN LUCAS 7:38-50

³⁸Ndyacaꞌa̱ choꞌ cacua ti slo quiyaꞌ Jesús liꞌ. Ndyunaa tsa choꞌ, hasta ndyalú hitya cloo choꞌ chu̱ꞌ quiyaꞌ Jesús; loꞌo quicha̱ꞌ hique choꞌ nsubeꞌ choꞌ chu̱ꞌ quiyaꞌ Jesús chaꞌ xquityi jiꞌi̱ quiyaꞌ yu. Nchcuichaꞌ choꞌ quiyaꞌ Jesús liꞌ, ndaꞌa̱ choꞌ setye tyixi xtyiꞌi biꞌ chu̱ꞌ quiyaꞌ Jesús.

³⁹Loꞌo nu yu fariseo nu cua nchcuiꞌ loꞌo Jesús chaꞌ tsaa cuaꞌni xlyaa ca slo yu ni, loꞌo cua naꞌa̱ yu jiꞌi̱ nu cunaꞌa̱ biꞌ, ndiꞌya̱ chaꞌ nguaꞌya hique yu liꞌ: “Siꞌi chaꞌ chañi laca re, chaꞌ laca yu sca ñati̱ nu laca tuꞌba jiꞌi̱ ycuiꞌ Ndyosi chaꞌ chcuiꞌ Ni loꞌo na. Si la cuiꞌ laca yu, liꞌ ta yu cuentya tilaca laca nu cunaꞌa̱ nu nsta yaꞌ lo quiyaꞌ yu juani; caca cuayáꞌ tiꞌ yu chaꞌ sca nu cunaꞌa̱ nu chiyaꞌa̱ tsa nduꞌni su ndiꞌi̱ chalyuu laca nu cua.”

⁴⁰Liꞌ nguxana Jesús nchcuiꞌ loꞌo nu yu fariseo biꞌ: ―Ntsuꞌu sca chaꞌ nu ta naꞌ loꞌo nuꞌu̱, Simón ―nacui̱ Jesús jiꞌi̱. ―Cuachaꞌ clya nuꞌu̱ jnaꞌ, cusuꞌ ―nacui̱ yu fariseo jiꞌi̱ liꞌ.

⁴¹Liꞌ nchcuane Jesús sca chaꞌ jiꞌi̱ yu fariseo biꞌ: ―Ntsuꞌu tucua tyaꞌa nguꞌ nu ntsuꞌu taneꞌ hichu̱ꞌ nguꞌ, chaꞌ ngüijñiꞌ nguꞌ cñi jiꞌi̱ sca nu culiyaꞌ. Tsaca yu ndacui yu caꞌyu siyento paxu jiꞌi̱ nu culiyaꞌ biꞌ, loꞌo chaca yu ndacui yu tuꞌba tyi ti paxu jiꞌi̱ liꞌ.

⁴²Pana tyucuaa nguꞌ ná ngua jiꞌi̱ nguꞌ tya nguꞌ cñi jiꞌi̱ nu culiyaꞌ biꞌ liꞌ. Biꞌ chaꞌ ngutaꞌa̱chu̱ꞌ nu culiyaꞌ biꞌ jiꞌi̱ chaꞌ nu ndacui nguꞌ jiꞌi̱; ngüityi̱ yu cuentya jiꞌi̱ nguꞌ, nguaꞌni tye taneꞌ jiꞌi̱ tyucuaa nguꞌ juaꞌa̱ ti. Cuachaꞌ clya nuꞌu̱ jnaꞌ lacua ―nacui̱ Jesús jiꞌi̱ yu fariseo biꞌ―, ¿tilaca laca nu tsoꞌo la ntsuꞌu tyiquee ñaꞌa̱ jiꞌi̱ nu culiyaꞌ biꞌ? Si tsaca yu, si chaca yu.

⁴³Liꞌ nguxacui̱ Simón chaꞌ jiꞌi̱ Jesús: ―Biꞌ laca nu quiñaꞌa̱ la ndacui, nu ngüiꞌya nu culiyaꞌ biꞌ chaꞌ clyu tiꞌ jiꞌi̱. Juaꞌa̱ ntiꞌ naꞌ ―nacui̱ Simón. ―Chañi chaꞌ nu nchcuiꞌ nuꞌu̱ ―nacui̱ Jesús liꞌ.

⁴⁴Loꞌo nxñaꞌa̱ Jesús ca su ngaꞌa̱ nu cunaꞌa̱ biꞌ, liꞌ xaꞌ nchcuiꞌ loꞌo nu Simón biꞌ: ―Cuiꞌya nuꞌu̱ xi cuentya ñiꞌya̱ nu ndyuꞌni nu cunaꞌa̱ cua ―nacui̱―. Nu loꞌo ndyalaa naꞌ toniꞌi̱ jinuꞌu̱ tsa̱, ná nda nuꞌu̱ hitya tyaati̱ quiyaꞌ naꞌ; pana nu cunaꞌa̱ cua ni, cua nguiꞌí̱ choꞌ quiyaꞌ naꞌ loꞌo hitya cloo choꞌ, cua nguxquityi choꞌ quiyaꞌ naꞌ loꞌo quicha̱ꞌ que choꞌ.

⁴⁵La cuiꞌ juaꞌa̱ ná nchcuichaꞌ nuꞌu̱ jnaꞌ loꞌo ndyalaa naꞌ niꞌi̱ re; pana nu cunaꞌa̱ cua ni, tya loꞌo ndyatí̱ naꞌ ñaa naꞌ nde niꞌi̱ re, tya lyiji tye chcuichaꞌ choꞌ jiꞌi̱ quiyaꞌ naꞌ.

⁴⁶Loꞌo juaꞌa̱ ná ndaꞌa̱ nuꞌu̱ setye hique naꞌ tsa̱; pana nu cunaꞌa̱ cua ni, cua ngusalú choꞌ setye tyixi xtyiꞌi chu̱ꞌ quiyaꞌ naꞌ.

⁴⁷Nde laca chaꞌ nu ndachaꞌ naꞌ jinuꞌu̱ juani, chaꞌ tsoꞌo tsa ndyuꞌni tyaꞌna tiꞌ nu cunaꞌa̱ cua jnaꞌ, biꞌ chaꞌ ca cuayáꞌ tiꞌ na chaꞌ cua ngüityi̱ ycuiꞌ Ndyosi quiꞌya nu ntsuꞌu jiꞌi̱ choꞌ, masi quiñaꞌa̱ tsa quiꞌya ntsuꞌu jiꞌi̱ choꞌ ca slo Ni. Pana ñati̱ nu ná lye ntsuꞌu quiꞌya jiꞌi̱ chaꞌ cuityi̱ ycuiꞌ Ndyosi jiꞌi̱, xti la xi chaꞌ ndube tiꞌ nguꞌ biꞌ ñaꞌa̱ nguꞌ jiꞌi̱ ycuiꞌ Ni ―nacui̱ Jesús jiꞌi̱ Simón.

⁴⁸Liꞌ nchcuiꞌ Jesús loꞌo nu cunaꞌa̱ biꞌ: ―Cua ngüityi̱ ycuiꞌ Ndyosi lcaa quiꞌya nu ntsuꞌu jinuꞌu̱ ―nacui̱.

⁴⁹Loꞌo nu ñati̱ nu ñaa stuꞌba ti loꞌo Jesús chaꞌ cacu nguꞌ xlyaa slo Simón, nguxana nguꞌ biꞌ nchcuiꞌ nguꞌ loꞌo tyaꞌa nguꞌ: ―¿Tilaca laca nu quiꞌyu re? ¿Macala ngujui chacuayáꞌ jiꞌi̱ yu chaꞌ cuityi̱ yu quiꞌya nu ntsuꞌu jiꞌi̱ nguꞌ? ―nacui̱ nguꞌ.

⁵⁰Pana ndiꞌya̱ nchcuiꞌ Jesús loꞌo nu cunaꞌa̱ biꞌ liꞌ: ―Cua ngulaá nuꞌu̱ jiꞌi̱ chaꞌ cuxi nu ntsuꞌu jinuꞌu̱ xquiꞌya chaꞌ jlya tiꞌ nuꞌu̱ ꞌna. Ti̱ ti tyiꞌi̱ tyiquee nuꞌu̱, tyaa nuꞌu̱ lacua.