ሉቃሳ 7:38-50

³⁸ጉዬና ኣ ጌዲያ ማታን ኤቃዴ፥ ዬካዴ ኣ ጌዲያካ ባሬ ኣፎꬃን ኦካ ዶማዱ፤ ኢዚ ኣፎꬃይ ባዪዜዳ ኣ ጌዲያካ ባሬ ሁጲያ ቢናናን ቁጫዴኔ ኣ ጌዲያ ዬራዴ ጌዲያን ሺቱዋካ ጫጫፋዱ።

³⁹ዬሱሳ ባሬ ሶይ ፄሴዳ ፓሪሳዊካ ሃዋ ቤዒዴ፥ «ሃዌ ናቢያ ጊዴዴንቶ፥ ሃና ኣ ቦቺያ ሚሺራታ ኦኔንቶኔ ቃይካ ኢዛ ናጋራንቻ ጊዲያዋ ኢ ኤራናሺን» ያጌዳ።

⁴⁰ዬሱሲካ ዛሪዴ፥ «ሲሞና፥ ታኒ ኔው ኦዲያ ዬዉ ዴዔ» ያጊና፥ ሲሞኒካ፥ «ታማሪሲያዎ፥ ኦዳ» ያጌዳ።

⁴¹ዬሱሲ፥ «ኢቲ ቢታኒያፔ ሚሻ ታልዔዳ ላዑ ኣሳቱ ዴዒኖ። ኢቱዋ ማታን ኢቼሹ ፄቱ ዲናሪ፥ ቃይ ዮኩዋ ማታን ኢሻታሙ ዴዔ።

⁴²ላዓቶካ ጪጊያዌ ꬋዪና፥ ላዓቱዋ ኣጩዋካ ማሪ ኣጌዳ። ሃዋንቱፔ ሃቃዌ ሎይꬂ ዶሲያዋ ማላቲ?» ያጌዳ።

⁴³ሲሞኒካ ዛሪዴ፥ «ዳሩዋ ኣጎዋ ማላቴ» ያጌዳ። ዬሱሲካ፥ «ቱሙዋ ዛራዳ» ያጌዳ።

⁴⁴ዬሱሲ ሚሺራቲኮ ፄሊዴ፥ ሲሞና ሃዋዳን ያጌዳ፤ «ሃኖ ሚሺራቶ ቤዓዲ? ታኒ ኔ ጎሌ ዪና ሃራይ ኣቶሺን ሃꬃካ ታ ጌዴው ኢማቤይካ፤ ሺን ኢዛ ባሬ ኣፎꬃን ታጌዲያ ኢርፂሳዱ፤ ባሬ ሁጲያ ቢናናኒካ ቁጫዱ።

⁴⁵ኔኒ ታና ዬራ ቤይካ፤ ሺን ኢዛ ታኒ ጌሎዴፔ ዶማዴ ታጌዲያ ዬሪያዋ ኣጋ ቤይኩ።

⁴⁶ኔኒ ታ ሁጲያን ዛይቲያ ኦካ ቤይካ፤ ሺን ኢዛ ታ ጌዲያን ሺቱዋ ጫጫፋዱ።

⁴⁷ሃዋ ዲራው ታ ሂንቴንቶ ኦዳይ፡ ዳሮፔ ኢዛ ዶሴዳዋ ዲራው፥ ዳሮ ናጋራይ ኢዚው ዴዒያዌ ማሬቴዳ፤ ጉꬃይ ማሬቲያዌ ጉꬃ ዶሴ» ያጌዳ።

⁴⁸ዬሱሲ ሚሺራቶ፥ «ኔ ናጋራይ ቁጬቴዳ» ያጌዳ።

⁴⁹ዬሱሳና ኢቲፔ ቁማ ማናው ኡቴዳዋንቱ ባሬንቱ ዎዛናን፥ «ናጋራ ማራናው ዳንዳዪያዌ ሃዌ ኦኔ?» ያጌዲኖ።

⁵⁰ዬሱሲ ሚሺራቶ፥ «ኔ ኣማኑ ኔና ኣሼዳ፥ ሳሮቴꬃን ኔ ጎሌ ባ» ያጌዳ።