San Lucas 7:38-50

³⁸Catiꞌ bdxinnu zacaꞌ cúdzuꞌlëꞌ Jesús, gröꞌnu xniꞌë rbödxnu. Niꞌr gzu launu rguꞌnu nis rbödxnu niꞌë Jesús len ruzxinu niꞌë len guitsaꞌ icjnu. Butság launu niꞌë len gluꞌnu niꞌë lë naꞌ rlaꞌ zxix.

³⁹Catiꞌ bléꞌinëꞌ lë ni bönniꞌ gdauꞌ fariseo naꞌ nulidzëꞌ Jesús, gzaꞌ ladxëꞌë, rnëꞌ: “Laꞌnaruꞌ naquëꞌ bönniꞌ ni bönniꞌ ruꞌë didzaꞌ uláz queëꞌ Dios, huáquibeꞌinëꞌ nuzxa naꞌ len nacx nacnu ngul ni rgannu Lëꞌ, le nacnu ngul udá dzag.”

⁴⁰Niꞌr gudxëꞌ bönniꞌ fariseo naꞌ Jesús, rnëꞌ: ―Simón, dë tu le ral‑laꞌ gyëpaꞌ liꞌ. Bubiꞌë didzaꞌ bönniꞌ naꞌ, rnëꞌ: ―Gna, Bönniꞌ Usëdi.

⁴¹Jesús rëꞌ lëꞌ: ―Zoëꞌ bönniꞌ dë dumí queëꞌ atiꞌ nacuꞌë chopëꞌ bönniꞌ tal‑lëꞌë dumí queëꞌ. Tuëꞌ bönniꞌ naꞌ ral‑lëꞌë queëꞌ lazxjëꞌ qui chop iz, atiꞌ yetúëꞌ naꞌ ral‑lëꞌë queëꞌ lazxjëꞌ qui chop beoꞌ.

⁴²Le cudë́ quequëꞌ dumí luguizxjëꞌ lë naꞌ tal‑lëꞌë queëꞌ, qui lë ni naꞌ bunít lahuëꞌ gropëꞌ lë naꞌ tal‑lëꞌë queëꞌ. Gnatscaꞌ naꞌa. ¿Núzxalëꞌ bönniꞌ chopëꞌ ni gdxiꞌirnëꞌ bönniꞌ naꞌ bunít lahuëꞌ lequëꞌ?

⁴³Bubiꞌë didzaꞌ Simón naꞌ, rnëꞌ: ―Ráquidaꞌ nedaꞌ, bönniꞌ naꞌ rál‑laꞌrëꞌ queëꞌ dumí, lë naꞌ bunít lahuëꞌ. Jesús gudxëꞌ lëꞌ: ―Le nacz rnauꞌ.

⁴⁴Niꞌr bueycjëꞌ Jesús, atiꞌ niꞌ ruyúëꞌ‑nu ngul naꞌ, rëꞌ Simón: ―¿Naruꞌ rléꞌinuꞌ ngul ni? Gyaziaꞌ lidxuꞌ atiꞌ cutu bennuꞌ quiaꞌ nis quibdaꞌ niꞌa, san gluꞌnu niꞌa nis rbödxnu ngul ni, len buzxinu niꞌa len guitsaꞌ icjnu.

⁴⁵Cutu butság lauꞌ nedaꞌ, san catiꞌ bdxinteaꞌ lidxuꞌ, cutu ruzóa dxinu ngul ni, rutság launu niꞌa.

⁴⁶Cutu gluꞌu icjaꞌ le za, san gluꞌnu niꞌa lë naꞌ rlaꞌ zxix ngul ni.

⁴⁷Qui lë ni naꞌ rëpaꞌ liꞌ, dul‑laꞌ zian nabágaꞌnu ngul ni, chgyuꞌu yöl‑laꞌ runít lau quegac, atiꞌ nadxíꞌitsquinu nedaꞌ. Nu naꞌ Dios runít lahuëꞌ lei látiꞌdauꞌz, látiꞌdauꞌz nadxíꞌi Dios nu naꞌ.

⁴⁸Niꞌr gudxëꞌ‑nu ngul naꞌ Jesús, rnëꞌ: ―Dul‑laꞌ nabaguꞌu chgyuꞌu yöl‑laꞌ runít lau qui.

⁴⁹Gulazú lauquëꞌ të lzaꞌquëꞌ bönniꞌ naꞌ taꞌbö́ꞌlenëꞌ Jesús tahuëꞌ, taꞌnë́ꞌ: ―¿Nuzxa caz bönniꞌ ni, runít lautsëꞌ caꞌ dul‑laꞌ?

⁵⁰Niꞌr gudxëꞌ‑nu ngul naꞌ Jesús, rnëꞌ: ―Le réjlëꞌu nedaꞌ, chbuláuꞌ liꞌ. Böaj lidxuꞌ, zoa dxi ladxuꞌu.